കാണ്പൂര്: ഉത്തര്പ്രദേശിലെ കാണ്പൂരില് സ്വന്തം മക്കളെ പിതാവ് അതിക്രൂരമായി കൊലപ്പെടുത്തി. 11 വയസ്സുള്ള ഇരട്ടപ്പെണ്കുട്ടികളെയാണ് മദ്യപാനിയായ പിതാവ് കഴുത്തറുത്ത് കൊന്നത്. ഞായറാഴ്ച പുലര്ച്ചെയാണ് നാടിനെ നടുക്കിയ സംഭവം പുറത്തറിഞ്ഞത്. കൃത്യത്തിന് ശേഷം പ്രതി തന്നെ പോലീസിനെ വിവരമറിയിക്കുകയായിരുന്നു. പ്രതിയുടെ ഭാര്യ രേഷ്മ ഛേത്രി ഭര്ത്താവിനെതിരെ ഗുരുതരമായ ആരോപണങ്ങളാണ് ഉന്നയിച്ചിരിക്കുന്നത്. 2014-ല് പ്രണയിച്ച് വിവാഹം കഴിച്ചവരായിരുന്നു ഇരുവരും. എന്നാല് വിവാഹശേഷം ഭര്ത്താവ് കടുത്ത മദ്യപാനിയായി മാറുകയും രേഷ്മയെ നിരന്തരം മര്ദ്ദിക്കുകയും ഭക്ഷണം നല്കാതെ പീഡിപ്പിക്കുകയും ചെയ്തിരുന്നു.
ഭര്ത്താവിന്റെ ക്രൂരത ഭയന്ന് ഒമ്പത് മാസത്തോളം രേഷ്മ സ്വന്തം വീട്ടിലായിരുന്നു. പിന്നീട് പെണ്മക്കളെ പിരിഞ്ഞിരിക്കാന് വയ്യാതെയാണ് തിരികെ എത്തിയത്. ഭാര്യയുടെ നീക്കങ്ങള് നിരീക്ഷിക്കാന് വീടിനുള്ളിലും കിടപ്പുമുറിയിലും പ്രതി സിസിടിവി ക്യാമറകള് സ്ഥാപിച്ചിരുന്നു. താനും പെണ്മക്കളും ആത്മഹത്യ ചെയ്യുമെന്ന് ഇയാള് നിരന്തരം ഭീഷണിപ്പെടുത്തിയിരുന്നതായും രേഷ്മ പറഞ്ഞു. സംഭവം നടന്ന രാത്രിയില് വീട്ടില് അസ്വാഭാവികമായി ഒന്നും തോന്നിയിരുന്നില്ലെന്ന് രേഷ്മ പറഞ്ഞു. എല്ലാവരും ഒന്നിച്ച് ഭക്ഷണം കഴിച്ച ശേഷം പിതാവ് ഇരട്ടപ്പെണ്കുട്ടികളെ തന്റെ മുറിയിലേക്ക് ഉറക്കാന് കൊണ്ടുപോയി.
പുലര്ച്ചെ 2.30 ഓടെ ഭര്ത്താവ് ഒരു മകളെ ബാത്റൂമിലേക്ക് കൊണ്ടുപോകുന്നത് രേഷ്മ സിസിടിവി മോണിറ്ററിലൂടെ കണ്ടിരുന്നു. ഇതിന് ശേഷം അയാള് മുറിയിലെ ലൈറ്റുകള് അണച്ചു. എല്ലാവരും ഉറങ്ങിയെന്ന് കരുതിയ രേഷ്മ, തന്റെ മക്കള് കൊല്ലപ്പെട്ട വിവരം അറിഞ്ഞില്ല. മക്കളുടെ കഴുത്തില് ആഴത്തിലുള്ള മുറിവുകളേറ്റ നിലയിലാണ് മൃതദേഹങ്ങള് കണ്ടെത്തിയത്. വിവരമറിഞ്ഞ ഉടന് തന്നെ മുതിര്ന്ന പോലീസ് ഉദ്യോഗസ്ഥരും ഫോറന്സിക് സംഘവും സ്ഥലത്തെത്തി തെളിവുകള് ശേഖരിച്ചു.
പിതാവിനെ സംഭവസ്ഥലത്ത് വെച്ച് തന്നെ പോലീസ് അറസ്റ്റ് ചെയ്തു. കൊലപാതകത്തിന് പിന്നിലെ കൃത്യമായ കാരണം കണ്ടെത്താന് ഇയാളെ വിശദമായി ചോദ്യം ചെയ്തു വരികയാണ്. മൃതദേഹങ്ങള് പോസ്റ്റ്മോര്ട്ടത്തിനായി മാറ്റി. കേസില് കര്ശനമായ നിയമനടപടികള് സ്വീകരിക്കുമെന്ന് സീനിയര് പോലീസ് ഓഫീസര് ദീപേന്ദ്ര നാഥ് ചൗധരി അറിയിച്ചു. മേഖലയില് നിലവില് ക്രമസമാധാന നില ശാന്തമാണെന്ന് പോലീസ് വ്യക്തമാക്കി.
