കൊല്‍ക്കത്ത: പശ്ചിമ ബംഗാള്‍ നിയമസഭാ തിരഞ്ഞെടുപ്പിന്റെ ഒന്നാം ഘട്ട വോട്ടെടുപ്പിന് മുന്നോടിയായി സംസ്ഥാനത്ത് ഇരുചക്ര വാഹനങ്ങള്‍ക്ക് കര്‍ശന നിയന്ത്രണങ്ങള്‍ ഏര്‍പ്പെടുത്തി തിരഞ്ഞെടുപ്പ് കമ്മീഷന്‍. സ്വതന്ത്രവും സമാധാനപരവുമായ വോട്ടെടുപ്പ് ഉറപ്പാക്കുന്നതിന്റെ ഭാഗമായി ബൈക്ക് റാലികള്‍ പൂര്‍ണ്ണമായും നിരോധിച്ചു. കൂടാതെ രാത്രികാല യാത്രകള്‍ക്കും ബൈക്കുകളില്‍ പിന്നിലിരുന്നുള്ള യാത്രകള്‍ക്കും നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്.
ഏപ്രില്‍ 23-ന് ഒന്നാം ഘട്ട വോട്ടെടുപ്പ് നടക്കുന്ന 152 മണ്ഡലങ്ങളില്‍ ചൊവ്വാഴ്ച മുതല്‍ ഈ നിയന്ത്രണങ്ങള്‍ പ്രാബല്യത്തില്‍ വന്നു. വൈകുന്നേരം 6 മണി മുതല്‍ രാവിലെ 6 മണി വരെ റോഡുകളില്‍ ബൈക്കുകള്‍ക്കോ സ്‌കൂട്ടറുകള്‍ക്കോ അനുമതിയുണ്ടായിരിക്കില്ല. എന്നാല്‍ മെഡിക്കല്‍ എമര്‍ജന്‍സി, കുടുംബപരമായ അത്യാവശ്യ ചടങ്ങുകള്‍ എന്നിവയ്‌ക്ക് ഇളവ് നല്‍കും. രാവിലെ 6 മുതല്‍ വൈകുന്നേരം 6 വരെയുള്ള സമയത്ത് ബൈക്കുകളില്‍ പിന്നിലിരുന്ന് യാത്ര ചെയ്യുന്നത് നിരോധിച്ചു.
കുട്ടികളെ സ്‌കൂളില്‍ കൊണ്ടുപോകുന്നതിനും തിരികെ വരുന്നതിനും, മെഡിക്കല്‍ ആവശ്യങ്ങള്‍ക്കും ഇതില്‍ ഇളവുണ്ട്. വോട്ടെടുപ്പ് ദിവസം വോട്ട് ചെയ്യാന്‍ പോകുന്നതിനായി കുടുംബാംഗങ്ങളെ പിന്നിലിരുത്തി യാത്ര ചെയ്യാന്‍ അനുമതിയുണ്ടാകും. വോട്ടര്‍മാരെ ഭയപ്പെടുത്തുന്നതിനും തിരഞ്ഞെടുപ്പ് പ്രക്രിയ തടസ്സപ്പെടുത്തുന്നതിനും ബൈക്ക് റാലികള്‍ കാരണമാകുന്നുവെന്ന വിലയിരുത്തലിനെത്തുടര്‍ന്ന് ഇവ പൂര്‍ണ്ണമായും നിരോധിച്ചു.
അടിയന്തര സാഹചര്യങ്ങളില്‍ ഇളവ് ആവശ്യമുള്ളവര്‍ പ്രാദേശിക പോലീസ് സ്റ്റേഷനില്‍ നിന്ന് മുന്‍കൂട്ടി അനുമതി വാങ്ങണമെന്ന് കമ്മീഷന്‍ അറിയിച്ചു. ബംഗാളില്‍ സുതാര്യവും നീതിയുക്തവുമായ തിരഞ്ഞെടുപ്പ് ഉറപ്പാക്കാന്‍ സാധ്യമായ എല്ലാ നടപടികളും സ്വീകരിക്കുമെന്ന് മുഖ്യ തിരഞ്ഞെടുപ്പ് കമ്മീഷണര്‍ ജ്ഞാനേഷ് കുമാര്‍ വ്യക്തമാക്കി.
