ആലപ്പുഴ: മാവേലിക്കര ചെട്ടികുളങ്ങര ക്ഷേത്രത്തിന് സമീപം തിങ്കളാഴ്ച രാവിലെ നടന്ന ദാരുണമായ വാഹനാപകടത്തില് രണ്ട് പേര് മരിച്ചു. ഫെഡറല് ബാങ്ക് മാവേലിക്കര ശാഖയിലെ ഉദ്യോഗസ്ഥനായ ഭഗവതിപ്പടി മങ്ങാട്ടുശ്ശേരില് അനന്തന് (26), വഴിയാത്രക്കാരനായ ഈരേഴ വടക്ക് ചെറുകര തെക്കേതില് ചെല്ലപ്പന് നായര് (74) എന്നിവരാണ് അന്തരിച്ചത്.
രാവിലെ ഒന്പതരയോടെ അഞ്ചുമുറിക്കടയ്ക്ക് സമീപമായിരുന്നു അപകടം. ജോലിക്ക് പോകുകയായിരുന്ന അനന്തന് സഞ്ചരിച്ച ബൈക്ക് റോഡരികിലൂടെ നടന്നുപോവുകയായിരുന്ന ചെല്ലപ്പന് നായരെ ഇടിക്കുകയായിരുന്നു. തുടര്ന്ന് നിയന്ത്രണം വിട്ട ബൈക്ക് സമീപത്തെ മതിലില് ശക്തമായി ഇടിച്ചു. മതിലില് ഇടിച്ച ആഘാതത്തില് തലയ്ക്ക് ഗുരുതരമായി പരിക്കേറ്റ അനന്തന് സംഭവസ്ഥലത്ത് വെച്ച് തന്നെ മരണപ്പെട്ടു.
ബൈക്ക് ഇടിച്ച് തെറിച്ചുവീണ ചെല്ലപ്പന് നായരെ ഉടന് തന്നെ തട്ടാരമ്പലത്തെ സ്വകാര്യ ആശുപത്രിയില് എത്തിച്ചെങ്കിലും ചികിത്സയ്ക്കിടെ മരണം സംഭവിക്കുകയായിരുന്നു. നാട്ടുകാരും പോലീസും സ്ഥലത്തെത്തി തുടര്നടപടികള് സ്വീകരിച്ചു. മൃതദേഹങ്ങള് പോസ്റ്റ്മോര്ട്ടം നടപടികള്ക്കായി ആശുപത്രി മോര്ച്ചറിയിലേക്ക് മാറ്റി.
