ബെംഗളൂരു : കർണാടകയിൽ മുഖ്യമന്ത്രി മാറ്റം. സംസ്ഥാന രാഷ്‌ട്രീയത്തിലെ സുപ്രധാന സംഭവവികാസങ്ങൾക്കിടയിൽ നിലവിലെ മുഖ്യമന്ത്രി സിദ്ധരാമയ്യ ഉടൻ രാജിവയ്‌ക്കും. കഴിഞ്ഞ ദിവസം ന്യൂഡൽഹിയിൽ നടന്ന മാരത്തോൺ ചർച്ചയ്‌ക്ക് പിന്നാലെയാണ് നടപടി. ഉപമുഖ്യമന്ത്രിയും കെപിസിസി പ്രസിഡന്റുമായ ഡി കെ ശിവകുമാർ കർണാടകയുടെ അടുത്ത മുഖ്യമന്ത്രിയാകും എന്നാണ് റിപ്പോർട്ട്. സതീശ് ജർക്കിഹോളി കെ.പി.സി.സി അധ്യക്ഷനാകും
മുഖ്യമന്ത്രി സിദ്ധരാമയ്യ രാജിവയ്‌ക്കാൻ സമ്മതിച്ചതായി ഉന്നത വൃത്തങ്ങൾ സ്ഥിരീകരിച്ചതായി റിപ്പോർട്ട്. ചൊവ്വാഴ്ച രാത്രി നടന്ന സുപ്രധാന കൂടിയാലോചനകൾക്ക് ശേഷം, അടുത്ത മുഖ്യമന്ത്രിയായി ഡി കെ ശിവകുമാറിനെ നിയമിക്കുന്ന തീരുമാനത്തിലേക്ക് കോൺഗ്രസ് നേതൃത്വം എത്തിയതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു. മുഖ്യമന്ത്രി സ്ഥാനത്തേക്ക് സിദ്ധരാമയ്യ പക്ഷം നിർദേശിച്ചിരുന്ന എഐസിസി പ്രസിഡന്റ് മല്ലികാർജുൻ ഖാർഗെ പ്രായാധിക്യവും ആരോഗ്യപരമായ കാരണങ്ങളും ചൂണ്ടിക്കാട്ടി ക്ഷണം നിരസിച്ചു.
2023 ലെ നിയമസഭാ തെരഞ്ഞെടുപ്പിൽ കോൺഗ്രസ് അധികാരത്തിൽ വന്നതിനുശേഷം രണ്ടര വർഷത്തേക്ക് മുഖ്യമന്ത്രി സ്ഥാനം പങ്കിടാൻ ധാരണയുണ്ടായിരുന്നതായി വാർത്തകൾ ഉണ്ടായിരുന്നു.
