മനോഹരമായ സ്ഥലത്ത് മധുവിധു ഏതൊരി നവ ദമ്പതികളുടെയും സ്വപ്നമാണ്. അത്തരക്കാർക്ക് മികച്ച ഓപ്ഷനാണ് ആൻഡമാൻ നിക്കോബാർ, ഇന്ത്യൻ ഉപഭൂഖണ്ഡത്തിൽ നിന്ന് ഏകദേശം 1200 കിലോമീറ്റർ അകലെ ബംഗാൾ ഉൾക്കടലിൽ സ്ഥിതി ചെയ്യുന്ന ദ്വീപുസമൂഹമാണിത്. കേന്ദ്രഭരണ പ്രദേശമായ ആൻഡമാൻ നിക്കോബാർ, 572 ദ്വീപുകളുടെ മനോഹരമായ ഒരു സമൂഹമാണ്. തലസ്ഥാനമായ പോർട്ട് ബ്ലെയർ ആണ് പ്രധാന പ്രവേശന കവാടം.
ചരിത്രപരമായ പ്രാധാന്യവും അതിമനോഹരമായ കടൽത്തീരങ്ങളും കൊണ്ട് സഞ്ചാരികളെ ആകർഷിക്കുന്ന ഒരു വിനോദസഞ്ചാര കേന്ദ്രമാണിത്. നീൽ ദ്വീപ്, റോസ് ദ്വീപ്, ബാരാടാങ് (ചുണ്ണാമ്പ് ഗുഹകൾ) എന്നിവയാണ് ഇവിടത്തെ പ്രധാന സ്ഥലങ്ങൾ.
സെല്ലുലാർ ജയിൽ: ‘കാലാപാനി’ എന്ന പേരിൽ അറിയപ്പെട്ടിരുന്ന ബ്രിട്ടീഷ് കാലത്തെ ജയിൽ പോർട്ട് ബ്ലെയറിലാണ് സ്ഥിതി ചെയ്യുന്നത്. ജയിൽ ഇന്ന് ഒരു ദേശീയ സ്മാരകമാണ്. ഇവിടെ നടക്കുന്ന പ്രശസ്തമായ ലൈറ്റ് ആൻഡ് സൗണ്ട് ഷോ ഏറെ സഞ്ചാരികളെ ആകർഷിക്കുന്നു.
സാഹസിക വിനോദങ്ങൾ: സ്കൂബ ഡൈവിംഗ്, സ്നോർക്കലിംഗ്, ഗ്ലാസ് ബോട്ടം റൈഡ്, സീ വാക്കിംഗ് തുടങ്ങിയ ജലകായിക വിനോദങ്ങൾക്ക് ഏറ്റവും അനുയോജ്യമായ സ്ഥലമാണിത്.
എത്തിച്ചേരാൻ: ഇന്ത്യയിലെ പ്രധാന നഗരങ്ങളിൽ (ചെന്നൈ, കൊൽക്കത്ത, ബെംഗളൂരു, ഡൽഹി) നിന്നും പോർട്ട് ബ്ലെയറിലേക്ക് നേരിട്ട് വിമാന സർവീസുകൾ ലഭ്യമാണ്. കൂടാതെ ചെന്നൈ, വിശാഖപട്ടണം എന്നിവിടങ്ങളിൽ നിന്ന് കപ്പൽ മാർഗ്ഗവും യാത്ര ചെയ്യാം.
