തിരുവനന്തപുരം: ശബരിമല അയ്യപ്പ ക്ഷേത്രത്തിലെയും മാളികപ്പുറം ക്ഷേത്രത്തിലെയും പുതിയ മേല്‍ശാന്തിമാരെ തിരഞ്ഞെടുക്കുന്നതിനുള്ള നറുക്കെടുപ്പ് ഇന്ന് നടക്കും. പന്തളം കൊട്ടാരത്തില്‍നിന്നുള്ള ദേവനന്ദന്‍ അര്‍ജുനെയും അനശ്വര എം. രഞ്ജിത്തിനെയുമാണ് നറുക്കെടുപ്പിനായി നിയോഗിച്ചിരിക്കുന്നത്. രാവിലെ എട്ടോടെ സന്നിധാനത്തും മാളികപ്പുറത്തുമായി നറുക്കെടുപ്പ് നടക്കുമെന്നാണ് വിവരം.
പന്തളം കൊട്ടാരത്തിലെ രാമവര്‍മ രാജയാണ് കുട്ടികളെ നറുക്കെടുപ്പിനായി നിയോഗിച്ചത്. സുപ്രീംകോടതിയുടെ 2011ലെ ഉത്തരവിന്റെയും വിരമിച്ച ജസ്റ്റിസ് കെ.ടി. തോമസ് സമര്‍പ്പിച്ച റിപ്പോര്‍ട്ടിന്റെയും അടിസ്ഥാനത്തിലാണ് കുട്ടികളെ തിരഞ്ഞെടുക്കുന്നത്.
ശബരിമല മേല്‍ശാന്തി തിരഞ്ഞെടുപ്പിനുള്ള അന്തിമ പട്ടികയില്‍ ഏഴുപേരും മാളികപ്പുറം മേല്‍ശാന്തി തിരഞ്ഞെടുപ്പിനുള്ള പട്ടികയില്‍ അഞ്ചുപേരുമാണുള്ളത്. മാളികപ്പുറം പട്ടികയിലുള്ള അഞ്ചുപേരും ശബരിമല പട്ടികയിലും ഉള്‍പ്പെട്ടിട്ടുണ്ട്. അതിനാല്‍ രണ്ട് ക്ഷേത്രങ്ങളിലുമായി ആകെ ഏഴുപേരാണ് നറുക്കെടുപ്പില്‍ പരിഗണിക്കപ്പെടുന്നത്.
ശബരിമല മേല്‍ശാന്തി നറുക്കെടുപ്പിനുള്ള അന്തിമ പട്ടികയില്‍ ഇടംപിടിച്ചവര്‍:
1. അരീക്കര സുബ്രഹ്‌മണ്യന്‍ ശങ്കരന്‍ നമ്പൂതിരി
2. എ. ദാമോദരന്‍ നമ്പൂതിരി
3. എസ്. ഹരികുമാര്‍
4. പി.കെ. ഹരിശങ്കര്‍
5. ടി.എന്‍. ഉണ്ണികൃഷ്ണന്‍
6. വി.എസ്. ശങ്കരന്‍ നമ്പൂതിരി
7. എന്‍.കെ. രാമന്‍ നമ്പൂതിരി
മാളികപ്പുറം മേല്‍ശാന്തി പട്ടികയില്‍ അഞ്ചുപേര്‍
1. അരീക്കര സുബ്രഹ്‌മണ്യന്‍ ശങ്കരന്‍ നമ്പൂതിരി
2. എ. ദാമോദരന്‍ നമ്പൂതിരി
3. പി.കെ. ഹരിശങ്കര്‍
4. വി.എസ്. ശങ്കരന്‍ നമ്പൂതിരി
5. എന്‍.കെ. രാമന്‍ നമ്പൂതിരി
അതേസമയം, ശബരിമല മണ്ഡല-മകരവിളക്ക് തീര്‍ഥാടനവുമായി ബന്ധപ്പെട്ട ഒരുക്കങ്ങള്‍ സമയബന്ധിതമായി പൂര്‍ത്തിയാക്കണമെന്ന് മുഖ്യമന്ത്രി വി.ഡി. സതീശന്‍ നിര്‍ദേശം നല്‍കി. തീര്‍ഥാടന മുന്നൊരുക്കങ്ങള്‍ വിലയിരുത്തുന്നതിനായി നിലയ്‌ക്കലില്‍ സന്ദര്‍ശനം നടത്തിയ ശേഷം പമ്പ ശ്രീരാമസാകേതം ഓഡിറ്റോറിയത്തില്‍ ചേര്‍ന്ന യോഗത്തിലാണ് വിവിധ വകുപ്പുകളുടെ പ്രവര്‍ത്തനങ്ങള്‍ വിലയിരുത്തിയത്.
സന്നിധാനം, പമ്പ, നിലയ്‌ക്കല്‍ എന്നിവിടങ്ങളിലെയും മറ്റ് തീര്‍ഥാടന കേന്ദ്രങ്ങളിലെയും നിര്‍മാണ-അറ്റകുറ്റപ്പണികള്‍ യുദ്ധകാലാടിസ്ഥാനത്തില്‍ പൂര്‍ത്തിയാക്കണം. വിവിധ വകുപ്പുകളുടെ പ്രവര്‍ത്തന പുരോഗതി സെക്രട്ടറിമാര്‍ വഴി സര്‍ക്കാരിനെ അറിയിക്കണമെന്നും മുഖ്യമന്ത്രി നിര്‍ദേശിച്ചു. നിലയ്‌ക്കലിലെ 21 പാര്‍ക്കിങ് ഗ്രൗണ്ടുകളും വൃത്തിയാക്കി മികച്ച രീതിയില്‍ സജ്ജമാക്കാന്‍ ദേവസ്വം ബോര്‍ഡിന് നിര്‍ദേശം നല്‍കി. നിലയ്‌ക്കലില്‍ പുതുതായി നിര്‍മിച്ച പൊലീസ് ബാരക്കില്‍ 600 പേര്‍ക്ക് താമസിക്കാനുള്ള സൗകര്യമുണ്ട്. പഴയ ബാരക്കിന്റെ അറ്റകുറ്റപ്പണികളും പൂര്‍ത്തിയാക്കണം.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
പമ്പ-ചാലക്കയം റോഡിന്റെ ആധുനിക രീതിയിലുള്ള നിര്‍മാണം സമയബന്ധിതമായി പൂര്‍ത്തിയാക്കാന്‍ പൊതുമരാമത്ത് നിരത്ത് വിഭാഗത്തോട് ആവശ്യപ്പെട്ടു. മറ്റ് റോഡുകളുടെ അറ്റകുറ്റപ്പണികള്‍ രണ്ടാഴ്ചയ്‌ക്കകം പൂര്‍ത്തിയാക്കണമെന്നും നിര്‍ദേശമുണ്ട്. നിലയ്‌ക്കലില്‍ ജര്‍മന്‍ മാതൃകയിലുള്ള പന്തലോടുകൂടിയ പൊലീസ് എയ്ഡ് പോസ്റ്റ് നിര്‍മിക്കണം. പമ്പയിലെയും സന്നിധാനത്തെയും പൊലീസ് മെസ്, പമ്പയിലെ പഴയ പൊലീസ് സ്റ്റേഷന്‍, സന്നിധാനത്തെ സ്റ്റേഷന്‍ എന്നിവിടങ്ങളിലെ അറ്റകുറ്റപ്പണികളും സമയബന്ധിതമായി പൂര്‍ത്തിയാക്കണം. മരക്കൂട്ടം-ശരംകുത്തി പാതയില്‍ ബാരിക്കേഡുകള്‍ ഉറപ്പാക്കാനും നിര്‍ദേശം നല്‍കിയിട്ടുണ്ട്. തീര്‍ഥാടനകാലത്ത് ഭക്തര്‍ക്ക് സുരക്ഷിതവും സുഗമവുമായ ദര്‍ശനം ഉറപ്പാക്കുന്നതിനുള്ള ക്രമീകരണങ്ങളാണ് യോഗത്തില്‍ പ്രധാനമായും വിലയിരുത്തിയത്.
