തിരുവനന്തപുരം: ആര്എസ്എസ് സര്സംഘചാലക് മോഹന് ഭാഗവത് പങ്കെടുത്ത ചടങ്ങില് കേരളത്തിലെ മൂന്ന് വൈസ് ചാന്സലര്മാര് പങ്കെടുത്തതിനെതിരെ രംഗത്തുവന്ന മുഖ്യമന്ത്രി വി.ഡി. സതീശനെതിരെ കടുത്ത വിമര്ശനവുമായി ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. വിസികള്ക്ക് മതനിരപേക്ഷതയെക്കുറിച്ച് ക്ലാസെടുക്കാന് ശ്രമിക്കുന്ന മുഖ്യമന്ത്രിയുടെ നിലപാട് തികഞ്ഞ രാഷ്ട്രീയ കാപട്യമാണെന്ന് അദ്ദേഹം കുറ്റപ്പെടുത്തി.
ജമാഅത്തെ ഇസ്ലാമിയുടെയും എസ്ഡിപിഐയുടെയും പിന്തുണയോടെയാണ് സ്വന്തം സര്ക്കാര് അധികാരത്തിലെത്തിയതെന്ന സത്യം മുഖ്യമന്ത്രി സൗകര്യപൂര്വ്വം മറക്കുകയാണ്. ഇന്ത്യയെ ഒരു മതരാഷ്ട്രമാക്കണമെന്ന് പരസ്യമായി ആവശ്യപ്പെടുകയും ഭരണഘടനയെ വെല്ലുവിളിക്കുകയും ചെയ്യുന്ന ശക്തികളുമായി രാഷ്ട്രീയ സഹവര്ത്തിത്വം പുലര്ത്തുന്നവര്ക്ക് മതനിരപേക്ഷതയെക്കുറിച്ച് സംസാരിക്കാന് യാതൊരു ധാര്മ്മിക അവകാശവുമില്ലെന്ന് ബിജെപി സംസ്ഥാന അധ്യക്ഷന് പറഞ്ഞു.
ദേശീയ ഐക്യവും രാജ്യസ്നേഹവും ഉയര്ത്തിപ്പിടിക്കുന്ന ആര്എസ്എസ് പോലുള്ള പ്രസ്ഥാനങ്ങളെ ആക്രമിക്കുന്ന മുഖ്യമന്ത്രി, മറുഭാഗത്ത് മതത്തിന്റെ പേരില് രാഷ്ട്രീയം പറയുന്നവരുമായി അധികാരം പങ്കിടുകയാണെന്ന് രാജീവ് ചന്ദ്രശേഖര് ആരോപിച്ചു. ‘മതം തന്നെയാണ് ഞങ്ങള്ക്ക് പ്രധാനം’ എന്ന് പരസ്യമായി പ്രഖ്യാപിക്കുന്ന മന്ത്രിമാര് ഉള്പ്പെട്ട മന്ത്രിസഭയുടെ നായകനാണ് ഇപ്പോള് മതനിരപേക്ഷതയുടെ വക്താവാകാന് ശ്രമിക്കുന്നത്.
കേരളത്തിലെ സര്വകലാശാലകള് രാഷ്ട്രീയ നിയന്ത്രണങ്ങളില് നിന്ന് മാറി പ്രവര്ത്തിക്കേണ്ടവയാണ്. ദേശീയ വിഷയങ്ങളില് ചര്ച്ചകളില് പങ്കെടുക്കാന് അക്കാദമിക് സമൂഹത്തിന് അവകാശമുണ്ട്. എന്നാല് ഒരു ദേശീയ പ്രസ്ഥാനവുമായി വേദി പങ്കിട്ടതിന്റെ പേരില് വൈസ് ചാന്സലര്മാരെ വിചാരണ ചെയ്യാന് ശ്രമിക്കുന്നത് ജനാധിപത്യ ബോധമല്ല, മറിച്ച് രാഷ്ട്രീയ അസഹിഷ്ണുത മാത്രമാണെന്നും അദ്ദേഹം പറഞ്ഞു.
ശബരിമലയിലെ സ്വര്ണ്ണപ്പാളി മോഷണം ഉള്പ്പെടെ സംസ്ഥാന സര്ക്കാരിനെ കടുത്ത പ്രതിരോധത്തിലാക്കുന്ന ഒട്ടനവധി ഗുരുതരമായ വിഷയങ്ങള് നിലവിലുണ്ട്. ഇതില് നിന്നും ജനങ്ങളുടെ ശ്രദ്ധ തിരിച്ചുവിടാനാണ് ആര്എസ്എസിനെയും വൈസ് ചാന്സലര്മാരെയും ചുറ്റിപ്പറ്റി അനാവശ്യ വിവാദങ്ങള് സൃഷ്ടിക്കുന്നത്. സര്ക്കാരിന്റെ വീഴ്ചകളും ജനങ്ങളുടെ ചോദ്യങ്ങളും മറച്ചുവെക്കാനുള്ള രാഷ്ട്രീയ നാടകമായാണ് കേരളം ഇതിനെ കാണുന്നതെന്നും അദ്ദേഹം കൂട്ടിച്ചേര്ത്തു.
വോട്ട് ബാങ്ക് രാഷ്ട്രീയത്തിന്റെയും പ്രീണനത്തിന്റെയും കാര്യത്തില് കോണ്ഗ്രസും സിപിഎമ്മും രണ്ടല്ല ഒന്നാണ് എന്ന് കേരള ജനത തിരിച്ചറിഞ്ഞു കഴിഞ്ഞു. തീവ്രവാദ ആശയധാരകളെ മുഖ്യധാരയിലേക്ക് കൊണ്ടുവരുന്ന അപകടകരമായ നിലപാടിലേക്കാണ് ഇരു കൂട്ടരും നീങ്ങുന്നത്. ‘രണ്ടല്ല ഒന്നാണ്’ എന്ന ഈ യാഥാര്ത്ഥ്യം സമീപകാല തദ്ദേശ സ്വയംഭരണ തിരഞ്ഞെടുപ്പുകളിലും നിയമസഭാ തിരഞ്ഞെടുപ്പിലും പ്രതിഫലിച്ചതാണെന്ന് രാജീവ് ചന്ദ്രശേഖര് ചൂണ്ടിക്കാട്ടി.
മുഖ്യമന്ത്രി യാഥാര്ത്ഥ്യങ്ങള് നിഷേധിക്കാന് ശ്രമിച്ചാലും മലയാളികള് ഇന്ന് തങ്ങളുടെ ദേശീയബോധം തുറന്നുപ്രകടിപ്പിക്കാന് മടിക്കുന്നില്ല. രാജ്യത്തിന് പ്രഥമ പരിഗണന നല്കുന്ന നേതൃത്വത്തിനും ദേശീയ താല്പര്യങ്ങള്ക്കും ഒപ്പമാണ് കേരളത്തിലെ പുതുതലമുറ നിലകൊള്ളുന്നത്. കേരളത്തിന്റെ രാഷ്ട്രീയ ചിന്തകളില് സംഭവിച്ചുകൊണ്ടിരിക്കുന്ന ഈ മാറ്റം ഒരു തുടക്കം മാത്രമാണെന്നും വരും ദിവസങ്ങളില് അത് കൂടുതല് ശക്തമായി പ്രതിഫലിക്കുമെന്നും രാജീവ് ചന്ദ്രശേഖര് വ്യക്തമാക്കി.
