ഭുവനേശ്വര്‍: രാഷ്ട്രപതി ദ്രൗപദി മുര്‍മുവിന്റെ 68-ാം ജന്മദിനത്തോടനുബന്ധിച്ച് ഒഡീഷയിലെ മയൂര്‍ഭഞ്ച് ജില്ലയിലെ പഹാര്‍പൂരില്‍ പ്രധാനമന്ത്രി നരേന്ദ്ര മോദിയും രാഷ്‌ട്രപതിയും ചേര്‍ന്ന് പ്രത്യേക പരിപാടികളില്‍ പങ്കെടുത്തു. ജന്മനാട്ടിലെ ആഘോഷങ്ങള്‍ക്ക് സാക്ഷ്യം വഹിച്ച ഇരുവരും പ്രാദേശിക ആദിവാസി സമൂഹങ്ങളുടെ വിശുദ്ധ ആരാധനാകേന്ദ്രങ്ങളായ സാന്താലി ജഹേരയിലും ഹോ ജഹേരയിലും പ്രാര്‍ഥനകള്‍ അര്‍പ്പിച്ച് പ്രകൃതിയോടുള്ള പാരമ്പര്യ ആരാധനയില്‍ പങ്കാളികളായി.
ആദിവാസി സമൂഹങ്ങളുടെ സാമൂഹിക-വിദ്യാഭ്യാസ പുരോഗതിക്ക് ഊന്നല്‍ നല്‍കുന്ന വിപുലമായ ജനസമ്പര്‍ക്ക പരിപാടിയുടെ ഭാഗമായാണ് സന്ദര്‍ശനം സംഘടിപ്പിച്ചിരിക്കുന്നത്. നൈപുണ്യ വികസന കേന്ദ്രവും വിദ്യാഭ്യാസ സ്ഥാപനവും സന്ദര്‍ശിച്ച നേതാക്കള്‍, ഗോത്രവിഭാഗങ്ങളുടെ ശാക്തീകരണത്തിനായി നടപ്പാക്കുന്ന പദ്ധതികളുടെ പുരോഗതിയും വിലയിരുത്തി. സംസ്ഥാന സര്‍ക്കാരിന്റെ രണ്ട് വര്‍ഷത്തെ ഭരണപൂര്‍ത്തീകരണവുമായി ബന്ധപ്പെട്ട പരിപാടികള്‍ക്കും ഈ സന്ദര്‍ശനം പ്രത്യേക പ്രാധാന്യം നല്‍കുന്നു.
റായരംഗ്പൂരില്‍ നടക്കുന്ന പൊതുചടങ്ങില്‍ പ്രധാനമന്ത്രിയും രാഷ്‌ട്രപതിയും പങ്കെടുക്കും. പരിപാടിക്കിടെ ഊര്‍ജം, അടിസ്ഥാന സൗകര്യ വികസനം, ആരോഗ്യം, വിദ്യാഭ്യാസം, ജലസേചനം തുടങ്ങി വിവിധ മേഖലകളിലായി 47,000 കോടിയിലധികം രൂപയുടെ വികസന പദ്ധതികള്‍ രാജ്യത്തിന് സമര്‍പ്പിക്കുകയും പുതിയ സംരംഭങ്ങള്‍ക്ക് തുടക്കമിടുകയും ചെയ്യും. ഒഡീഷയിലെ പരിപാടികള്‍ക്ക് ശേഷം പ്രധാനമന്ത്രി പശ്ചിമ ബംഗാളിലേക്കും യാത്രതിരിക്കും.
അവിടെ പൊതുയോഗങ്ങളിലും അന്താരാഷ്‌ട്ര യോഗാ ദിനാചരണവുമായി ബന്ധപ്പെട്ട പരിപാടികളിലും അദ്ദേഹം പങ്കെടുക്കും. രാജ്യത്തിന്റെ സമഗ്ര വികസനത്തിനൊപ്പം ആദിവാസി മേഖലകളുടെ പുരോഗതിക്കും കേന്ദ്രസര്‍ക്കാര്‍ നല്‍കുന്ന മുന്‍ഗണനയുടെ പ്രതീകമായാണ് ഈ സന്ദര്‍ശനത്തെ വിലയിരുത്തുന്നത്.
