കോഴിക്കോട്: സുൽത്താൻ ബത്തേരി സ്വദേശി ഹേമചന്ദ്രനെ തട്ടിക്കൊണ്ടുപോയി കൊലപ്പെടുത്തിയ കേസിൽ ഒളിവിലായിരുന്ന ആറാം പ്രതി കണ്ണൂർ സ്വദേശിനി ലിബയെ കോഴിക്കോട് അന്താരാഷ്ട്ര വിമാനത്താവളത്തിൽ നിന്ന് പൊലീസ് പിടികൂടി. കേസിൽ നേരത്തെ ലുക്ക്ഔട്ട് നോട്ടീസ് പുറപ്പെടുവിച്ചിരുന്ന ലിബ വിദേശത്ത് നിന്ന് തിരിച്ചെത്തുന്നതിനിടെയാണ് അന്വേഷണസംഘം കസ്റ്റഡിയിലെടുത്തത്.
ഹേമചന്ദ്രനെ ഹണിട്രാപ്പിൽ കുടുക്കി മുഖ്യപ്രതികളുടെ അടുത്തെത്തിക്കുന്നതിൽ ലിബയ്ക്ക് നിർണായക പങ്കുണ്ടായിരുന്നുവെന്നാണ് പൊലീസ് അന്വേഷണത്തിൽ കണ്ടെത്തിയത്. വിശ്വാസം നേടിയ ശേഷം സാമ്പത്തിക നേട്ടം ലക്ഷ്യമിട്ട് ഹേമചന്ദ്രനെ പ്രതികൾ ഒരുക്കിയ കെണിയിലേക്ക് എത്തിച്ചതായാണ് അന്വേഷണസംഘത്തിന്റെ കണ്ടെത്തൽ.
സുൽത്താൻ ബത്തേരി സ്വദേശിയും ചിട്ടി നടത്തിപ്പുകാരനുമായ ഹേമചന്ദ്രനെ 2024 മാർച്ചിലാണ് ദുരൂഹ സാഹചര്യത്തിൽ കാണാതാകുന്നത്. ആദ്യം ആളെ കാണാതായെന്ന പരാതിയിലായിരുന്നു അന്വേഷണം ആരംഭിച്ചത്. എന്നാൽ പിന്നീട് സാമ്പത്തിക ഇടപാടുകളും ഫോൺ രേഖകളും കേന്ദ്രീകരിച്ചുള്ള അന്വേഷണത്തിലാണ് ഇത് ആസൂത്രിത കൊലപാതകമാണെന്ന നിഗമനത്തിലേക്ക് പൊലീസ് എത്തിയത്.
അന്വേഷണത്തിനിടെ മുഖ്യപ്രതികളെ പൊലീസ് അറസ്റ്റ് ചെയ്തിരുന്നു. ഇവരെ ചോദ്യം ചെയ്തതിന്റെ അടിസ്ഥാനത്തിൽ തമിഴ്നാട്ടിലെ ചേരമ്പാടി വനമേഖലയിൽ കുഴിച്ചുമൂടിയ നിലയിൽ ഹേമചന്ദ്രന്റെ മൃതദേഹം കണ്ടെത്തുകയായിരുന്നു. കൊലപാതകത്തിന് ശേഷം തെളിവ് നശിപ്പിക്കുന്നതിനായാണ് മൃതദേഹം കേരള–തമിഴ്നാട് അതിർത്തിയിലെ വനപ്രദേശത്ത് മറവ് ചെയ്തതെന്ന് അന്വേഷണസംഘം കണ്ടെത്തി.
കേസിൽ ലിബയുടെ പങ്ക് വ്യക്തമായതോടെ ഇവർക്കെതിരെ പൊലീസ് ലുക്ക്ഔട്ട് നോട്ടീസ് പുറപ്പെടുവിച്ചിരുന്നു. തുടർന്ന് വിദേശത്തേക്ക് കടന്ന പ്രതിയെ കണ്ടെത്താൻ വിവിധ ഏജൻസികളുടെ സഹായവും അന്വേഷണസംഘം തേടി. ഒടുവിൽ കോഴിക്കോട് വിമാനത്താവളത്തിലെ ഇമിഗ്രേഷൻ പരിശോധനയ്ക്കിടെയാണ് ലിബ പിടിയിലായത്.
ലിബയെ വിശദമായി ചോദ്യം ചെയ്ത് ഗൂഢാലോചനയിൽ ഉൾപ്പെട്ട മറ്റുള്ളവരുടെ പങ്ക്, സാമ്പത്തിക ഇടപാടുകളുടെ വിശദാംശങ്ങൾ, ഹണിട്രാപ്പ് ആസൂത്രണം ചെയ്ത രീതി എന്നിവ സംബന്ധിച്ച കൂടുതൽ വിവരങ്ങൾ ശേഖരിക്കാനാണ് അന്വേഷണസംഘത്തിന്റെ നീക്കം.
