കോഴിക്കോട്: കോഴിക്കോട് വെള്ളിമാടുകുന്ന് സര്ക്കാര് ജുവനൈല് ഹോമിലെ അന്തേവാസിയായിരുന്ന 12 വയസ്സുകാരനെ ലൈംഗികമായി പീഡിപ്പിച്ചെന്ന കേസില് സ്ഥാപനത്തിലെ കെയര്ടേക്കറെ ചേവായൂര് പൊലീസ് അറസ്റ്റ് ചെയ്തു. മൂഴിക്കല് ചെലവൂര് പാറങ്ങോട്ട് വീട്ടില് പി. അയൂബ് (58) ആണ് പോക്സോ നിയമപ്രകാരം അറസ്റ്റിലായത്.
കേസെടുത്തതിന് പിന്നാലെ ഒളിവില് പോയ പ്രതിക്കായി പൊലീസ് അന്വേഷണം ശക്തമാക്കിയിരുന്നു. തുടര്ന്ന് പ്രതി കോടതിയില് കീഴടങ്ങുകയായിരുന്നു. പിന്നീട് പൊലീസ് അറസ്റ്റ് രേഖപ്പെടുത്തി കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
ജുവനൈല് ഹോമില് കഴിയുകയായിരുന്ന 12 വയസ്സുകാരനെ സ്ഥാപനത്തിനുള്ളില്വെച്ച് പലതവണ ലൈംഗികമായി പീഡിപ്പിച്ചെന്നാണ് കേസ്. സംഭവത്തില് മറ്റ് അന്തേവാസികളും സമാന പീഡനത്തിന് ഇരയായിട്ടുണ്ടോയെന്ന് പൊലീസ് വിശദമായി അന്വേഷിച്ചുവരികയാണ്. കേസില് കൂടുതല് വിവരങ്ങള് ശേഖരിച്ച് അന്വേഷണം പുരോഗമിക്കുകയാണെന്ന് ചേവായൂര് പൊലീസ് അറിയിച്ചു.
