ന്യൂഡല്ഹി: ഇന്ത്യന് കരസേനയുടെ 31-ാമത് മേധാവിയായി ചുമതലയേറ്റ ജനറല് ധീരജ് സേത്ത്, മാറിവരുന്ന സുരക്ഷാ വെല്ലുവിളികളെ നേരിടാന് സേനയുടെ ആധുനികവല്ക്കരണം വേഗത്തിലാക്കുമെന്ന് വ്യക്തമാക്കി. ചുമതലയേറ്റതിന് പിന്നാലെ മാധ്യമങ്ങളോട് സംസാരിക്കുകയായിരുന്നു അദ്ദേഹം. സാങ്കേതികവിദ്യയുടെ കരുത്തില് പ്രവര്ത്തിക്കുന്ന, ഭാവിയിലെ വെല്ലുവിളികളെ നേരിടാന് പൂര്ണ സജ്ജമായ സേനയെ വാര്ത്തെടുക്കുകയാണ് ലക്ഷ്യമെന്ന് ജനറല് ധീരജ് സേത്ത് പറഞ്ഞു.
വിവിധ യുദ്ധമേഖലകളില് ഒരേസമയം കാര്യക്ഷമമായി പ്രവര്ത്തിക്കാന് ശേഷിയുള്ള, സാങ്കേതിക മികവാര്ന്ന കരസേനയെയാണ് ഇന്ത്യ ലക്ഷ്യമിടുന്നതെന്നും അദ്ദേഹം വ്യക്തമാക്കി. രാജ്യത്തിന്റെ അതിര്ത്തികളിലും ഉയര്ന്നുവരുന്ന സുരക്ഷാ ഭീഷണികളിലും നിരന്തര ജാഗ്രത പുലര്ത്തുമെന്നും, ഏത് വെല്ലുവിളിയെയും നേരിടാന് സേനയെ എല്ലായ്പ്പോഴും യുദ്ധസജ്ജമായി നിലനിര്ത്തുമെന്നും അദ്ദേഹം പറഞ്ഞു.
സേനയുടെ പ്രവര്ത്തനങ്ങളില് സാങ്കേതിക വിദ്യയ്ക്കൊപ്പം തന്ത്രപരമായ മാറ്റങ്ങള്ക്കും പ്രാധാന്യം നല്കുമെന്നും, നവീകരണവും പുതിയ ആശയങ്ങളും സേനയുടെ പ്രവര്ത്തനരീതിയുടെയും ശേഷി വികസനത്തിന്റെയും അവിഭാജ്യ ഘടകമാക്കുമെന്നും ജനറല് ധീരജ് സേത്ത് വ്യക്തമാക്കി.