ഭോപ്പാൽ: ഏകീകൃത സിവിൽ കോഡ് ബില്ലിന്റെ കരടിന് മധ്യപ്രദേശ് മന്ത്രിസഭ ഏകകണ്ഠമായി അംഗീകാരം നൽകി. ജൂലൈ 20 മുതൽ ആരംഭിക്കുന്ന നിയമസഭയുടെ മൺസൂൺ സമ്മേളനത്തിൽ ‘യൂണിഫോം സിവിൽ കോഡ് ആക്ട്, 2026’ എന്ന പേരിൽ ബിൽ അവതരിപ്പിക്കുമെന്ന് മുഖ്യമന്ത്രി മോഹൻ യാദവ് അറിയിച്ചു.
മന്ത്രിസഭാ യോഗത്തിന് ശേഷം മാധ്യമങ്ങളോട് സംസാരിക്കവെയാണ് മുഖ്യമന്ത്രി ഇക്കാര്യം അറിയിച്ചത്. ബില്ലിന് മന്ത്രിസഭയിലെ എല്ലാ അംഗങ്ങളും പൂർണ പിന്തുണ നൽകിയെന്നും സംസ്ഥാന ജനതയെ അഭിനന്ദിക്കുന്നുവെന്നും അദ്ദേഹം പറഞ്ഞു. ഇന്ത്യൻ സംസ്കാരത്തിന്റെ അടിസ്ഥാന മൂല്യങ്ങളിലൊന്നാണ് സമത്വമെന്നും അതേ കാഴ്ചപ്പാടാണ് ബില്ലിന്റെ രൂപീകരണത്തിന് അടിസ്ഥാനമായതെന്നും മോഹൻ യാദവ് വ്യക്തമാക്കി.
മന്ത്രിസഭയുടെ അംഗീകാരത്തോടെ ബിൽ ഇനി നിയമസഭയിൽ ചർച്ചയ്‌ക്കായി അവതരിപ്പിക്കും. സഭയുടെ അംഗീകാരം ലഭിച്ചാൽ തുടർ നിയമനിർമാണ നടപടികൾ പൂർത്തിയാക്കി നിയമമാക്കും.
എന്താണ് ഏകീകൃത സിവിൽ കോഡ്?
വിവാഹം, വിവാഹമോചനം, ദത്തെടുക്കൽ, അനന്തരാവകാശം, സ്വത്തുവിഭജനം തുടങ്ങിയ സിവിൽ വിഷയങ്ങളിൽ മതാടിസ്ഥാനത്തിലുള്ള വ്യത്യസ്ത വ്യക്തിനിയമങ്ങൾക്ക് പകരം എല്ലാ പൗരന്മാർക്കും ഒരേ നിയമം ബാധകമാക്കുക എന്നതാണ് ഏകീകൃത സിവിൽ കോഡിന്റെ ലക്ഷ്യം.
എല്ലാ പൗരന്മാർക്കും തുല്യ അവകാശവും ഒരേ നിയമപരമായ മാനദണ്ഡങ്ങളും ഉറപ്പാക്കുക എന്ന ഉദ്ദേശ്യത്തോടെയാണ് ബിൽ തയ്യാറാക്കിയിരിക്കുന്നതെന്ന് മധ്യപ്രദേശ് സർക്കാർ വ്യക്തമാക്കി. ഉത്തരാഖണ്ഡിന് പിന്നാലെ ഏകീകൃത സിവിൽ കോഡ് നടപ്പാക്കുന്നതിനുള്ള നടപടികളുമായി മുന്നോട്ടുപോകുന്ന പ്രധാന സംസ്ഥാനങ്ങളിലൊന്നായി മധ്യപ്രദേശും മാറുകയാണ്. ബിൽ നിയമസഭയിൽ അവതരിപ്പിച്ചതിന് ശേഷം അതിന്മേൽ വിശദമായ ചർച്ചയും നിയമനിർമാണ നടപടികളും നടക്കും.
