പാലക്കാട്: ഒറ്റപ്പാലം-ചെറുപ്പുളശേരി റോഡിന്റെ ശോചനീയാവസ്ഥ പരിഹരിക്കാത്തതില്‍ പ്രതിഷേധിച്ച് ഈ റൂട്ടില്‍ സര്‍വീസ് നടത്തുന്ന സ്വകാര്യ ബസുകള്‍ തിങ്കളാഴ്ച പണിമുടക്കും. റോഡ് നവീകരണ പ്രവര്‍ത്തനങ്ങള്‍ പാതിവഴിയില്‍ നിലച്ചതിനെ തുടര്‍ന്നാണ് ബസുടമകളുടെ സമരനടപടി. നിലവില്‍ ഈ പാതയിലൂടെ 80ഓളം സ്വകാര്യ ബസുകളാണ് സര്‍വീസ് നടത്തുന്നത്. തിങ്കളാഴ്ചത്തെ ഏകദിന പണിമുടക്ക് യാത്രക്കാരെ കാര്യമായി ബാധിക്കുമെന്നാണ് വിലയിരുത്തല്‍.
റോഡിന്റെ ദുരവസ്ഥ കാരണം ബസ് സര്‍വീസ് നടത്തുന്നത് വലിയ പ്രതിസന്ധി സൃഷ്ടിക്കുന്നതായും വാഹനങ്ങള്‍ക്ക് നിരന്തരം കേടുപാടുകള്‍ സംഭവിക്കുന്നതായും ബസുടമകള്‍ ചൂണ്ടിക്കാട്ടുന്നു. നിരവധി തവണ അധികൃതരുടെ ശ്രദ്ധയില്‍ വിഷയംപ്പെടുത്തിയിട്ടും ഫലപ്രദമായ നടപടി ഉണ്ടായില്ലെന്നാണ് ഇവരുടെ പരാതി.
തിങ്കളാഴ്ചത്തെ സമരത്തിന് ശേഷവും റോഡ് നവീകരണത്തിന് സര്‍ക്കാര്‍ അടിയന്തര നടപടി സ്വീകരിച്ചില്ലെങ്കില്‍ ഈ മാസം 27 മുതല്‍ അനിശ്ചിതകാല പണിമുടക്ക് ആരംഭിക്കുമെന്നും ബസുടമകള്‍ മുന്നറിയിപ്പ് നല്‍കി. അനിശ്ചിതകാല സമരം യാഥാര്‍ഥ്യമായാല്‍ ഒറ്റപ്പാലംചെറുപ്പുളശേരി മേഖലയിലെ ആയിരക്കണക്കിന് യാത്രക്കാരുടെ ദൈനംദിന യാത്രയെ അത് ഗുരുതരമായി ബാധിച്ചേക്കും.
