ന്യൂഡൽഹി: ഡിജിറ്റൽ ടിക്കറ്റ് ബുക്കിങ് കൂടുതൽ പ്രോത്സാഹിപ്പിക്കുന്നതിന്റെ ഭാഗമായി ‘റെയിൽ വൺ’ (Rail One) മൊബൈൽ ആപ്പ് വഴി റിസർവ് ചെയ്യാത്ത ട്രെയിൻ ടിക്കറ്റുകൾ ബുക്ക് ചെയ്യുന്ന യാത്രക്കാർക്ക് നൽകിവരുന്ന മൂന്ന് ശതമാനം നിരക്കിളവ് 2027 മാർച്ച് 31 വരെ നീട്ടിയതായി ഇന്ത്യൻ റെയിൽവേ അറിയിച്ചു.
യുപിഐ, ഡെബിറ്റ് കാർഡ്, ക്രെഡിറ്റ് കാർഡ്, നെറ്റ് ബാങ്കിങ് എന്നിവ ഉപയോഗിച്ച് പണമടച്ച് ടിക്കറ്റ് ബുക്ക് ചെയ്യുന്നവർക്ക് ഈ ആനുകൂല്യം ലഭിക്കും. സ്റ്റേഷനുകളിലെ തിരക്കും നീണ്ട ക്യൂകളും കുറയ്‌ക്കുകയും പണരഹിത ഡിജിറ്റൽ ഇടപാടുകൾ പ്രോത്സാഹിപ്പിക്കുകയുമാണ് പദ്ധതിയുടെ ലക്ഷ്യം.
ടിക്കറ്റ് ബുക്കിങ് മാത്രമല്ല, ട്രെയിനുകളുടെ വരവ്-പുറപ്പെടൽ സമയം പരിശോധിക്കാനും കോച്ചുകളിലോ സ്റ്റേഷനുകളിലോ ഉണ്ടാകുന്ന തകരാറുകൾ സംബന്ധിച്ച പരാതികൾ രജിസ്റ്റർ ചെയ്യാനും ‘റെയിൽ വൺ’ ആപ്പിലൂടെ സാധിക്കും.
അതേസമയം, ‘ആർ-വാലറ്റ്’ (R-Wallet) ഉപയോഗിച്ച് ടിക്കറ്റ് വാങ്ങുന്ന യാത്രക്കാർക്ക് ലഭിക്കുന്ന മൂന്ന് ശതമാനം ക്യാഷ്ബാക്ക് ആനുകൂല്യം 2028 ഓഗസ്റ്റ് 24 വരെ നീട്ടിയതായും റെയിൽവേ വ്യക്തമാക്കി.
