ഗ്ലാസ്‌ഗോ: കോമണ്‍വെല്‍ത്ത് ഗെയിംസിന് മുന്നോടിയായി ഇന്ത്യന്‍ സംഘത്തിന് തിരിച്ചടി. ഉത്തേജക മരുന്ന് (ഡോപ്പിങ്) പരിശോധനയില്‍ കുടുങ്ങിയതിനെ തുടര്‍ന്ന് ഇന്ത്യന്‍ ജൂഡോ താരം അരുണ്‍ കുമാറിനെ ഗ്ലാസ്‌ഗോ 2026 കോമണ്‍വെല്‍ത്ത് ഗെയിംസില്‍ നിന്ന് പുറത്താക്കി. ഗെയിംസിന് മുന്നോടിയായി നടത്തിയ പരിശോധനയിലാണ് താരത്തിന്റെ സാമ്പിളില്‍ നിരോധിത മരുന്നിന്റെ സാന്നിധ്യം കണ്ടെത്തിയത്. ഇതിനെ തുടര്‍ന്ന് ദേശീയ ഉത്തേജക മരുന്ന് വിരുദ്ധ ഏജന്‍സിയായ നാഡ നോട്ടീസ് നല്‍കിയതോടെയാണ് നടപടി.
നോട്ടീസ് ലഭിച്ചതിന് പിന്നാലെ അരുണ്‍ കുമാറിന് ഗ്ലാസ്‌ഗോ കോമണ്‍വെല്‍ത്ത് ഗെയിംസില്‍ പങ്കെടുക്കാന്‍ അര്‍ഹതയില്ലെന്ന് ഇന്റര്‍നാഷണല്‍ ജൂഡോ ഫെഡറേഷന്‍ അറിയിച്ചു. സ്‌പോര്‍ട്‌സ് എന്‍ട്രി സിസ്റ്റത്തില്‍ നിന്ന് താരത്തിന്റെ പേര് നീക്കം ചെയ്തതായും ജൂഡോ ഫെഡറേഷന്‍ ഓഫ് ഇന്ത്യ സ്ഥിരീകരിച്ചു. സമീപകാലത്ത് അന്താരാഷ്‌ട്ര തലത്തില്‍ ശ്രദ്ധേയമായ നേട്ടങ്ങള്‍ സ്വന്തമാക്കിയ താരമാണ് അരുണ്‍ കുമാര്‍. രാജസ്ഥാനിലെ രജ്പുത്താന റൈഫിള്‍സിലെ സൈനികന്‍ കൂടിയായ അദ്ദേഹം ഇന്ത്യയുടെ മെഡല്‍ പ്രതീക്ഷകളിലൊരാളായാണ് വിലയിരുത്തപ്പെട്ടിരുന്നത്.
ഇന്ന് രാത്രി 10.30ന് സ്‌കോട്ലന്‍ഡിലെ ഗ്ലാസ്‌ഗോയില്‍ കോമണ്‍വെല്‍ത്ത് ഗെയിംസിന്റെ ഉദ്ഘാടനച്ചടങ്ങ് നടക്കും. മത്സരങ്ങള്‍ വെള്ളിയാഴ്ച ആരംഭിക്കും. ഗ്ലാസ്‌ഗോയിലെ ഹൈഡ്രോ സ്റ്റേഡിയമാണ് പ്രധാന വേദി. ഗാബോണും ടോഗോയും ഉള്‍പ്പെടെ 74 രാജ്യങ്ങളാണ് ഇത്തവണ ഗെയിംസില്‍ പങ്കെടുക്കുന്നത്.
