തൊടുപുഴ: കനത്ത മഴയെ തുടര്ന്ന് ഇടുക്കി ജില്ലയില് തൊടുപുഴയ്ക്ക് സമീപം രണ്ടിടത്ത് ഉരുള്പൊട്ടി. മുട്ടം ചള്ളാവയലിലും അടൂര് മലയിലുമാണ് ഉരുള്പൊട്ടിയതെന്നാണ് പ്രാഥമിക വിവരം. ചള്ളാവയല് മേഖലയില് വെള്ളം പൊങ്ങി നിരവധി വീടുകളില് വെള്ളം കയറിയതോടെ പ്രദേശവാസികള് ദുരിതത്തിലായി. ചില വീടുകളിലുള്ളവര് വെള്ളക്കെട്ടില് കുടുങ്ങിയതായും റിപ്പോര്ട്ടുണ്ട്. അടൂര് മലയില് ശക്തമായ മലവെള്ളപ്പാച്ചിലും അനുഭവപ്പെട്ടു.
ഇതിനുപുറമെ കരിങ്കുന്നം നെല്ലാപ്പാറയില് രണ്ടിടത്ത് മണ്ണിടിച്ചിലും ഉണ്ടായി. നിലവില് ആളപായമോ ഗുരുതര നാശനഷ്ടങ്ങളോ റിപ്പോര്ട്ട് ചെയ്തിട്ടില്ലെങ്കിലും സ്ഥിതിഗതികള് അധികൃതര് നിരീക്ഷിച്ചുവരികയാണ്. വെള്ളിയാഴ്ച രാത്രി മുതല് ആരംഭിച്ച ശക്തമായ മഴ ശനിയാഴ്ച രാവിലെയും തുടരുകയാണ്. മഴയുടെ തീവ്രത കണക്കിലെടുത്ത് ജനങ്ങള് അതീവ ജാഗ്രത പാലിക്കണമെന്നും മലയോര മേഖലകളിലേക്കുള്ള അനാവശ്യ യാത്രകള് ഒഴിവാക്കണമെന്നും അധികൃതര് നിര്ദേശിച്ചു.