പാലക്കാട്: കേരള-തമിഴ്നാട് അതിർത്തിയായ വാളയാറിൽ ട്രെയിൻ ഇടിച്ച് പിടിയാനയും കുട്ടിയാനയും ചരിഞ്ഞു. ചാവടിപ്പാറ പുതുപ്പതിയിൽ റെയിൽവേ ട്രാക്ക് മുറിച്ചുകടക്കുന്നതിനിടെയാണ് അപകടം.
അർധരാത്രി 12.30ഓടെയാണ് പുതുപ്പതി റെയിൽവേ ട്രാക്കിൽ അപകടമുണ്ടായത്. മംഗളൂരു-ചെന്നൈ എക്സ്പ്രസ് ട്രെയിനാണ് ആനകളെ ഇടിച്ചത്. ഇടിയുടെ ആഘാതത്തിൽ പിടിയാനയും കുട്ടിയാനയും സംഭവസ്ഥലത്തുവെച്ചുതന്നെ ചരിഞ്ഞു.
അപകടത്തെ തുടർന്ന് ട്രെയിൻ വനമേഖലയിൽ 20 മിനിറ്റോളം നിർത്തിയിട്ടു. വിവരമറിഞ്ഞ് കേരളത്തിലെയും തമിഴ്നാട്ടിലെയും വനംവകുപ്പ് ഉദ്യോഗസ്ഥർ സ്ഥലത്തെത്തി. സംഭവത്തിൽ തുടർനടപടികൾ പുരോഗമിക്കുകയാണ്.
