ഗാള്: ശ്രീലങ്കയ്ക്കെതിരായ ഒന്നാം ക്രിക്കറ്റ് ടെസ്റ്റില് ഇന്ത്യയ്ക്ക് മികച്ച തുടക്കം. മഴയെ തുടര്ന്ന് തടസപ്പെട്ട മത്സരത്തില് കെ.എല്. രാഹുലും ദേവ്ദത്ത് പടിക്കലും അര്ധസെഞ്ചുറി നേടി. ഒടുവില് വിവരം ലഭിക്കുമ്പോള് ഒരു വിക്കറ്റ് നഷ്ടത്തില് 149 റണ്സെന്ന നിലയിലാണ് ഇന്ത്യ. ആദ്യം അര്ധസെഞ്ചുറി പൂര്ത്തിയാക്കിയത് ദേവ്ദത്ത് പടിക്കലാണ്. 81 പന്തില് നാല് ഫോറും ഒരു സിക്സും സഹിതം 50 റണ്സ് നേടിയ താരം പിന്നീട് ഇന്നിങ്സ് മുന്നോട്ടുകൊണ്ടുപോയി. ഗാലെയില് ദേവ്ദത്ത് 64 റണ്സുമായി ക്രീസിലുണ്ട്. ടെസ്റ്റ് കരിയറിലെ രണ്ടാം അര്ധസെഞ്ചുറിയാണ് താരം സ്വന്തമാക്കിയത്.
തൊട്ടുപിന്നാലെ കെ.എല്. രാഹുലും അര്ധസെഞ്ചുറി പിന്നിട്ടു. 127 പന്തുകള് നേരിട്ട രാഹുല് അഞ്ച് ഫോറും ഒരു സിക്സും സഹിതം 50 റണ്സിലാണ് അര്ധസെഞ്ചുറി പൂര്ത്തിയാക്കിയത്. അനാവശ്യ റിസ്കുകളെടുക്കാതെ ശ്രദ്ധയോടെയാണ് താരം ഇന്നിങ്സ് കെട്ടിപ്പടുത്തത്. ടെസ്റ്റ് കരിയറിലെ 13-ാം അര്ധസെഞ്ചുറിയാണ് രാഹുലിന്റേത്. ഉച്ചഭക്ഷണത്തിന് പിരിഞ്ഞതിന് പിന്നാലെയാണ് ഗാലെയില് മഴയെത്തിയത്.
ഇതോടെ മത്സരം താല്ക്കാലികമായി നിര്ത്തിവെക്കുകയായിരുന്നു. മഴ മാറിയതോടെ കളി പുനരാരംഭിക്കുകയും ഇന്ത്യന് ബാറ്റര്മാര് അര്ധസെഞ്ചുറികളുമായി മുന്നേറുകയും ചെയ്തു. ലഞ്ചിന് പിരിയുമ്പോള് ഒരു വിക്കറ്റ് നഷ്ടത്തില് 101 റണ്സെന്ന നിലയിലായിരുന്നു ഇന്ത്യ. പിന്നീട് രാഹുലും പടിക്കലും ചേര്ന്ന് സ്കോര് ഉയര്ത്തുകയായിരുന്നു. ടോസ് നേടിയ ഇന്ത്യന് ക്യാപ്റ്റന് ശുഭ്മന് ഗില് ബാറ്റിങ് തിരഞ്ഞെടുക്കുകയായിരുന്നു. ഇന്ത്യയുടെ 600-ാം ടെസ്റ്റ് മത്സരമാണിത് എന്ന പ്രത്യേകതയും ഗാലെ ടെസ്റ്റിനുണ്ട്.
ഇംഗ്ലണ്ടിനും ഓസ്ട്രേലിയക്കും ശേഷം 600 ടെസ്റ്റ് മത്സരങ്ങള് കളിക്കുന്ന മൂന്നാമത്തെ ടീമെന്ന ചരിത്രനേട്ടവും ഇന്ത്യ സ്വന്തമാക്കി. രാജ്യത്തിന്റെ 80-ാം സ്വാതന്ത്ര്യദിനത്തില് നടന്ന ചരിത്ര ടെസ്റ്റില് മികച്ച ബാറ്റിങ് പ്രകടനത്തോടെ ഇന്ത്യ മുന്നേറുകയാണ്.
