സിഡ്നി: ബംഗ്ലാദേശിനെതിരായ ഒന്നാം ടെസ്റ്റിലെ അപ്രതീക്ഷിത തോല്വിക്ക് പിന്നാലെ ഓസ്ട്രേലിയന് ടീമില് വലിയ അഴിച്ചുപണി പ്രതീക്ഷിച്ചിരുന്നെങ്കിലും രണ്ടാം ടെസ്റ്റിനുള്ള ടീമില് വരുത്തിയത് ഒരേയൊരു മാറ്റം മാത്രം. ഓപ്പണര് ജാക്ക് വെതറാള്ഡിനെ ഒഴിവാക്കി ഇടംകൈയന് ബാറ്റര് മാത്യു റെന്ഷോയെ ടീമില് ഉള്പ്പെടുത്തി.
ഒന്നാം ടെസ്റ്റില് 198 റണ്സിന് ഓള്ഔട്ടായ ഓസ്ട്രേലിയക്കായി വെതറാള്ഡ് രണ്ട് ഇന്നിങ്സുകളിലുമായി 23, 0 എന്നിങ്ങനെയാണ് സ്കോര് ചെയ്തത്. യുവതാരങ്ങള്ക്ക് കൂടുതല് അവസരം നല്കണമെന്ന മുന് താരങ്ങളുടെയും ക്രിക്കറ്റ് ഇതിഹാസങ്ങളുടെയും ആവശ്യം ശക്തമായിരുന്നെങ്കിലും, ടീമില് നിന്ന് പുറത്തായത് വെതറാള്ഡ് മാത്രമാണ്.
2023ല് ഡല്ഹിയില് അരങ്ങേറിയ ടെസ്റ്റിന് ശേഷം മൂന്ന് വര്ഷമായി റെന്ഷോ ഓസ്ട്രേലിയന് ടീമിന് പുറത്തായിരുന്നു. ഡേവിഡ് വാര്ണറിന് പകരക്കാരനായി കണ്കഷന് സബ്സ്റ്റിറ്റിയൂട്ടായാണ് താരം അവസാനമായി ടെസ്റ്റ് കളിച്ചത്. അപ്രതീക്ഷിതമായാണ് രണ്ടാം ടെസ്റ്റിനുള്ള ടീമിലേക്ക് റെന്ഷോയ്ക്ക് വിളിയെത്തിയത്.
അതേസമയം, ഒന്നാം ടെസ്റ്റില് പ്രതീക്ഷയ്ക്കൊത്ത് ഉയരാതിരുന്ന മാര്നസ് ലബുഷെയ്നെ ടീമില് നിലനിര്ത്തി. ആദ്യ ടെസ്റ്റിന്റെ രണ്ടാം ഇന്നിങ്സില് 31 റണ്സ് നേടിയെങ്കിലും താരത്തില് നിന്ന് കൂടുതല് മികച്ച പ്രകടനം പ്രതീക്ഷിക്കുന്നതായി പരിശീലകന് ആന്ഡ്രു മക്ഡൊണാള്ഡ് വ്യക്തമാക്കി. വിക്കറ്റ് കീപ്പര് ബാറ്റര് ജോഷ് ഇംഗ്ലിസും പേസര് സ്കോട്ട് ബോളണ്ടും റിസര്വ് ഓപ്ഷനുകളായി ടീമിലുണ്ട്.
ആഗസ്റ്റ് 22നാണ് പരമ്പരയിലെ രണ്ടാം ടെസ്റ്റ് ആരംഭിക്കുന്നത്. രണ്ട് മത്സരങ്ങളുള്ള പരമ്പരയില് സമനില നേടിയാല് തന്നെ ബംഗ്ലാദേശിന് ഓസ്ട്രേലിയന് മണ്ണിലെ ആദ്യ ടെസ്റ്റ് പരമ്പര സ്വന്തമാക്കാനാകും. അതിനാല് പരമ്പര കൈവിടാതിരിക്കാന് രണ്ടാം ടെസ്റ്റില് ഓസ്ട്രേലിയക്ക് ജയം അനിവാര്യമാണ്.
