കൊല്ക്കത്ത: ജംഷഡ്പൂര് എഫ്സിക്കെതിരായ ആവേശകരമായ ക്വാര്ട്ടര് ഫൈനലില് പെനാല്റ്റി ഷൂട്ടൗട്ടില് 9-8ന്റെ ത്രസിപ്പിക്കുന്ന വിജയം സ്വന്തമാക്കി മോഹന് ബഗാന് സൂപ്പര് ജയന്റ് ഡ്യൂറന്ഡ് കപ്പിന്റെ സെമിഫൈനലില്. വിവേകാനന്ദ യുബ ഭാരതി ക്രീരംഗനില് നടന്ന മത്സരത്തില് നിശ്ചിത സമയത്ത് ഇരുടീമുകളും 1-1ന് സമനില പാലിച്ചതോടെയാണ് വിജയികളെ കണ്ടെത്താന് ഷൂട്ടൗട്ട് വേണ്ടിവന്നത്. മത്സരം തുടങ്ങി രണ്ടാം മിനിറ്റില് തന്നെ സാഹല് അബ്ദുല് സമദിലൂടെ മോഹന് ബഗാന് മുന്നിലെത്തി. മധ്യനിരയിലെ ജംഷഡ്പൂര് താരത്തിന്റെ പിഴവില് ലഭിച്ച പന്തുമായി ബോക്സിലേക്ക് കുതിച്ച സാഹല് ശാന്തമായി പന്ത് വലയിലെത്തിക്കുകയായിരുന്നു.
ആദ്യ ഘട്ടത്തില് മോഹന് ബഗാന് മികച്ച ആധിപത്യം പുലര്ത്തിയെങ്കിലും ജംഷഡ്പൂര് പതിയെ മത്സരത്തിലേക്ക് തിരിച്ചെത്തി. 17-ാം മിനിറ്റില് അമന് സി.കെ.ക്ക് ലഭിച്ച മികച്ച അവസരം മോഹന് ബഗാന് ഗോള്കീപ്പര് വിശാല് കൈത്ത് രക്ഷപ്പെടുത്തി. സെറ്റ് പീസുകളിലൂടെയും ജംഷഡ്പൂര് നിരന്തരം ഭീഷണി ഉയര്ത്തി. മോഹന് ബഗാന് ലീഡ് ഉയര്ത്താനുള്ള അവസരങ്ങള് ലഭിച്ചെങ്കിലും ഡേജാന് ഡ്രാസിച്ചിന് ലഭിച്ച അവസരങ്ങള് മുതലാക്കാനായില്ല. ഇതിനിടെ ആദ്യ പകുതി അവസാനിക്കുന്നതിന് തൊട്ടുമുമ്പ് ജംഷഡ്പൂര് സമനില പിടിച്ചു.
രശിത്ഹോയ് മീറ്റെയുടെ ദൂരെയുള്ള ഷോട്ട് കൈത്തിന് പൂര്ണമായി നിയന്ത്രിക്കാനാകാതെ വന്നപ്പോള് റീബൗണ്ടില് ദേവേന്ദ്ര മുര്ഗോങ്കര്ഗര് പന്ത് വലയിലെത്തിക്കുകയായിരുന്നു. രണ്ടാം പകുതിയില് ഇരുടീമുകളും വിജയഗോളിനായി ആക്രമണം ശക്തമാക്കി. 63-ാം മിനിറ്റില് ജംഷഡ്പൂര് ഗോള്കീപ്പര് അല്ബിനോ ഗോമസ് പുറത്തേക്ക് വന്ന് പന്ത് ക്ലിയര് ചെയ്യുന്നതില് പരാജയപ്പെട്ടതോടെ സാഹലിന് മികച്ച അവസരം ലഭിച്ചു. എന്നാല് ലിസ്റ്റണ് കൊളാക്കോയ്ക്ക് നല്കിയ പാസ് മുതലാക്കാനായില്ല. 90 മിനിറ്റിനുശേഷവും സ്കോര് 1-1ല് തുടര്ന്നതോടെയാണ് മത്സരം പെനാല്റ്റി ഷൂട്ടൗട്ടിലേക്ക് നീങ്ങിയത്. ഷൂട്ടൗട്ടിന്റെ ആദ്യ 16 കിക്കുകളും വിജയകരമായതോടെ മത്സരം സഡന് ഡെത്തിലേക്ക് കടന്നു.
ഒടുവില് ജംഷഡ്പൂരിന്റെ ലോംസാങ്സുവാലയുടെ കിക്ക് വിശാല് കൈത്ത് രക്ഷപ്പെടുത്തിയതോടെ മോഹന് ബഗാന് മുന്തൂക്കം ലഭിച്ചു. തുടര്ന്ന് കിക്കെടുക്കാനെത്തിയ ടെക്ചാം അഭിഷേക് സിങ് സമ്മര്ദത്തെ അതിജീവിച്ച് പന്ത് വലയിലെത്തിച്ചതോടെ മോഹന് ബഗാന് 9-8ന്റെ തകര്പ്പന് വിജയത്തോടെ സെമിഫൈനല് ഉറപ്പിച്ചു. ഓഗസ്റ്റ് 20ന് ഷില്ലോങ്ങിലെ ജവഹര്ലാല് നെഹ്റു സ്റ്റേഡിയത്തില് നടക്കുന്ന സെമിഫൈനലില് ഷില്ലോങ് ലജോങ് എഫ്സിനോര്ത്ത് ഈസ്റ്റ് യുണൈറ്റഡ് എഫ്സി ക്വാര്ട്ടര് ഫൈനല് വിജയിയെയാണ് മോഹന് ബഗാന് നേരിടുക.
