ഹൈദരബാദ്: തെലങ്കാനയിലെ നൽഗൊണ്ടയിൽ സ്കൂൾ പ്രിൻസിപ്പലിനെ വീട്ടിൽ കയറി കൊലപ്പെടുത്തിയ കേസിൽ പത്താം ക്ലാസ് വിദ്യാർത്ഥികളായ രണ്ട് പേർ അറസ്റ്റിൽ. കൊണ്ടമല്ലേപ്പള്ളിയിലെ വീട്ടിൽ സ്കൂൾ പ്രിൻസിപ്പൽ കല്ലു രൂപ റെഡ്ഡിയെയാണ് വിദ്യാർത്ഥികൾ കൊലപ്പെടുത്തിയത്. പണവും മൊബൈൽ ഫോണും കവർന്ന ശേഷം രക്ഷപ്പെടുകയായിരുന്നു. 27 മുറിവുകളാണ് പ്രിൻസിപ്പലിന്റെ ശരീരത്തിലുണ്ടായിരുന്നത്.
രൂപ റെഡ്ഡി വിദ്യാർത്ഥികളുടെ അമിത ചെലവഴിക്കലിനെ ചോദ്യം ചെയ്യുകയും മാതാപിതാക്കളെ വിവരമറിയിക്കുമെന്ന് മുന്നറിയിപ്പ് നൽകുകയും ചെയ്തതാണ് കൊലപാതകത്തിന് പിന്നിലെ വൈരാഗ്യത്തിന് കാരണമെന്നാണ് പോലീസിന്റെ കണ്ടെത്തൽ.
അവസാന വാക്ക് ‘ബാബു’; അന്വേഷണത്തിൽ നിർണായക വഴിത്തിരിവ്
പ്രിൻസിപ്പലിന്റെ അവസാന ഫോൺ സംഭാഷണത്തിലെ ഒരു വാക്കാണ് അന്വേഷണത്തിൽ നിർണായകമായത്. ഫോൺ സ്വിച്ച് ഓഫ് ചെയ്യുന്നതിന് മുമ്പ് രൂപ റെഡ്ഡി അമ്മായിയുമായി സംസാരിച്ചിരുന്നു. സംഭാഷണത്തിനിടെ പറഞ്ഞ അവസാന വാക്ക് ‘ബാബു’ എന്നായിരുന്നു.
സ്കൂളിലെ വിദ്യാർത്ഥികളെ പൊതുവെ ‘ബാബു’ എന്നാണ് വിളിച്ചിരുന്നതെന്ന് അന്വേഷണത്തിൽ വ്യക്തമായി. ഇതോടെ വിദ്യാർത്ഥികളിലേക്കായി പോലീസിന്റെ അന്വേഷണം നീങ്ങി. ആദ്യം 13 വിദ്യാർത്ഥികളെ സംശയ പട്ടികയിൽ ഉൾപ്പെടുത്തി. ഇതിൽ അഞ്ച് പേരെ വിശദമായി ചോദ്യം ചെയ്തതിന് പിന്നാലെയാണ് അമിതമായി പണം ചെലവഴിച്ചിരുന്ന രണ്ട് പത്താം ക്ലാസ് വിദ്യാർത്ഥികളിലേക്ക് അന്വേഷണം എത്തിയത്.
വിലകൂടിയ ഫോൺ, ബൈക്ക്; ആഡംബര ജീവിതത്തോട് താൽപര്യം
ഒരേ ഹോസ്റ്റൽ മുറിയിൽ താമസിച്ചിരുന്ന വിദ്യാർത്ഥികൾക്ക് വിലകൂടിയ മൊബൈൽ ഫോണുകളോടും മോട്ടോർസൈക്കിളുകളോടും ആഡംബര ജീവിതത്തോടും വലിയ താൽപര്യമുണ്ടായിരുന്നുവെന്നാണ് പോലീസ് പറയുന്നത്. എളുപ്പത്തിൽ പണം സമ്പാദിക്കാനുള്ള മാർഗങ്ങൾ കണ്ടെത്താൻ സമൂഹമാധ്യമങ്ങളിലും യൂട്യൂബിലും ഇവർ തിരച്ചിൽ നടത്തിയിരുന്നതായും അന്വേഷണത്തിൽ കണ്ടെത്തി.
ഹോസ്റ്റൽ ബാഗിൽ നിന്ന് ഒരു ഫോണും പണവും രൂപ റെഡ്ഡി കണ്ടെത്തിയിരുന്നു. ഇതിനെ തുടർന്ന് വിദ്യാർത്ഥികളെ ശകാരിക്കുകയും വിവരം മാതാപിതാക്കളെ അറിയിക്കുമെന്ന് മുന്നറിയിപ്പ് നൽകുകയും ചെയ്തു. ഇതിലുള്ള വൈരാഗ്യമാണ് കൊലപാതകത്തിലേക്ക് നയിച്ചതെന്നാണ് പോലീസിന്റെ നിഗമനം.
ഒരാഴ്ചയോളം നിരീക്ഷണം
കൊലപാതകത്തിന് മുമ്പ് ഒരാഴ്ചയോളം വിദ്യാർത്ഥികൾ രൂപ റെഡ്ഡിയുടെ വീട് നിരീക്ഷിച്ചിരുന്നതായും പോലീസ് കണ്ടെത്തി. സംഭവദിവസം കൊണ്ടമല്ലേപ്പള്ളിയിൽ വച്ച് വസ്ത്രം മാറിയ ശേഷം കത്തിയും കൈയുറകളും വാങ്ങിയെന്നാണ് അന്വേഷണ സംഘത്തിന്റെ കണ്ടെത്തൽ.
വീടിന് മുൻവശത്ത് സിസിടിവി ക്യാമറ ഉണ്ടായിരുന്നതിനാൽ പിൻവശത്തുകൂടിയാണ് വീട്ടിൽ പ്രവേശിച്ചത്. പണം മോഷ്ടിക്കുന്നതിനിടെ രൂപ റെഡ്ഡി ഇവരെ തിരിച്ചറിഞ്ഞതോടെ കത്തി ഉപയോഗിച്ച് ആക്രമിക്കുകയായിരുന്നു.
