കൊച്ചി: കൊച്ചിയിൽ നിന്ന് കാണാതായ 13 വയസുകാരിയെ കണ്ടെത്താൻ കേരള പൊലീസ് നടത്തിയ അന്വേഷണവും രക്ഷാദൗത്യവും അതിസാഹസികമായി. ഏകദേശം 4,000 കിലോമീറ്റർ റോഡുമാർഗം സഞ്ചരിച്ച്, അതിതീവ്ര മാവോയിസ്റ്റ് ബാധിത മേഖലയിലെ ഉൾവനത്തിൽ അർധരാത്രി മിന്നൽ പരിശോധന നടത്തിയാണ് പെൺകുട്ടിയെ പൊലീസ് സുരക്ഷിതമായി കണ്ടെത്തിയത്. ഒഡിഷയിലെ ഗഞ്ചം ജില്ലയിലെ നബാഗൊച്ച എന്ന വനഗ്രാമത്തിൽ നിന്നാണ് കുട്ടിയെ കണ്ടെത്തി കേരളത്തിലേക്ക് തിരിച്ചെത്തിച്ചത്.
ഓഗസ്റ്റ് 13ന് വൈകിട്ടോടെയാണ് പെൺകുട്ടിയെ കാണാനില്ലെന്ന പരാതിയുമായി മാതാപിതാക്കൾ കുറുപ്പംപടി പൊലീസ് സ്റ്റേഷനിലെത്തിയത്. കേസ് രജിസ്റ്റർ ചെയ്ത ഉടൻ തന്നെ പൊലീസ് കുട്ടി താമസിച്ചിരുന്ന മേതല മേഖലയിലും സമീപപ്രദേശങ്ങളിലും വ്യാപകമായി തിരച്ചിൽ നടത്തി. എന്നാൽ കുട്ടിയെക്കുറിച്ച് യാതൊരു വിവരവും ലഭിച്ചില്ല.
തുടർന്ന് ശാസ്ത്രീയ അന്വേഷണ രീതികളിലൂടെ അന്വേഷണം തമിഴ്നാട്ടിലെ സേലത്തേക്ക് വ്യാപിപ്പിച്ചു. സേലത്ത് ജോലി ചെയ്യുന്ന കേശവ് എന്നയാളിലേക്ക് അന്വേഷണത്തിന്റെ സൂചനകൾ എത്തുകയായിരുന്നു. സേലത്ത് ജോലി ചെയ്യുന്ന മറ്റൊരു ഒഡിഷ സ്വദേശിയുമായി പെൺകുട്ടിക്ക് സൗഹൃദമുണ്ടായിരുന്നുവെന്നും അന്വേഷണത്തിൽ വ്യക്തമായി.
പൊലീസ് സംഘം ഉടൻ സേലത്തെത്തി പരിശോധന നടത്തിയെങ്കിലും അപ്പോഴേക്കും യുവാവും പെൺകുട്ടിയും അവിടെനിന്ന് മാറിയിരുന്നു. യുവാവിന്റെ ഫോൺ സ്വിച്ച് ഓഫ് ചെയ്തതോടെ അന്വേഷണവും കൂടുതൽ സങ്കീർണമായി.
ഇതോടെയാണ് എറണാകുളം റൂറൽ ജില്ലാ പൊലീസ് മേധാവി കെ.എസ്. സുദർശന്റെ നിർദേശപ്രകാരം പ്രത്യേക അന്വേഷണ സംഘം രൂപീകരിച്ചത്. ഓഗസ്റ്റ് 18ന് സംഘം ഒഡിഷയിലേക്ക് തിരിച്ചു. അവിടെ നടത്തിയ അന്വേഷണത്തിനൊടുവിൽ പെൺകുട്ടി അലോക് എന്ന യുവാവിനൊപ്പം ഗഞ്ചം ജില്ലയിലെ നബാഗൊച്ച ഗ്രാമത്തിലുണ്ടെന്ന നിർണായക വിവരം ലഭിച്ചു.
എന്നാൽ പെൺകുട്ടിയെ കണ്ടെത്തിയ സ്ഥലം സാധാരണ വനമേഖലയായിരുന്നില്ല. നക്സൽ-മാവോയിസ്റ്റ് സാന്നിധ്യമുള്ള അതീവ അപകടകരമായ മേഖലയായിരുന്നു അത്. എന്നിട്ടും ദൗത്യത്തിൽ നിന്ന് പിന്മാറാൻ പൊലീസ് തയ്യാറായില്ല.
അർധരാത്രിയിൽ 40 കിലോമീറ്റർ ഉൾവനത്തിലേക്ക്
ഓഗസ്റ്റ് 18ന് രാത്രിയിൽ തന്നെ രക്ഷാദൗത്യം നടത്താൻ തീരുമാനിച്ചു. ബഞ്ചനഗർ പൊലീസ് സ്റ്റേഷൻ എസ്എച്ച്ഒയുടെ നേതൃത്വത്തിൽ ആയുധധാരികളായ എട്ട് പൊലീസ് ഉദ്യോഗസ്ഥരെ കേരള പൊലീസ് സംഘത്തിനൊപ്പം നിയോഗിച്ചു. കേരളത്തിൽ നിന്നെത്തിയ അന്വേഷണ ഉദ്യോഗസ്ഥർക്കും സുരക്ഷയ്ക്കായി തോക്കുകൾ നൽകി.
രാത്രി 12 മണിയോടെ പൊലീസ് സംഘം വാഹനങ്ങളിൽ ഉൾവനത്തിലേക്ക് പ്രവേശിച്ചു. ഏകദേശം 40 കിലോമീറ്റർ സഞ്ചരിച്ച ശേഷം ലക്ഷ്യസ്ഥാനത്തിന് ഒരു കിലോമീറ്റർ അകലെ വാഹനങ്ങൾ നിർത്തി. തുടർന്ന് പൊലീസ് ഉദ്യോഗസ്ഥർ ഒറ്റനിരയായി കാട്ടിലൂടെ നടന്ന് ഗ്രാമത്തിലേക്ക് നീങ്ങി.
വനത്തിനുള്ളിലെ വെറും അഞ്ച് വീടുകൾക്കിടയിൽ അലോകിന്റെ വീട് കണ്ടെത്തുക പോലും എളുപ്പമായിരുന്നില്ല. ഒടുവിൽ വീട് തിരിച്ചറിഞ്ഞ പൊലീസ് സംഘം അത് വളഞ്ഞു.
പൊലീസ് എത്തിയതിന്റെ ശബ്ദം കേട്ട് സമീപവാസികൾ ഉണർന്നു. ചിലർ പൊലീസുമായി വാക്കുതർക്കത്തിലേർപ്പെട്ടതോടെ സ്ഥിതിഗതികൾ കൂടുതൽ സംഘർഷഭരിതമായി. എന്നാൽ തന്ത്രപരമായി സാഹചര്യം നിയന്ത്രിച്ച പൊലീസ് ഒടുവിൽ വീട്ടിനുള്ളിൽ നിന്ന് അലോകിനെയും കാണാതായ 13കാരിയെയും കണ്ടെത്തുകയായിരുന്നു.
തുടർന്ന് ഇരുവരെയും സുരക്ഷിതമായി ബഞ്ചനഗർ പൊലീസ് സ്റ്റേഷനിലെത്തിച്ചു. ആവശ്യമായ നടപടികൾ പൂർത്തിയാക്കിയ ശേഷം പെൺകുട്ടിയുമായി കേരള പൊലീസ് സംഘം ഏകദേശം 4,000 കിലോമീറ്റർ റോഡുമാർഗം സഞ്ചരിച്ച് കൊച്ചിയിലെത്തി.
സബ് ഇൻസ്പെക്ടർ കെ.എം. അബി, സീനിയർ സി.പി.ഒമാരായ എൻ.പി. ബിന്ദു, അരുൺ കെ. കരുണൻ, രജിത് രാം എന്നിവരാണ് പ്രത്യേക അന്വേഷണ സംഘത്തിലുണ്ടായിരുന്നത്.
ഒരു പരാതിയിൽ നിന്ന് ആരംഭിച്ച അന്വേഷണം സേലത്തേക്കും പിന്നീട് ഒഡിഷയിലെ അതിർത്തി പ്രദേശങ്ങളിലേക്കും നീണ്ടപ്പോൾ, ഒടുവിൽ അപകടസാധ്യത നിറഞ്ഞ നക്സൽ ബാധിത വനമേഖലയിലെ അർധരാത്രി രക്ഷാദൗത്യത്തിലാണ് അവസാനിച്ചത്. കുട്ടിയെ സുരക്ഷിതമായി തിരിച്ചെത്തിച്ച കേരള പൊലീസിന്റെ ഈ ദൗത്യം അന്വേഷണ മികവിന്റെയും സാഹസിക ഇടപെടലിന്റെയും ശ്രദ്ധേയ ഉദാഹരണമായി മാറുകയാണ്.
