കൊച്ചി: കൊച്ചി മെട്രോയുടെ പേര് മാറ്റി ‘കേരളം മെട്രോ’ എന്നാക്കാനുള്ള നീക്കം സർക്കാരിന്റെ പരിഗണനയിലില്ലെന്ന് മുഖ്യമന്ത്രി വി.ഡി. സതീശൻ. സർക്കാരുമായി യാതൊരു കൂടിയാലോചനയും നടത്താതെയാണ് കെഎംആർഎൽ പേരുമാറ്റത്തെക്കുറിച്ച് പ്രഖ്യാപനം നടത്തിയതെന്നും മുഖ്യമന്ത്രി വ്യക്തമാക്കി.
കൊച്ചിയിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. “ഇന്നുരാവിലെ പത്രവാർത്ത കാണുമ്പോഴാണ് പേരുമാറ്റ വിഷയം അറിയുന്നത്. അങ്ങനെയല്ലല്ലോ അറിയേണ്ടത്” എന്നായിരുന്നു മുഖ്യമന്ത്രിയുടെ പ്രതികരണം.
പേരുമാറ്റവുമായി ബന്ധപ്പെട്ട് സർക്കാരുമായി ഇതുവരെ യാതൊരു ചർച്ചയും നടന്നിട്ടില്ല. സർക്കാർ ഇക്കാര്യം പരിഗണിച്ചിട്ടുമില്ല. അതിനാൽ കെഎംആർഎൽ ഏകപക്ഷീയമായി ആലോചിച്ച കാര്യമാണിതെന്നും മുഖ്യമന്ത്രി പറഞ്ഞു.
കൊച്ചി മെട്രോയുടെ പേര് മാറ്റുന്നത് കെഎംആർഎൽ മാത്രം തീരുമാനിച്ചാൽ മതിയാകില്ലെന്നും സർക്കാരിന്റെ കൂടി അഭിപ്രായം ആവശ്യമാണ് എന്നുമാണ് മുഖ്യമന്ത്രിയുടെ നിലപാട്.
“അത് കെഎംആർഎൽ മാത്രം ആലോചിച്ചാൽ പോരല്ലോ. സർക്കാരും ആലോചിക്കേണ്ടതല്ലേ. കൂടിയാലോചനയില്ലാതെ ഇത്തരമൊരു നീക്കം എങ്ങനെയുണ്ടായി എന്ന് അവരോട് ചോദിച്ചാലേ അറിയൂ”, വി.ഡി. സതീശൻ പറഞ്ഞു.
സർക്കാർ അറിയാതെ കെഎംആർഎൽ തന്നെ പേരുമാറ്റം ആലോചിച്ചതിൽ തങ്ങൾക്ക് എന്ത് ചെയ്യാൻ കഴിയുമെന്നും മുഖ്യമന്ത്രി ചോദിച്ചു. വിഷയത്തിൽ സർക്കാർ പ്രതികരിക്കേണ്ട സാഹചര്യം പോലുമില്ലെന്നും അദ്ദേഹം കൂട്ടിച്ചേർത്തു.
നഗര ഗതാഗത പദ്ധതികൾ സംസ്ഥാനത്തുടനീളം വ്യാപിപ്പിക്കുന്നതിന്റെ ഭാഗമായി കൊച്ചി മെട്രോ റെയിൽ ലിമിറ്റഡ് പുനർനാമകരണം ചെയ്യണമെന്ന ശുപാർശ നൽകിയെന്ന വാർത്ത പുറത്തുവന്നതിന് പിന്നാലെയാണ് മുഖ്യമന്ത്രിയുടെ പ്രതികരണം. സംസ്ഥാന സർക്കാരിന്റെ അനുമതിക്ക് പുറമെ മറ്റ് ഔദ്യോഗിക അനുമതികളും ആവശ്യമായേക്കുമെന്നായിരുന്നു കെഎംആർഎൽ വ്യക്തമാക്കിയിരുന്നത്.
ഓണത്തോടനുബന്ധിച്ച് അടുത്ത മാസം ഒന്നിന് നൽകേണ്ട ക്ഷേമപെൻഷൻ നേരത്തെ വിതരണം ആരംഭിച്ചിട്ടുണ്ടെന്നും അത് വൈകിയെന്ന് പറയരുതെന്നും മുഖ്യമന്ത്രി പറഞ്ഞു.
മെസി വിവാദവുമായി ബന്ധപ്പെട്ട റിപ്പോർട്ട് സർക്കാരിന് ലഭിച്ചിട്ടുണ്ട്. റിപ്പോർട്ട് പരിശോധിച്ച ശേഷം സർക്കാർ തീരുമാനം ഉടൻ അറിയിക്കുമെന്നും അദ്ദേഹം വ്യക്തമാക്കി.
അതേസമയം, വീണാ വിജയനെതിരായ ഇ.ഡി. അന്വേഷണത്തെക്കുറിച്ച് മാധ്യമങ്ങളിലൂടെയാണ് താൻ അറിഞ്ഞതെന്നും മുഖ്യമന്ത്രി പറഞ്ഞു. വിഷയത്തിൽ ബന്ധപ്പെട്ട ആളുകൾ തന്നെ പ്രതികരിക്കട്ടെയെന്നും “എല്ലാം ജനങ്ങൾ കാണുന്നുണ്ടല്ലോ” എന്നും വി.ഡി. സതീശൻ കൂട്ടിച്ചേർത്തു.
