തിരുവനന്തപുരം: ഓണാഘോഷത്തിന്റെ ആവേശത്തിന് പിന്നാലെ സംസ്ഥാനത്തെ സ്കൂളുകൾ ഇന്ന് അടയ്ക്കും. ആഗസ്റ്റ് 22 മുതൽ 30 വരെയാണ് ഈ വർഷത്തെ ഓണാവധി. ഓണാവധിക്ക് ശേഷം ആഗസ്റ്റ് 31ന് സംസ്ഥാനത്തെ സ്കൂളുകൾ വീണ്ടും തുറന്ന് പ്രവർത്തനം ആരംഭിക്കും.
ഓണാവധിക്ക് മുന്നോടിയായി ഇന്ന് സ്കൂളുകളിൽ വിവിധ ഓണാഘോഷ പരിപാടികൾ നടക്കും. വിദ്യാർഥികളും അധ്യാപകരും ചേർന്ന് ഓണപ്പൂക്കളം, ഓണസദ്യ, വിവിധ കലാ-കായിക പരിപാടികൾ തുടങ്ങിയവ സംഘടിപ്പിച്ച ശേഷമായിരിക്കും സ്കൂളുകൾ അവധിക്കായി അടയ്ക്കുക. ആഗസ്റ്റ് 21ന് സ്കൂളുകളിൽ ഓണാഘോഷ പരിപാടികൾ നടത്തണമെന്ന് വിദ്യാഭ്യാസ വകുപ്പ് നേരത്തെ നിർദേശിച്ചിരുന്നു.
ആഗസ്റ്റ് 14 മുതൽ 20 വരെയായിരുന്നു ഓണപരീക്ഷകൾ. വിവിധ ക്ലാസുകളിലെ വിദ്യാർഥികൾക്ക് നിശ്ചയിച്ച പരീക്ഷകൾ ഈ കാലയളവിലാണ് നടന്നത്. പരീക്ഷ നടക്കുന്ന ഏതെങ്കിലും ദിവസം അവധി വന്നാൽ, ആ പരീക്ഷ ആഗസ്റ്റ് 21ന് നടത്താനും വിദ്യാഭ്യാസ വകുപ്പ് നിർദേശം നൽകിയിരുന്നു.
ഇത്തവണ വിദ്യാർഥികൾക്ക് ഒൻപത് ദിവസത്തെ ഓണാവധിയാണ് ലഭിക്കുന്നത്. ആഗസ്റ്റ് 22ന് ആരംഭിക്കുന്ന അവധി ആഗസ്റ്റ് 30ന് അവസാനിക്കും. തുടർന്ന് ആഗസ്റ്റ് 31ന് അധ്യയനം പുനരാരംഭിക്കും.
ഓണക്കാലത്ത് കുടുംബത്തോടൊപ്പം സമയം ചെലവഴിക്കാനും ആഘോഷങ്ങളിൽ പങ്കെടുക്കാനും വിദ്യാർഥികൾക്ക് ലഭിക്കുന്ന ഇടവേള കൂടിയാണിത്. സ്കൂൾ മുറ്റങ്ങളിലെ ഓണപ്പൂക്കളവും ആഘോഷങ്ങളുമെല്ലാം പിന്നിലാക്കി കുട്ടികൾ ഇനി അവധിക്കാലത്തിന്റെ സന്തോഷത്തിലേക്ക്.
