ന്യൂഡല്ഹി: സംസ്ഥാനത്തിന്റെ ഔദ്യോഗിക പേര് ‘കേരളം’ എന്നാക്കി മാറ്റുന്നതിനുള്ള നടപടികള് കേന്ദ്രസര്ക്കാര് പൂര്ത്തിയാക്കിയതായി റിപ്പോര്ട്ട്. പേരുമാറ്റവുമായി ബന്ധപ്പെട്ട അന്തിമ നിയമനടപടികള് പൂര്ത്തിയാക്കി കേന്ദ്രസര്ക്കാര് വിജ്ഞാപനം പുറത്തിറക്കിയതോടെയാണ് പുതിയ പേര് പ്രാബല്യത്തില് വന്നത്. ഇതോടെ കേന്ദ്രസര്ക്കാരിന്റെ ഔദ്യോഗിക രേഖകളിലും നടപടിക്രമങ്ങളിലും സംസ്ഥാനത്തിന്റെ പേര് ‘കേരളം’ എന്നായിരിക്കും ഉപയോഗിക്കുക. തിരുവോണത്തിന് തൊട്ടുമുമ്പ് സംസ്ഥാനത്തിന് ഔദ്യോഗികമായി പുതിയ പേര് ലഭിച്ചതും ശ്രദ്ധേയമാണ്.
സംസ്ഥാനത്തിന്റെ പേര് ‘കേരളം’ എന്നാക്കി മാറ്റണമെന്ന ആവശ്യവുമായി കേരള സര്ക്കാര് നേരത്തെ കേന്ദ്രത്തെ സമീപിച്ചിരുന്നു. ഇതിന്റെ ഭാഗമായി സംസ്ഥാന നിയമസഭ പ്രമേയം പാസാക്കി കേന്ദ്രസര്ക്കാരിന് കൈമാറിയിരുന്നു. തുടര്ന്ന് കേന്ദ്രതലത്തില് ആവശ്യമായ നിയമപരിശോധനകളും ഭരണഘടനാപരമായ നടപടികളും പൂര്ത്തിയാക്കിയ ശേഷമാണ് പേരുമാറ്റത്തിന് അംഗീകാരം നല്കിയതെന്നാണ് റിപ്പോര്ട്ട്.
പേരുമാറ്റത്തോടെ കേന്ദ്ര-സംസ്ഥാന സര്ക്കാരുകളുടെ ഔദ്യോഗിക രേഖകള്, വിവിധ ഭരണനടപടികള്, ആശയവിനിമയങ്ങള് എന്നിവയില് സംസ്ഥാനത്തിന്റെ പുതിയ ഔദ്യോഗിക പേര് ഉപയോഗിക്കുന്നതിനുള്ള നടപടികള്ക്ക് തുടക്കമാകും. കേരളത്തിന്റെ പേരുമായി ബന്ധപ്പെട്ട് വര്ഷങ്ങളായി നിലനിന്നിരുന്ന ആവശ്യം ഇതോടെ ഔദ്യോഗികമായി നടപ്പായെന്നാണ് വിലയിരുത്തല്.
