കൂത്താട്ടുകുളം: ഒരു നിമിഷം വൈകിയിരുന്നെങ്കിൽ എന്ത് സംഭവിക്കുമായിരുന്നുവെന്ന് ചിന്തിക്കാൻ പോലും കഴിയില്ല. കൂത്താട്ടുകുളത്തിന് സമീപം കാക്കൂരിൽ നടന്ന ബസ് അപകടത്തിന്റെ നടുക്കുന്ന സി.സി.ടി.വി ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ പ്രചരിക്കുന്നത്. അപകടത്തിൽ നിന്ന് തലനാരിഴയ്ക്ക് രക്ഷപ്പെട്ട സ്കൂട്ടർ യാത്രികനെ തേടുകയാണ് നാട്ടുകാർ.
കാക്കൂരിലെ പെട്രോൾ പമ്പിൽ ഇന്ധനം നിറച്ച ശേഷം സ്കൂട്ടറിൽ പുറത്തേക്ക് ഇറങ്ങുകയായിരുന്നു യാത്രികൻ. ഇതിനിടെ എതിർദിശയിൽ നിന്ന് ബസ് വരുന്നത് ശ്രദ്ധയിൽപ്പെട്ടതോടെ ഇയാൾ സ്കൂട്ടർ നിർത്തി. എന്നാൽ നിയന്ത്രണം വിട്ട് പാഞ്ഞെത്തിയ ബസ് കണ്ട് അമ്പരന്ന് നിൽക്കുന്നതിനിടെയാണ് ഞെട്ടിക്കുന്ന സംഭവം അരങ്ങേറിയത്.
അടുത്ത നിമിഷം ബസ് നിയന്ത്രണം വിട്ട് മറിഞ്ഞ് റോഡിലൂടെ നിരങ്ങി നീങ്ങി. ഒടുവിൽ യാത്രികന്റെ സ്കൂട്ടറിൽ ഇടിച്ചാണ് ബസ് നിന്നത്. എന്നാൽ ബസ് ഇടിക്കുന്നതിന് തൊട്ടുമുമ്പ് തന്നെ യാത്രികൻ അത്ഭുതകരമായി രക്ഷപ്പെട്ടു. അപകടത്തിന്റെ ആഘാതത്തിൽ സ്കൂട്ടറിന് കേടുപാടുകൾ സംഭവിച്ചെങ്കിലും യാത്രികൻ പിന്നീട് സ്കൂട്ടറുമായി അവിടെ നിന്ന് പോകുകയായിരുന്നു.
ഹെൽമറ്റ് ധരിച്ചിരുന്നതിനാൽ യാത്രികനെ തിരിച്ചറിയാൻ കഴിഞ്ഞിട്ടില്ലെന്ന് പെട്രോൾ പമ്പ് ജീവനക്കാർ പറഞ്ഞു. അപകടം നടക്കുമ്പോൾ പമ്പിൽ ഒരു കാർ കൂടി ഡീസൽ നിറയ്ക്കാനായി ഉണ്ടായിരുന്നുവെന്നും ജീവനക്കാർ വ്യക്തമാക്കി.
പമ്പിലെ ഉയരത്തിലുള്ള യൂണികോഡ് ലോഗോ ബോർഡിൽ തട്ടി നിന്നതുകൊണ്ടാണ് ബസ് കൂടുതൽ ദൂരത്തേക്ക് പാഞ്ഞുകയറാതിരുന്നതെന്നും ജീവനക്കാർ പറയുന്നു. ആ ബോർഡിൽ തട്ടാതെ ബസ് മുന്നോട്ടുപോയിരുന്നെങ്കിൽ പെട്രോൾ പമ്പിലുണ്ടായിരുന്നവർക്കും വാഹനങ്ങൾക്കും വലിയ അപകടം സംഭവിക്കാനുള്ള സാധ്യതയുണ്ടായിരുന്നു.
അപകടത്തിൽപ്പെട്ട ബസ് പിന്നീട് ക്രെയിൻ ഉപയോഗിച്ചാണ് ഉയർത്തിയത്. സംഭവത്തിന്റെ സി.സി.ടി.വി ദൃശ്യങ്ങൾ പുറത്തുവന്നതോടെയാണ് അപകടത്തിന്റെ ഭീകരത കൂടുതൽ വ്യക്തമായത്.
‘ആരാണ് ആ ഭാഗ്യവാൻ?’ എന്നാണ് ഇപ്പോൾ നാട്ടുകാരുടെ ചോദ്യം. മരണത്തെ മുഖാമുഖം കണ്ടിട്ടും അത്ഭുതകരമായി രക്ഷപ്പെട്ട സ്കൂട്ടർ യാത്രികനെ കണ്ടെത്താനുള്ള ശ്രമത്തിലാണ് പ്രദേശവാസികൾ. ദൃശ്യങ്ങളിൽ കാണുന്ന ആ വ്യക്തിയെ തിരിച്ചറിയാനുള്ള അന്വേഷണവും തുടരുകയാണ്.
