ന്യൂഡല്ഹി: തെക്കന് മധ്യ റെയില്വേയിലെ മുകുട്ബന് (അദിലാബാദ്)-ഗഡ്ചന്ദൂര് മേഖലകളെ ബന്ധിപ്പിക്കുന്ന പുതിയ റെയില്പാത പദ്ധതിക്ക് 493 കോടി രൂപയുടെ അനുമതി നല്കി ഇന്ത്യന് റെയില്വേ. ഏകദേശം 38 കിലോമീറ്റര് ദൈര്ഘ്യമുള്ള പുതിയ പാതയിലൂടെ യാത്രാദൂരം, യാത്രാസമയം, ഗതാഗതച്ചെലവ് എന്നിവ കുറയ്ക്കാനാകുമെന്ന് റെയില്വേ മന്ത്രാലയം അറിയിച്ചു. നിലവിലെ വാര്ധ-മാണിക്ഗഢ് റെയില്പാതയിലെ തിരക്ക് കുറയ്ക്കുന്നതിനും പുതിയ പാത സഹായിക്കും. ചരക്ക് ട്രെയിനുകളുടെ സുഗമമായ നീക്കത്തിന് ഇത് കൂടുതല് സൗകര്യമൊരുക്കും. യവത്മാല് ജില്ലയിലെ മുകുട്ബനും ചന്ദ്രപൂര് ജില്ലയിലെ ഗഡ്ചന്ദൂരും പ്രധാന വ്യവസായ-ഖനന കേന്ദ്രങ്ങളായതിനാല് ഈ മേഖലകളിലേക്കുള്ള റെയില് കണക്റ്റിവിറ്റി ശക്തിപ്പെടുത്താനും പദ്ധതി ലക്ഷ്യമിടുന്നു.
പാത യാഥാര്ഥ്യമാകുന്നതോടെ പ്രതിവര്ഷം ഏകദേശം 60 ലക്ഷം ടണ് ചരക്ക് ഗതാഗതം കൈകാര്യം ചെയ്യാന് കഴിയുമെന്നാണ് റെയില്വേയുടെ വിലയിരുത്തല്. കൂടാതെ, ഇരുദിശകളിലേക്കും ദിവസേന രണ്ട് വീതം മെമു ട്രെയിനുകളും സര്വീസ് നടത്താന് സാധിക്കും. കല്ക്കരി, സിമന്റ് വ്യവസായ ക്ലസ്റ്ററുകളെ മജ്രി-നാന്ദേഡ് റൂട്ടുമായി നേരിട്ട് ബന്ധിപ്പിക്കാനും പുതിയ പാത സഹായിക്കും. കല്ക്കരി, സിമന്റ്, സ്റ്റീല് പ്ലാന്റുകള്ക്കാവശ്യമായ അസംസ്കൃത വസ്തുക്കള് എന്നിവ കുറഞ്ഞ ദൂരത്തില് എത്തിക്കുന്നതിനും ഇതുവഴി സാധിക്കും. നിലവില് തിരക്കേറിയ ബല്ഹര്ഷ-നാഗ്പൂര് ഹൈ ഡെന്സിറ്റി നെറ്റ്വര്ക്ക് റൂട്ടിനെ ആശ്രയിക്കുന്നത് കുറയ്ക്കാനും പുതിയ പാത സഹായിക്കുമെന്ന് മന്ത്രാലയം വ്യക്തമാക്കി. യവത്മാല്, ചന്ദ്രപൂര് ജില്ലകളിലെ റെയില് കണക്റ്റിവിറ്റി മെച്ചപ്പെടുത്തുന്നതിനും പദ്ധതി പ്രയോജനപ്പെടും.
