അസംഗഢ്: ഉത്തർപ്രദേശിലെ അസംഗഢിൽ ഭാര്യയെയും മകനെയും രണ്ട് പൂജാരിമാരെയും വെടിവെച്ച് കൊലപ്പെടുത്തിയ പ്രതി പോലീസ് ഏറ്റുമുട്ടലിൽ കൊല്ലപ്പെട്ടു. അരവിന്ദ് സിംഗ് എന്നയാളാണ് കൊല്ലപ്പെട്ടത്. ഏകദേശം ഏഴ് മണിക്കൂറോളം നീണ്ടുനിന്ന സംഘർഷത്തിനൊടുവിലാണ് പോലീസ് നടപടി.
അസംഗഢിലെ ശംഭുപുർ ഗ്രാമത്തിലാണ് സംഭവം. അരവിന്ദ് സിംഗിന്റെ സഹോദരൻ ഗുഡ്ഡു സിംഗ് രണ്ടാം ചരമ വാർഷികവുമായി ബന്ധപ്പെട്ട് ആത്മശാന്തിക്കായി വീട്ടിൽ ചടങ്ങ് സംഘടിപ്പിച്ചിരുന്നു. ഇതിനായി രണ്ട് പൂജാരിമാർ വീട്ടിലെത്തിയിരുന്നു.
ചടങ്ങ് നടത്തുന്നതിനെ അരവിന്ദ് നേരത്തെ എതിർത്തിരുന്നതായാണ് പോലീസ് പറയുന്നത്. എന്നാൽ കുടുംബാംഗങ്ങൾ ചടങ്ങുമായി മുന്നോട്ടുപോയി. ചൊവ്വാഴ്ച വൈകിട്ട് ആറുമണിയോടെ വീട്ടിലെത്തിയ അരവിന്ദ് ഭാര്യ ബബിത സിംഗ് (32) ചടങ്ങിൽ പങ്കെടുക്കുന്നത് കണ്ടതോടെ പ്രകോപിതനായി.
തുടർന്ന് ഭാര്യയുമായി വാക്കുതർക്കമുണ്ടാകുകയും പൂജാരിമാരുമായി ഇയാൾ തർക്കിക്കുകയും ചെയ്തു. തർക്കം രൂക്ഷമായതോടെ കൈവശമുണ്ടായിരുന്ന ലൈസൻസുള്ള തോക്ക് ഉപയോഗിച്ച് ഭാര്യയെയും പൂജാരിമാരെയും ഇയാൾ വെടിവെച്ച് കൊല്ലുകയായിരുന്നു. മഹേന്ദ്ര പഥക് (60), അഖിലേഷ് മിശ്ര (50) എന്നിവരാണ് കൊല്ലപ്പെട്ട പൂജാരിമാർ.
മക്കളെ മുറിയിൽ പൂട്ടി; പോലീസിന് നേരെയും വെടിയുതിർത്തു
ആക്രമണത്തിന് പിന്നാലെ മക്കളെയും അരവിന്ദ് ബന്ദികളാക്കി. സ്ഥലത്തെത്തിയ പോലീസ് കീഴടങ്ങാനും കുട്ടികളെ സുരക്ഷിതമായി വിട്ടയക്കാനും ആവശ്യപ്പെട്ടെങ്കിലും ഇയാൾ വഴങ്ങിയില്ല.
ഇതിനിടെ അരവിന്ദ് സ്വന്തം മകന് നേരെയും വെടിയുതിർത്തു. ശബ്ദം കേട്ട പോലീസ് മുറിക്കുള്ളിലേക്ക് പ്രവേശിക്കാൻ ശ്രമിച്ചു. ഇതോടെ പ്രതി പോലീസിന് നേരെയും ഇയാൾ തുടർച്ചയായി വെടിയുതിർക്കുകയായിരുന്നു. പിന്നീട് നടന്ന ഏറ്റുമുട്ടലിലാണ് പ്രതി കൊല്ലപ്പെട്ടത്. പരിക്കേറ്റ അരവിന്ദിനെയും മകനെയും ആശുപത്രിയിലെത്തിച്ചെങ്കിലും ഇരുവരും മരിച്ചു. സംഭവത്തിൽ തുടർ നിയമനടപടികൾ പുരോഗമിക്കുകയാണെന്ന് പോലീസ് അറിയിച്ചു.