ന്യൂയോർക്ക്: പാകിസ്താൻ പ്രധാനമന്ത്രി ഷെഹ്ബാസ് ഷരീഫിന്റെ യുഎൻ പൊതുസഭാ പ്രസംഗത്തിന് ശക്തമായ മറുപടിയുമായി ഇന്ത്യ. ഭീകരവാദം, ജമ്മു കശ്മീർ, ജനാധിപത്യ അവകാശങ്ങൾ, ന്യൂനപക്ഷങ്ങളുടെ അവകാശങ്ങൾ തുടങ്ങിയ വിഷയങ്ങളിൽ പാകിസ്താന്റെ പരാമർശങ്ങളെ ഇന്ത്യ തള്ളി. യുഎന്നിലെ ഇന്ത്യയുടെ പെർമനന്റ് മിഷനിലെ ഫസ്റ്റ് സെക്രട്ടറി പെറ്റൽ ഗഹ്ലോട്ടാണ് ഇന്ത്യയുടെ റെറ്റ് ഓഫ് റിപ്ലേ അവതരിപ്പിച്ചത്.
പാകിസ്താന്റെ അതിർത്തി കടന്നുള്ള ഭീകരവാദമാണ് പ്രധാന വിഷയമെന്ന് ഗഹ്ലോട്ട് പറഞ്ഞു. ഭീകരവാദത്തിനെതിരെ സ്വയം പ്രതിരോധിക്കാനുള്ള ഇന്ത്യയുടെ അവകാശം തുടരുമെന്നും അവർ വ്യക്തമാക്കി.“പാകിസ്താന്റെ ഭീകരവാദത്തിന് തിരിച്ചടിയുണ്ടാകും” എന്നും ഗഹ്ലോട്ടിന്റെ മുന്നറിയിപ്പ് നൽകി.
‘കശ്മീർ ചർച്ചയാണെങ്കിൽ പാക് അധീന ജമ്മു കശ്മീർ സംസാരിക്കാം’
ജമ്മു കശ്മീരിനെക്കുറിച്ചുള്ള ഷെഹ്ബാസ് ഷരീഫിന്റെ പരാമർശവും ഇന്ത്യ തള്ളി. ജമ്മു കശ്മീർ ഇന്ത്യയുടെ “അവിഭാജ്യമായ ഭാഗമാണ്” എന്ന നിലപാട് ഗഹ്ലോട്ട് ആവർത്തിച്ചു. കശ്മീരിനെക്കുറിച്ച് ചർച്ച ചെയ്യണമെങ്കിൽ പാക് അധീന ജമ്മു കശ്മീരിലെ സ്ഥിതിഗതികളും പരിഗണിക്കണമെന്ന് അവർ യുഎൻ പൊതുസഭയോട് ആവശ്യപ്പെട്ടു. അവിടെ കൊലപാതകങ്ങളും അക്രമവും അടിസ്ഥാന അവകാശങ്ങളുടെ നിഷേധവും ഗഹ്ലോട്ട് ചൂണ്ടിക്കാട്ടി.
ജനാധിപത്യ അവകാശങ്ങളെയും മനുഷ്യാവകാശങ്ങളെയും കുറിച്ചുള്ള പാകിസ്താന്റെ പരാമർശങ്ങളെയും ഗഹ്ലോട്ട് ചോദ്യം ചെയ്തു. പാകിസ്താനിൽ സൈന്യത്തിനാണ് നിർണായക സ്വാധീനം. പാകിസ്താനിലെ ഭരണസംവിധാനത്തെ അവർ “സൈന്യത്തിന് വേണ്ടി സൈന്യത്താലുള്ള ഭരണകൂടം” എന്നാണ് വിശേഷിപ്പിച്ചത്.
മതന്യൂനപക്ഷങ്ങളുടെ അവകാശങ്ങളെക്കുറിച്ച് പാകിസ്താൻ നടത്തിയ പരാമർശങ്ങൾക്കും ഇന്ത്യ മറുപടി നൽകി. പാകിസ്താനിലെ ന്യൂനപക്ഷങ്ങളുടെ അവസ്ഥയെക്കുറിച്ച് ലോകത്തിന് അറിയാമെന്നും മതനിന്ദാ നിയമങ്ങളും ന്യൂനപക്ഷങ്ങളോടുള്ള സമീപനവും ചോദ്യം ചെയ്യേണ്ടതുണ്ടെന്നും ഗഹ്ലോട്ട് പറഞ്ഞു.
ഒസാമ ബിൻ ലാദനെ ഓർമിപ്പിച്ച് ഇന്ത്യ
9/11 ഭീകരാക്രമണത്തിന്റെ 25-ാം വാർഷികവും ഗഹ്ലോട്ട് പരാമർശിച്ചു. ആക്രമണത്തിന്റെ ആസൂത്രകനായ ഒസാമ ബിൻ ലാദൻ പാകിസ്താൻ സൈന്യത്തിന്റെ പ്രധാന പരിശീലനകേന്ദ്രത്തിന് സമീപമാണ് താമസിച്ചിരുന്നതെന്ന് ഇന്ത്യ ചൂണ്ടിക്കാട്ടി. പാകിസ്താന്റെ പ്രതിനിധി സൈനിക അക്കാദമിയെ പ്രശംസിച്ചതിന് പിന്നാലെയായിരുന്നു ഗഹ്ലോട്ടിന്റെ ഈ പരാമർശം.