ന്യൂഡല്ഹി: ഇന്ത്യന് നാവികസേനയ്ക്ക് 2026 ചരിത്രവര്ഷമാകുമെന്ന് പ്രതിരോധമന്ത്രി രാജ്നാഥ് സിംഗ്. ഈ വര്ഷം 18 യുദ്ധക്കപ്പലുകള് നാവികസേനയില് ഉള്പ്പെടുത്തുകയോ കമ്മീഷന് ചെയ്യുകയോ ചെയ്യുമെന്ന് അദ്ദേഹം പറഞ്ഞു. ഒരു വര്ഷം നാവികസേനയുടെ ചരിത്രത്തിലെ ഏറ്റവും വലിയ കപ്പല്ശേഷി വര്ധനയാകും ഇതെന്നും രാജ്നാഥ് സിംഗ് വ്യക്തമാക്കി. ന്യൂഡല്ഹിയിലെ നൗസേന ഭവനില് നടന്ന ഇന്ത്യന് നാവികസേനയുടെ രണ്ടാമത് ദ്വൈവാര്ഷിക കമാന്ഡേഴ്സ് കോണ്ഫറന്സ് 2026നെ അഭിസംബോധന ചെയ്യുകയായിരുന്നു അദ്ദേഹം.
പ്രതിരോധ മേഖലയിലെ ആത്മനിര്ഭരതയിലേക്കുള്ള നാവികസേനയുടെ നീക്കങ്ങളെ രാജ്നാഥ് സിംഗ് ചൂണ്ടിക്കാട്ടി. രാജ്യത്തെ യുദ്ധക്കപ്പല് നിര്മാണ മേഖലയ്ക്ക് ആഗോള നിലവാരത്തിലെത്താന് കഴിഞ്ഞതായും അദ്ദേഹം പറഞ്ഞു. അടുത്തിടെ കമ്മീഷന് ചെയ്ത യുദ്ധക്കപ്പലുകളില് 75 ശതമാനത്തിലേറെ തദ്ദേശീയ ഘടകങ്ങളുണ്ടെന്നും രാജ്നാഥ് സിംഗ് വ്യക്തമാക്കി. കടല് നിരീക്ഷണ സംവിധാനത്തില് കൂടുതല് നവീകരണം ആവശ്യമാണെന്നും പ്രതിരോധമന്ത്രി പറഞ്ഞു. കടലിലൂടെയുള്ള ഗതാഗതത്തിന്റെ അളവും സങ്കീര്ണതയും വര്ധിക്കുന്ന സാഹചര്യത്തില് നിലവിലെ സംവിധാനങ്ങള്ക്കൊപ്പം കൂടുതല് മികച്ച വിശകലന ശേഷിയും അനിവാര്യമാണെന്നും അദ്ദേഹം വ്യക്തമാക്കി.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സര്ക്കാര് നാവികസേനയുടെ ആധുനികവല്ക്കരണത്തിന് പ്രാധാന്യം നല്കുന്നതായും രാജ്നാഥ് സിംഗ് പറഞ്ഞു. വികസിത് ഭാരത് 2047 എന്ന ലക്ഷ്യത്തിലേക്ക് നീങ്ങുന്നതില് ഇന്ത്യന് നാവികസേനയ്ക്ക് തന്ത്രപ്രധാനമായ പങ്കുണ്ടെന്നും അദ്ദേഹം കൂട്ടിച്ചേര്ത്തു. മാറിവരുന്ന വെല്ലുവിളികള്ക്കിടയിലും ഉയര്ന്ന യുദ്ധസജ്ജത നിലനിര്ത്തുകയും മേഖലയില് ഏല്പ്പിച്ച ചുമതലകള് ഫലപ്രദമായി നിര്വഹിക്കുകയും ചെയ്യുന്ന നാവികസേനയെ പ്രതിരോധമന്ത്രി അഭിനന്ദിച്ചു. ഭാവിയിലെ വെല്ലുവിളികളെ നേരിടാന് സജ്ജമായ, യുദ്ധസജ്ജമായ, ആഗോളതലത്തില് കഴിവ് തെളിയിക്കുന്ന സേനയായി നാവികസേനയുടെ മുന്നേറ്റം തുടരണമെന്നും അദ്ദേഹം ആവശ്യപ്പെട്ടു.
