പാലക്കാട്: അട്ടപ്പാടിയിൽ നാല് ദിവസത്തിനിടെ രണ്ട് വനവാസി കുഞ്ഞുങ്ങൾ മരിച്ചു. ഹൃദയസംബന്ധമായ അസുഖത്തെ തുടർന്നാണ് ഒന്നര വയസും രണ്ട് മാസവും പ്രായമുള്ള കുഞ്ഞുങ്ങൾ മരിച്ചത്.
ജനനം മുതൽ തന്നെ ഇരുവർക്കും ഗുരുതര ആരോഗ്യപ്രശ്നങ്ങളുണ്ടായിരുന്നുവെന്നാണ് ആരോഗ്യവകുപ്പിന്റെ വിശദീകരണം. അതേസമയം, അട്ടപ്പാടിയിൽ ആറുമാസത്തിനിടെ ആറ് വനവാസി ശിശുമരണങ്ങൾ റിപ്പോർട്ട് ചെയ്ത സാഹചര്യത്തിൽ ഫീൽഡ് തലത്തിലെ ആരോഗ്യപ്രവർത്തകരുടെ ഒഴിവുകൾ നികത്തുന്നതിൽ കാലതാമസമുണ്ടെന്ന പരാതിയും ഉയരുന്നുണ്ട്.
വനവാസി ഊരുകളിലെ ദൈനംദിന ആരോഗ്യപ്രവർത്തനങ്ങൾക്ക് നേതൃത്വം നൽകേണ്ട ജൂനിയർ പബ്ലിക് ഹെൽത്ത് നഴ്സുമാരുടെ (JPHN) ഏഴ് തസ്തികകളാണ് നിലവിൽ ഒഴിഞ്ഞുകിടക്കുന്നത്. ഇതിൽ ആറ് ഒഴിവുകൾ രണ്ട് മാസമായി നികത്തിയിട്ടില്ലെന്നാണ് ജീവനക്കാർ പറയുന്നത്.
അഗളി സാമൂഹികാരോഗ്യ കേന്ദ്രത്തിന് കീഴിൽ മൂന്ന്, ആനക്കട്ടിയിൽ രണ്ട്, ഷോളയൂരിലും പുതൂരിലും ഓരോ ഒഴിവുകളുമാണുള്ളത്. ഊരുകളിലെ സബ് സെന്ററുകൾ കേന്ദ്രീകരിച്ചാണ് ജെ.പി.എച്ച്.എൻമാരുടെ പ്രവർത്തനം. വീടുകളിലെത്തി ആരോഗ്യസ്ഥിതി വിലയിരുത്തുന്നതും രോഗികളെ കണ്ടെത്തുന്നതും ഉൾപ്പെടെയുള്ള ഫീൽഡ് പ്രവർത്തനങ്ങൾക്ക് പുറമെ വിവിധ വിവരശേഖരണങ്ങളും കണക്കെടുപ്പുകളും ഫയൽ ജോലികളും ഇവരുടെ ചുമതലയാണ്.
ആരോഗ്യപ്രവർത്തകരുടെ കുറവ് ഊരുകളിലെ ആരോഗ്യപരിചരണത്തെ ബാധിക്കുന്നതായി ജീവനക്കാരും ചൂണ്ടിക്കാട്ടുന്നു. തുടർച്ചയായ ശിശുമരണങ്ങളുടെ പശ്ചാത്തലത്തിൽ ഒഴിവുകൾ അടിയന്തരമായി നികത്തണമെന്ന ആവശ്യവും ശക്തമാണ്.
