പത്തനംതിട്ട: ശബരിമല തീര്‍ഥാടനകാലത്തെ യാത്രാ തിരക്ക് പരിഹരിക്കാന്‍ സ്വകാര്യ ബസുകള്‍ വാടകയ്‌ക്കെടുത്ത് സര്‍വീസ് നടത്താന്‍ കെ.എസ്.ആര്‍.ടി.സി. സംസ്ഥാനത്തെ വിവിധ ഡിപ്പോകളില്‍നിന്നായി ഏകദേശം 300 സ്വകാര്യ ബസുകള്‍ പമ്പയിലേക്ക് സര്‍വീസ് നടത്തിക്കാനാണ് പദ്ധതി. ഇതിനായി ലഭിച്ച ടെന്‍ഡറുകള്‍ കെ.എസ്.ആര്‍.ടി.സി പരിശോധിച്ചുവരികയാണ്. കിലോമീറ്ററിന് ഏറ്റവും കുറഞ്ഞ നിരക്ക് രേഖപ്പെടുത്തിയ ബസുകള്‍ക്കായിരിക്കും മുന്‍ഗണന. ഡ്രൈവറടക്കം ബസ് നല്‍കാന്‍ തയ്യാറുള്ള ഉടമകളില്‍നിന്നാണ് ടെന്‍ഡര്‍ ക്ഷണിച്ചത്. എട്ട് വര്‍ഷത്തില്‍ താഴെ പഴക്കമുള്ള ടൂറിസ്റ്റ് ബസുകളുടെ മാതൃകയിലുള്ള വാഹനങ്ങളെയാണ് പരിഗണിക്കുന്നത്.
സ്വകാര്യ ബസുകള്‍ സര്‍വീസ് നടത്തുമ്പോള്‍ തീര്‍ഥാടകരില്‍നിന്ന് അധിക നിരക്ക് ഈടാക്കേണ്ടതില്ലെന്നാണ് നിലവിലെ തീരുമാനം. കെ.എസ്.ആര്‍.ടി.സി സര്‍വീസുകള്‍ക്ക് ബാധകമായ നിരക്ക് തന്നെയായിരിക്കും വാടകയ്‌ക്കെടുക്കുന്ന ബസുകളിലും ഈടാക്കുക. എ.സി ബസുകള്‍ ഉള്‍പ്പെടുത്തുന്ന കാര്യവും പരിഗണനയിലുണ്ട്. എന്നാല്‍ കരാര്‍ വ്യവസ്ഥകള്‍ ഉള്‍പ്പെടെയുള്ള കാര്യങ്ങളില്‍ അന്തിമ തീരുമാനമായിട്ടില്ല. സ്വകാര്യ ബസ് ഉടമകളുമായി നടത്തിയ ചര്‍ച്ചകള്‍ക്ക് പിന്നാലെയാണ് കെ.എസ്.ആര്‍.ടി.സി ടെന്‍ഡര്‍ നടപടികളിലേക്ക് കടന്നത്.
എന്നാല്‍ പ്രതീക്ഷിച്ചത്ര പ്രതികരണം ലഭിച്ചിട്ടില്ലെന്നാണ് വിവരം. ലഭിച്ച ടെന്‍ഡറുകളുടെ പരിശോധന പൂര്‍ത്തിയാക്കിയ ശേഷമായിരിക്കും തുടര്‍നടപടികള്‍. നിലവില്‍ പമ്പയിലേക്ക് സ്ഥിരമായി സര്‍വീസ് നടത്തുന്ന പ്രിയദര്‍ശിനി ബസുകള്‍ ശബരിമല സീസണില്‍ മാറ്റിനിര്‍ത്താനും സാധ്യതയുണ്ട്. പമ്പയിലെ തിരക്ക് പരിഗണിച്ച് ഫാസ്റ്റ്, സൂപ്പര്‍ഫാസ്റ്റ് സര്‍വീസുകള്‍ക്കാണ് കെ.എസ്.ആര്‍.ടി.സി കൂടുതല്‍ പ്രാധാന്യം നല്‍കുന്നത്. കഴിഞ്ഞ വര്‍ഷങ്ങളില്‍ ശബരിമല സീസണ്‍ മുന്നില്‍ക്കണ്ട് കെ.എസ്.ആര്‍.ടി.സി പുതിയ ബസുകള്‍ വാങ്ങിയിരുന്നു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
എന്നാല്‍ ഇത്തവണ പുതിയ വാഹനങ്ങള്‍ വാങ്ങുന്നതിനുള്ള സാമ്പത്തിക പരിമിതിയും നിലവിലുള്ള ബസുകളുടെ പഴക്കവും കണക്കിലെടുത്താണ് സ്വകാര്യ ബസുകളെ ആശ്രയിക്കുന്നത്. കെ.എസ്.ആര്‍.ടി.സിയുടെ നിരവധി ബസുകള്‍ക്ക് 16 വര്‍ഷത്തിലേറെ പഴക്കമുണ്ട്. 15 വര്‍ഷം പിന്നിട്ട പൊതുമേഖലാ വാഹനങ്ങള്‍ പൊളിക്കണമെന്ന കേന്ദ്ര നയം നിലവിലുണ്ടെങ്കിലും ബസുകളുടെ അപര്യാപ്തതയും സാമ്പത്തിക പ്രതിസന്ധിയും കണക്കിലെടുത്ത് കെ.എസ്.ആര്‍.ടി.സി ബസുകളുടെ പരമാവധി ഉപയോഗകാലം 20 വര്‍ഷമായി നിലനിര്‍ത്തിയിരിക്കുകയാണ്. ഈ സാഹചര്യത്തിലാണ് ശബരിമല തീര്‍ഥാടനകാലത്തെ സര്‍വീസുകള്‍ മുടങ്ങാതിരിക്കാനും യാത്രക്കാരുടെ തിരക്ക് കുറയ്‌ക്കാനും സ്വകാര്യ ബസുകള്‍ വാടകയ്‌ക്കെടുക്കാനുള്ള നീക്കം.
