ശ്രീനഗർ: ലഷ്‌കർ-ഇ-തൊയ്ബ കമാൻഡർ ഹാഷിം മൂസയുടെ പ്രാദേശിക സഹായ ശൃംഖലയെക്കുറിച്ചുള്ള അന്വേഷണം ശക്തമാക്കി സുരക്ഷാസേന. മൂസ കൊല്ലപ്പെട്ട് അഞ്ച് ദിവസത്തിന് പിന്നാലെ ഏറ്റുമുട്ടൽ നടന്ന പ്രദേശത്തിന് സമീപത്ത് നിന്ന് മരുന്നുകളും ഭക്ഷണസാധനങ്ങളും അടങ്ങിയ ബാഗ് പൊലീസ് കണ്ടെത്തി.
ബുദ്ഗാം ജില്ലയിലെ കാവൻ വനമേഖലയിലെ പാൽമൈദാനിന് സമീപത്താണ് ബാഗ് കണ്ടെത്തിയത്. വനത്തിൽ ദീർഘകാലം ഒളിവിൽ കഴിയാൻ ഹാഷിം മൂസയ്‌ക്ക് പ്രാദേശികമായി ആരെങ്കിലും സഹായം നൽകിയിരുന്നോ എന്നതടക്കമുള്ള കാര്യങ്ങളാണ് അന്വേഷിക്കുന്നത്. കണ്ടെത്തിയ സാധനങ്ങൾ കൊല്ലപ്പെട്ട ഭീകരന് വേണ്ടി എത്തിച്ചതാകാമെന്നാണ് അന്വേഷണ സംഘത്തിന്റെ നിഗമനം. ഇവ ആരാണ് വനത്തിൽ എത്തിച്ചതെന്ന് പരിശോധിക്കുന്നുണ്ട്.
ജമ്മു കശ്മീരിലെ വിവിധ മേഖലകളിൽ, പ്രത്യേകിച്ച് പീർ പഞ്ചാൽ വനമേഖലയിൽ, 35 മുതൽ 40 വരെ പാക് ഭീകരർ സജീവമാണെന്നാണ് സുരക്ഷാ ഏജൻസികളുടെ വിലയിരുത്തൽ. ഇവർക്ക് പ്രാദേശികമായി ഭക്ഷണവും മരുന്നും മറ്റ് സഹായങ്ങളും എത്തിക്കുന്ന ശൃംഖല കണ്ടെത്താനായാൽ ഒളിവിലുള്ള ഭീകരരെ നേരിടുന്നത് എളുപ്പമാകുമെന്നാണ് സുരക്ഷാസേനയുടെ നിഗമനം.
സെപ്റ്റംബർ 29-30 രാത്രിയിലാണ് സൈന്യം, സിആർപിഎഫ്, ബുദ്ഗാം സ്പെഷ്യൽ ഓപ്പറേഷൻസ് ഗ്രൂപ്പ് എന്നിവ സംയുക്തമായി നടത്തിയ നീക്കത്തിൽ ഹാഷിം മൂസയെ വധിച്ചത്. രഹസ്യാന്വേഷണ വിവരങ്ങളുടെ അടിസ്ഥാനത്തിലായിരുന്നു ഓപ്പറേഷൻ.
പാകിസ്ഥാൻ ആസ്ഥാനമായി പ്രവർത്തിച്ചിരുന്ന ലഷ്‌കർ കമാൻഡറായ മുഹമ്മദ് അസഫ് എന്ന ഹാഷിം മൂസ 2022ഓടെയാണ് ജമ്മു കശ്മീരിലെത്തിയതെന്നാണ് സുരക്ഷാ ഏജൻസികളുടെ കണ്ടെത്തൽ. പീർ പഞ്ചാൽ മേഖലയിലെ വനങ്ങളിൽ വർഷങ്ങളോളം പ്രവർത്തിച്ച ശേഷമാണ് കശ്മീർ താഴ്‌വരയിലേക്ക് നീങ്ങിയത്.