മുംബൈ: മഹാരാഷ്‌ട്രയിലെ റായ്ഗഡ് ജില്ലയിലെ ദിവേആഗർ കടൽത്തീരത്ത് വിനോദയാത്രയ്ക്കിടെ എട്ട് വിദ്യാർഥികൾ മുങ്ങിമരിച്ചു. പൂനെയിൽ നിന്ന് വിനോദയാത്രയ്‌ക്കെത്തിയ സംഘത്തിലെ 16 വയസ്സുള്ള വിദ്യാർഥികളാണ് കടലിൽ മുങ്ങിമരിച്ചത്. എട്ട് പേരുടെയും മൃതദേഹങ്ങൾ പിന്നീട് കടലിൽ നിന്ന് കണ്ടെടുത്തു.
പൂനെ ജില്ലയിലെ അലന്ദിയിലുള്ള വിന്നേഴ്സ് അക്കാദമി എന്ന സ്വകാര്യ കോച്ചിംഗ് സെന്ററിൽ നിന്നുള്ള 48 അംഗ സംഘമാണ് ദിവേആഗറിൽ വിനോദയാത്രയ്‌ക്കായി എത്തിയത്. 25 ആൺകുട്ടികളും 17 പെൺകുട്ടികളും ആറ് അധ്യാപകരുമാണ് സംഘത്തിലുണ്ടായിരുന്നത്.
വൈകിട്ട് 5.30ഓടെയാണ് സംഘം ദിവേആഗർ കടൽത്തീരത്തെത്തിയത്. ഇതിനിടെ വിദ്യാർഥികളിൽ എട്ടുപേർ കടലിൽ ഇറങ്ങുകയായിരുന്നു. എന്നാൽ വെള്ളത്തിന്റെ ആഴവും ശക്തമായ കടൽ ഒഴുക്കും കൃത്യമായി മനസ്സിലാക്കാൻ കഴിയാതെ പോയതോടെ ഇവർ ഒഴുക്കിൽപ്പെടുകയായിരുന്നുവെന്നാണ് പോലീസ് വ്യക്തമാക്കിയത്.
നാട്ടുകാരുടെ രക്ഷാപ്രവർത്തനം വിഫലം
വിദ്യാർഥികൾ കടലിൽ അപകടത്തിൽപ്പെട്ടത് ശ്രദ്ധയിൽപ്പെട്ടതോടെ നാട്ടുകാർ ഉടൻ രക്ഷാപ്രവർത്തനത്തിന് ശ്രമിച്ചു. എന്നാൽ ശക്തമായ ഒഴുക്ക് കാരണം രക്ഷാപ്രവർത്തനം വിജയിച്ചില്ല. പിന്നീട് നടത്തിയ തിരച്ചിലിലാണ് എട്ട് വിദ്യാർഥികളുടെയും മൃതദേഹങ്ങൾ കടലിൽ നിന്ന് കണ്ടെത്തിയത്.
മരിച്ച വിദ്യാർഥികളെ തന്മയ് ദത്താത്രേയ വഹിലെ, സുമിത് ഭാരത് ആഹിരെ, പ്രണവ് രാംദാസ് ബൻസോഡെ, കൈവല്യ സതീഷ് വസങ്കർ, രാജ്‌വീർ യുവരാജ് വഹിലെ, യാഷ് കിരൺ വാങ്കഡെ, സോഹം തുകാറാം ഭണ്ഡവൽക്കർ, കൗസ്തുഭ് സന്ദീപ് ദൗണ്ട് എന്നിങ്ങനെയാണ് തിരിച്ചറിഞ്ഞത്.
വിവരമറിഞ്ഞ് ദിഗി സാഗരി ബോർലി പഞ്ചതൻ പൊലീസ് സ്റ്റേഷനിലെ അസിസ്റ്റന്റ് പോലീസ് ഇൻസ്പെക്ടർ സന്തോഷ് ആവതിയും സംഘവും സ്ഥലത്തെത്തി. മൃതദേഹങ്ങൾ പോസ്റ്റ്‌മോർട്ടം നടപടികൾക്കായി ബോർലി പഞ്ചതനിലെ പ്രാഥമിക ആരോഗ്യ കേന്ദ്രത്തിലേക്ക് മാറ്റി.
സംഭവത്തിൽ പോലീസ് വിശദമായ അന്വേഷണം ആരംഭിച്ചിട്ടുണ്ട്. വിനോദയാത്രാ സംഘത്തിന്റെ സുരക്ഷാ ക്രമീകരണങ്ങളും അപകടത്തിലേക്ക് നയിച്ച സാഹചര്യങ്ങളും സംബന്ധിച്ച വിവരങ്ങളും പരിശോധിച്ചുവരികയാണ്.
