മുംബൈ: പ്രശസ്ത ഗസൽ ഗായകൻ തലത് അസീസിന്റെ മുംബൈ ജുഹുവിലെ വീട്ടിൽ തീപിടിത്തം. ഒക്ടോബർ മൂന്നിന് രാത്രി 11 മണിയോടെയാണ് ഇരുനിലവീട്ടിൽ തീപിടിച്ചത്. തലത് അസീസ്, ഭാര്യ ബീന, മക്കളായ ഷായാൻ, അദ്നാൻ, സിക്കന്ദർ സിംഗ് എന്നിവരെ പുക ശ്വസിച്ചതിനെ തുടർന്ന് ആശുപത്രിയിൽ പ്രവേശിപ്പിച്ചു.
ഹാളിലുണ്ടായിരുന്ന എയർ കണ്ടീഷണറിൽ നിന്നാണ് തീ പടർന്നതെന്നാണ് നിഗമനം. താഴത്തെ നിലയിൽ ടെലിവിഷൻ കാണുകയായിരുന്ന തലത് അസീസാണ് ആദ്യം തീ ശ്രദ്ധിച്ചത്. മുകളിലത്തെ നിലയിലായിരുന്നു ഭാര്യ ബീന. നിമിഷങ്ങൾക്കകം തീ കർട്ടനുകളിലേക്ക് പടർന്നു. വീടിനുള്ളിൽ കനത്ത കറുത്ത പുക നിറഞ്ഞതോടെ ബീനയ്‌ക്ക് താഴേക്ക് ഇറങ്ങാൻ കഴിഞ്ഞില്ല. തുടർന്ന് ശുചിമുറിയുടെ ജനലിലൂടെയാണ് ബീനയെ സുരക്ഷിതമായി താഴെയിറക്കിയത്.
തീപിടിത്തത്തിൽ വീട്ടിലെ വിലപിടിപ്പുള്ള നിരവധി സാധനങ്ങൾ നശിച്ചു. തലത് അസീസിന്റെ ഹാർമോണിയങ്ങളും ഭാര്യ ബീനയുടെ നിരവധി ചിത്രങ്ങളും തീയിൽ കേടായി. സമയബന്ധിതമായി രക്ഷാപ്രവർത്തനം നടത്തിയ അഗ്നിരക്ഷാസേന, പൊലീസ്, ആംബുലൻസ് ജീവനക്കാർക്കും സഹായിച്ച അയൽവാസികൾക്കും അദ്ദേഹം നന്ദി അറിയിച്ചു.
ഏകദേശം 40 വർഷമായി കുടുംബം താമസിച്ചുവരുന്ന വീടാണിത്. വീട് താമസയോഗ്യമാകുന്നതുവരെ കുടുംബം ഹോട്ടലിൽ കഴിയുമെന്നാണ് റിപ്പോർട്ട്. ഗസൽ സംഗീതരംഗത്ത് ദീർഘകാലമായി സജീവമായ തലത് അസീസ് ഗായകനെന്നതിന് പുറമെ സംഗീതസംവിധായകനായും നടനായും പ്രവർത്തിച്ചിട്ടുണ്ട്.
