ന്യൂഡൽഹി: ഡൽഹി ദേശീയ തലസ്ഥാന മേഖലയിലും (എൻ.സി.ആർ) ശക്തമായ കാറ്റിനും ഇടിമിന്നലോടുകൂടിയ മഴയ്‌ക്കും സാധ്യതയുള്ളതിനാൽ കാലാവസ്ഥാ നിരീക്ഷണ കേന്ദ്രം റെഡ് അലേർട്ട് പ്രഖ്യാപിച്ചു. ഡൽഹിയിലെ 11 ജില്ലകളിലും ഇന്ന് രാവിലെ ഒൻപത് മണി വരെ റെഡ് അലേർട്ട് തുടരും. മണിക്കൂറിൽ 60 കിലോമീറ്റർ വരെ വേഗതയിൽ ശക്തമായ കാറ്റ് വീശാനും ഇടിമിന്നലോടുകൂടിയ മഴയ്‌ക്കും സാധ്യതയുണ്ടെന്നാണ് മുന്നറിയിപ്പ്.
കാലാവസ്ഥാ മുന്നറിയിപ്പിന്റെ പശ്ചാത്തലത്തിൽ ഡൽഹിയിലും സമീപ നഗരങ്ങളിലും ജാഗ്രതാ നിർദേശം നൽകിയിട്ടുണ്ട്. ശക്തമായ കാറ്റ് മരങ്ങൾ കടപുഴകുന്നതിനും ദുർബലമായ കെട്ടിടങ്ങൾക്ക് കേടുപാടുകൾ സംഭവിക്കുന്നതിനും കാരണമായേക്കാമെന്നതിനാൽ പൊതുജനങ്ങൾ സുരക്ഷാ മുൻകരുതലുകൾ പാലിക്കണമെന്ന് അധികൃതർ നിർദേശിച്ചു.
എൻ.സി.ആറിലെ നഗരങ്ങളിൽ ഓറഞ്ച് അലേർട്ട്
ഡൽഹിക്ക് പുറമേ ദേശീയ തലസ്ഥാന മേഖലയിലെ വിവിധ നഗരങ്ങളിലും മഴയ്‌ക്കും ശക്തമായ കാറ്റിനും സാധ്യതയുണ്ട്. ഹരിയാനയിലെ ഗുരുഗ്രാം, ഫരീദാബാദ്, ഉത്തർപ്രദേശിലെ നോയിഡ, ഗാസിയാബാദ് എന്നിവിടങ്ങളിൽ കാലാവസ്ഥാ നിരീക്ഷണ കേന്ദ്രം ഓറഞ്ച് അലേർട്ട് പ്രഖ്യാപിച്ചിട്ടുണ്ട്.
അനാവശ്യ യാത്രകൾ ഒഴിവാക്കണം
ശക്തമായ കാറ്റും ഇടിമിന്നലും ഉണ്ടാകാൻ സാധ്യതയുള്ളതിനാൽ അനാവശ്യ യാത്രകൾ ഒഴിവാക്കണമെന്ന് കാലാവസ്ഥാ വകുപ്പ് മുന്നറിയിപ്പ് നൽകി. മരങ്ങൾക്കു താഴെയോ ദുർബലമായ കെട്ടിടങ്ങളുടെ സമീപത്തോ അഭയം തേടരുതെന്നും നിർദേശമുണ്ട്. കാലാവസ്ഥാ സാഹചര്യങ്ങൾ വഷളാകുന്ന സാഹചര്യത്തിൽ അധികൃതർ നൽകുന്ന നിർദേശങ്ങൾ കൃത്യമായി പാലിക്കണമെന്നും പൊതുജനങ്ങളോട് ആവശ്യപ്പെട്ടിട്ടുണ്ട്.
ഡൽഹിയിലും സമീപ നഗരങ്ങളിലും യാത്ര ചെയ്യുന്നവർ കാലാവസ്ഥാ മുന്നറിയിപ്പുകൾ ശ്രദ്ധിക്കുകയും സുരക്ഷയ്‌ക്ക് മുൻഗണന നൽകുകയും വേണം.
