കോഴിക്കോട്: കൊയിലാണ്ടിക്കടുത്ത് ചേമഞ്ചേരിയിൽ ട്രെയിൻ തട്ടി മരിച്ച രണ്ടുപേരും തിരുവങ്ങൂർ ഹയർ സെക്കൻഡറി സ്കൂൾ വിദ്യാർഥികളാണെന്ന് തിരിച്ചറിഞ്ഞു. ഒമ്പതാം ക്ലാസ് വിദ്യാർഥിനി അവനിക (14), പ്ലസ് ടു വിദ്യാർഥി പാർഥിബ് (17) എന്നിവരാണ് മരിച്ചത്. ഞായറാഴ്ച വൈകിട്ടുണ്ടായ അപകടത്തിൽ മരിച്ചവരെ തിരിച്ചറിയാൻ സാധിക്കാതിരുന്നത് ബന്ധുക്കൾക്ക് ആശങ്കയുണ്ടാക്കിയിരുന്നു. രാത്രി വൈകിയാണ് ഇരുവരുടെയും മൃതദേഹങ്ങൾ ബന്ധുക്കൾ തിരിച്ചറിഞ്ഞത്.
ചേമഞ്ചേരി റെയിൽവേ സ്റ്റേഷന് സമീപം ഞായറാഴ്ച വൈകിട്ട് 5.45ഓടെയാണ് അപകടം. മംഗളൂരു–ചെന്നൈ മെയിൽ തട്ടിയാണ് ഇരുവരും മരിച്ചത്. ദേശീയപാതയും റെയിൽവേ ട്രാക്കും അടുത്തടുത്തായി കടന്നുപോകുന്ന പ്രദേശത്താണ് സംഭവം നടന്നത്.
മൃതദേഹങ്ങൾ തിരിച്ചറിഞ്ഞത് രാത്രി വൈകി
ട്രെയിൻ തട്ടിയതിനെ തുടർന്ന് മൃതദേഹങ്ങൾ ചിന്നിച്ചിതറിയ നിലയിലായതിനാൽ ആദ്യം മരിച്ചവരെ തിരിച്ചറിയാൻ കഴിഞ്ഞിരുന്നില്ല. ഇരുവരും വീട്ടിൽ തിരിച്ചെത്താതിരുന്നതിനെ തുടർന്ന് ബന്ധുക്കൾ അന്വേഷണം നടത്തി. തുടർന്ന് രാത്രി ഏറെ വൈകി കോഴിക്കോട് മെഡിക്കൽ കോളജ് ആശുപത്രിയിലെ മോർച്ചറിയിലെത്തിയാണ് മൃതദേഹങ്ങൾ തിരിച്ചറിഞ്ഞത്.
മരിച്ച അവനിക വികാസ് നോർത്ത് പാണകുളംകുനി സുരേഷ്–റീന ദമ്പതികളുടെ മകളാണ്. പാർഥിബ് തിരുവങ്ങൂർ കോയിപ്പറമ്പത്ത് സുബീഷിന്റെയും സുനിഷയുടെയും മകനാണ്.
നാടിനെ ദുഃഖത്തിലാഴ്‌ത്തി വിദ്യാർഥികളുടെ മരണം
സ്കൂൾ വിദ്യാർഥികളായ രണ്ടുപേരുടെ അപ്രതീക്ഷിത മരണം പ്രദേശത്തെ ദുഃഖത്തിലാഴ്‌ത്തി. വൈകിട്ട് റെയിൽവേ സ്റ്റേഷന് സമീപമുണ്ടായ അപകടത്തിന്റെ വിവരം പുറത്തുവന്നതിനു പിന്നാലെ മരിച്ചവരെ തിരിച്ചറിയാനുള്ള ശ്രമങ്ങൾ നടത്തിയിരുന്നു. ബന്ധുക്കൾ മോർച്ചറിയിലെത്തി തിരിച്ചറിഞ്ഞതോടെയാണ് മരിച്ചവരുടെ വിവരങ്ങൾ സ്ഥിരീകരിക്കാനായത്.
