ഗുവാഹത്തി: ഇവിഎമ്മിന് പകരം ബാലറ്റ് പേപ്പർ ഉപയോഗിച്ച് തിരഞ്ഞെടുപ്പ് നടത്തണമെന്ന കോൺഗ്രസിന്റെ ആവശ്യത്തിന് കനത്ത മറുപടിയുമായി അസം മുഖ്യമന്ത്രി ഹിമന്ത ബിശ്വ ശർമ്മ. വി. ഡി സതീശൻ അടക്കമുള്ള കോൺഗ്രസ് സർക്കാരുകളെ പിരിച്ചുവിട്ട് തിരഞ്ഞെടുപ്പ് നേരിടാന്‍ കോൺഗ്രസ് തയ്യാറാണേല്‍, താന്‍ അസം മന്ത്രിസഭ പിരിച്ചുവിട്ട് ബാലറ്റ് പേപ്പറില്‍ തെരഞ്ഞെടുപ്പ് നടത്തുമെന്ന് ഹിമന്ത ബിശ്വ ശർമ്മ വെല്ലുവിളിച്ചു.
കേരളം, കർണാടക, തെലങ്കാന തുടങ്ങിയ സംസ്ഥാനങ്ങളിൽ ഇവിഎം ഉപയോഗിച്ച് നടന്ന തിരഞ്ഞെടുപ്പുകളിലൂടെയാണ് കോൺഗ്രസ് അധികാരത്തിലെത്തിയതെന്ന് ഹിമന്ത ബിശ്വ ശർമ്മ ചൂണ്ടിക്കാട്ടി. ഈ സർക്കാരുകൾ രാജിവെച്ച് ബാലറ്റ് പേപ്പർ ഉപയോഗിച്ച് വീണ്ടും തിരഞ്ഞെടുപ്പ് നേരിടാൻ തയ്യാറാകുമോയെന്നും അദ്ദേഹം ചോദിച്ചു.
അഞ്ച് വർഷത്തിലൊരിക്കൽ എസ്‌ഐആർ വേണമെന്ന് ഹിമന്ത
അസം, പശ്ചിമ ബംഗാൾ, ജാർഖണ്ഡ് തുടങ്ങിയ സംസ്ഥാനങ്ങളിലെ ജനസംഖ്യാ ഘടനയിൽ അനധികൃത കുടിയേറ്റം മാറ്റങ്ങൾ സൃഷ്ടിക്കുന്നുവെന്നും ഇത് തുടർന്നുകൊണ്ടിരിക്കുകയാണെന്നും ഹിമന്ത ബിശ്വ ശർമ്മ ചൂണ്ടിക്കാട്ടി. ഇത്തരം സാഹചര്യത്തിൽ വോട്ടർപട്ടികയിൽ നിന്ന് അനർഹരായവരുടെ പേരുകൾ നീക്കം ചെയ്യേണ്ടത് അനിവാര്യമാണെന്നും അദ്ദേഹം പറഞ്ഞു.
രാജ്യത്തെ ജനസംഖ്യാ മാറ്റങ്ങൾ കൃത്യമായി നിരീക്ഷിക്കുന്നതിനും വോട്ടർപട്ടികയുടെ വിശ്വാസ്യത ഉറപ്പാക്കുന്നതിനും സ്പെഷ്യൽ ഇന്റൻസീവ് റിവിഷൻ (എസ്‌ഐആർ) പോലുള്ള നടപടികൾ ആവശ്യമാണെന്നാണ് അദ്ദേഹത്തിന്റെ നിലപാട്. അഞ്ചുവർഷത്തിലൊരിക്കൽ എസ്‌ഐആർ നടത്തണമെന്നും ഹിമന്ത ആവശ്യപ്പെട്ടു. ഇന്ത്യയുടെ ജനാധിപത്യ സംവിധാനം സംരക്ഷിക്കാൻ ഇത് അനിവാര്യമാണെന്നും അദ്ദേഹം അഭിപ്രായപ്പെട്ടു.
രാഹുലും കോൺഗ്രസും വിദേശശക്തികളുടെ താൽപ്പര്യങ്ങൾക്കുവേണ്ടിയാണ് പ്രവർത്തിക്കുന്നതെന്നും രാജ്യത്തെ ജനാധിപത്യ സ്ഥാപനങ്ങളെ ദുർബലപ്പെടുത്താനാണ് ശ്രമിക്കുന്നതെന്നും ഹിമന്ത കൂട്ടിച്ചേർത്തു. ഭരണഘടനാ സ്ഥാപനങ്ങളെ അരാജകത്വത്തിലേക്ക് തള്ളിവിടാനാണ് രാഹുൽ ശ്രമിക്കുന്നതെന്നും അദ്ദേഹം കുറ്റപ്പെടുത്തി.
പൊതുജനപിന്തുണയില്ലാതെ ഭരണസംവിധാനത്തെ അസ്ഥിരപ്പെടുത്താനുള്ള ശ്രമമാണ് കോൺഗ്രസിന്റെ ‘വോട്ട് ചോരി’ പ്രതിഷേധമെന്നും ഹിമന്ത ആരോപിച്ചു. രണ്ടായിരമോ മൂവായിരമോ ആളുകൾ മാത്രമേ പ്രതിഷേധത്തെ പിന്തുണയ്‌ക്കുന്നുള്ളൂവെന്നും അദ്ദേഹം പറഞ്ഞു. പ്രതിഷേധത്തിന് നേതൃത്വം നൽകുന്നത് അസ്വസ്ഥരായ ഏതാനും ‘ദിമാഗി നക്‌സലുകൾ’ ആണെന്നും ഇന്ത്യയുടെ വളർച്ച ആഗ്രഹിക്കാത്തവരാണ് ഇവരെന്നും അസം മുഖ്യമന്ത്രി വിമർശിച്ചു.