മധുരൈ: ദീപാവലിക്ക് മധുരപലഹാരങ്ങൾ അയച്ചുതരണമെന്ന് സോഷ്യൽ മീഡിയയിൽ അഭ്യർത്ഥിച്ച ഇൻഫ്ലുവൻസർക്ക് കിട്ടിയത് എട്ടിന്റെ പണി. തമിഴ്നാട്ടിലെ മധുരൈ സ്വദേശിയായ വീരമണിയുടെ വിലാസത്തിലേക്ക് ടിവി, ഫ്രിഡ്ജ്, വാഷിങ് മെഷീൻ, സ്മാർട്ട്ഫോൺ തുടങ്ങി വിലകൂടിയ ഉൽപ്പന്നങ്ങളാണ് ക്യാഷ് ഓൺ ഡെലിവറിയായി (COD) എത്തുന്നത്. കൂട്ടത്തോടെ ഓർഡറുകൾ എത്തിയയതോടെ ആശങ്കയിലായ വീരമണി, വ്യാജ ഓർഡറുകൾ അവസാനിപ്പിക്കണമെന്ന് ആവശ്യപ്പെട്ട് രംഗത്തെത്തി.
ദീപാവലിക്ക് മധുരപലഹാരം അയച്ചു തരണം എന്ന് പറഞ്ഞാണ് വീരമണി തന്റെ ഫോൺ നമ്പറും വിലാസവും സമൂഹമാധ്യമങ്ങളിൽ പങ്കുവെച്ചത്. ഇതിന് പിന്നാലെ ചിലർ വിലകൂടിയ ഉൽപ്പന്നങ്ങൾ ഓർഡർ ക്യാഷ് ഓൺ ഡെലിവറിയായി വീരമണിയുടെ മേൽവിലാസത്തിലേക്ക് ഓർഡർ ചെയ്യുകയായിരുന്നു 1.69 ലക്ഷം രൂപ വിലവരുന്ന ടെലിവിഷൻ വരെ ഇത്തരത്തിൽ ഓർഡർ ചെയ്തതായി പറയപ്പെടുന്നു.
അരമണിക്കൂറിനിടെ 15 ഓർഡറുകൾ
ഓർഡർ ചെയ്ത സാധനങ്ങൾ വീട്ടിലെത്തിയതോടെയാണ് വീരമണിയുടെ ദുരിതം ആരംഭിച്ചത്. പണം നൽകിയശേഷം മാത്രം കൈമാറുന്ന COD സംവിധാനമായതിനാൽ ഡെലിവറി ജീവനക്കാർ സാധനങ്ങളുമായി വീട്ടിലെത്തുകയായിരുന്നു.
അരമണിക്കൂറിനിടെ 15 ഓർഡറുകൾ എത്തിയതോടെ വീരമണി സമൂഹമാധ്യമങ്ങളിലൂടെ രോഷം പ്രകടിപ്പിച്ചു. ദൂരസ്ഥലങ്ങളിൽനിന്ന് സാധനങ്ങളുമായി എത്തുന്ന ഡെലിവറി ജീവനക്കാരെ അനാവശ്യമായി ബുദ്ധിമുട്ടിക്കരുതെന്നും വ്യാജ ഓർഡറുകൾ അവസാനിപ്പിക്കണമെന്നും അദ്ദേഹം അഭ്യർത്ഥിച്ചു.
സാധാരണ ഗൃഹോപകരണങ്ങൾക്കു പുറമെ ജെസിബി എക്‌സ്‌കവേറ്ററും സൈനിക ടാങ്കുകളും വരെ ഓർഡർ ചെയ്തെന്ന തരത്തിലുള്ള അവകാശവാദങ്ങളും സമൂഹമാധ്യമങ്ങളിൽ പ്രചരിച്ചു. സ്വിഗ്ഗി, സൊമാറ്റോ തുടങ്ങിയ ഭക്ഷണ വിതരണ പ്ലാറ്റ്‌ഫോമുകളിലെ ജീവനക്കാരും വിലാസത്തിലെത്തിയതായി സമീപവാസികൾ പറഞ്ഞതായും റിപ്പോർട്ടുകളുണ്ട്.
നഗരം വിടേണ്ടിവരുമെന്ന് ഇൻഫ്ലുവൻസർ
തുടർച്ചയായ ഓർഡറുകളഉം ഡെലിവറി ജീവനക്കാരുമായുള്ള തർക്കവും വീരമണിയെ വലിയ സമ്മർദത്തിലാക്കി. ലക്ഷക്കണക്കിന് രൂപയുടെ ഓർഡറുകൾ വന്നതിനെത്തുടർന്ന് ആളുകൾ തന്നെ കുറ്റപ്പെടുത്തുകയാണെന്നും അതിനാൽ നഗരം വിട്ടുപോകുന്നതിനെക്കുറിച്ച് ആലോചിക്കുകയാണെന്നും അദ്ദേഹം മറ്റൊരു വിഡിയോയിൽ പറഞ്ഞു.
ഇതിനിടെ, വൃക്ക ദാനം ചെയ്യുന്നോ എന്ന് ചോദിച്ച് പോലും ആളുകൾ വിളിക്കുന്നുണ്ടെന്നും വീരമണി ആരോപിച്ചു. തന്റെ വിലാസം ഉപയോഗിച്ച് ഓർഡറുകൾ നൽകുന്നത് അവസാനിപ്പിക്കണമെന്നാണ് അവസാനത്തെ വീഡിയോയിൽ വീരമണിയുടെ അഭ്യർത്ഥന.
