പാലക്കാട്: വീട്ടുമുറ്റത്ത് കിടന്നുറങ്ങിയതിന്റെ പേരിൽ മാനസികാസ്വാസ്ഥ്യമുള്ള 40കാരനെ ഏഴംഗ സംഘം തല്ലിക്കൊന്നു. തമിഴ്നാട് കേന്ദ്രീകരിച്ച് അന്വേഷണം തുടരുന്ന കേസിൽ മൂലക്കടവ് സ്വദേശി കതിരേശൻ (23) ആണ് പ്രധാന പ്രതി. പലതവണ വിലക്കിയിട്ടും വീട്ടുമുറ്റത്ത് കിടന്നുറങ്ങിയതിലുള്ള വൈരാഗ്യമാണ് കൊലപാതകത്തിന് പിന്നിലെന്നാണ് വിവരം.
മദ്യലഹരിയിലായിരുന്ന സംഘം മരത്തടിയും കല്ലും ഉപയോഗിച്ച് യുവാവിനെ അതിക്രൂരമായി മർദിക്കുകയായിരുന്നു. മുഖത്തും തലയിലും പലതവണ ആഞ്ഞടിച്ചു. നിലത്തുവീണിട്ടും മർദനം തുടർന്നു. അരക്കിലോമീറ്ററോളം പിന്തുടർന്നും ആക്രമിച്ചു. കൊല്ലപ്പെട്ടയാളുടെ ശരീരത്തിൽ 50ലേറെ മുറിവുകളുണ്ടെന്നാണ് റിപ്പോർട്ട്.
തലയ്‌ക്കുള്ളിലുണ്ടായ രക്തസ്രാവമാണ് മരണകാരണമെന്ന് പോസ്റ്റ്മോർട്ടം റിപ്പോർട്ടിൽ വ്യക്തമാക്കുന്നു. കേസിൽ കതിരേശനെ കൂടാതെ നവീൻ (24), കാർത്തിക് (26), സഞ്ജയ് (27), പ്രശാന്ത് (35), മണികണ്ഠൻ (25), സൂര്യപ്രകാശ് (22) എന്നിവരും പ്രതികളാണ്. കൊല്ലപ്പെട്ടയാളെ ഇതുവരെ തിരിച്ചറിഞ്ഞിട്ടില്ല. കള്ളുഷാപ്പിൽനിന്ന് ഇറങ്ങിയതിന് പിന്നാലെയാണ് സംഘമാണ് ആക്രമണം നടത്തിയത്. ഇയാളുടെ വ്യക്തിവിവരങ്ങൾ കണ്ടെത്തുന്നതിനും സംഭവവുമായി ബന്ധപ്പെട്ട കൂടുതൽ വിവരങ്ങൾ ശേഖരിക്കുന്നതിനുമായി തമിഴ്നാട് കേന്ദ്രീകരിച്ച് അന്വേഷണം തുടരുകയാണ്.
