കൊടുങ്ങല്ലൂർ: എരിയാട് 18കാരൻ മുഹമ്മദ് അസ്ലം ആത്മഹത്യ ചെയ്ത സംഭവത്തിൽ പുതിയ വഴിത്തിരിവ്. പ്രായപൂർത്തിയാകാത്ത പെൺകുട്ടിയെ അസ്ലം ഭീഷണിപ്പെടുത്തുന്നതിന്റെ ഓഡിയോ സന്ദേശങ്ങൾ പെൺകുട്ടിയുടെ കുടുംബം പുറത്തുവിട്ടു. പെൺകുട്ടിയുടെ സ്വകാര്യ ദൃശ്യങ്ങൾ ഉപയോഗിച്ച് ഭീഷണിപ്പെടുത്തി പണവും സ്വർണവും തട്ടിയെടുത്തെന്ന പരാതിയിലാണ് അസ്ലത്തിനും സഹോദരൻ സഹലിനുമെതിരെ പോലീസ് കേസെടുത്തത്. കേസിൽ സഹൽ റിമാൻഡിലാണ്.
പെൺകുട്ടിയെ ഭീഷണിപ്പെടുത്തിയിട്ടില്ലെന്നും പോലീസ് കസ്റ്റഡിയിലെ മർദനത്തെ തുടർന്നാണ് മകൻ ആത്മഹത്യ ചെയ്തതെന്നുമായിരുന്നു അസ്ലമിന്റെ പിതാവ് നൗഷാദ് ആരോപിച്ചിരുന്നു. എന്നാൽ ചോദ്യം ചെയ്യലിനുശേഷം അസ്ലമിനെ വീട്ടുകാർക്കൊപ്പം വിട്ടയച്ചെന്നാണ് പോലീസ് പറയുന്നത്. ഒക്ടോബർ ആറിനാണ് അസ്ലമിനെ വീട്ടിൽ തൂങ്ങിമരിച്ച നിലയിൽ കണ്ടെത്തിയത്.
കുടുംബം പുറത്തുവിട്ട ഓഡിയോയിൽ പെൺകുട്ടിയുടെ ചിത്രം പുറത്തുവിടുമെന്ന് ഭീഷണിപ്പെടുത്തുന്നതും പണം ആവശ്യപ്പെടുന്നതും കേൾക്കാം. ‘പുറത്തുവിടട്ടെ, ഉറപ്പല്ലേ, ആ ചിത്രം എന്താണെന്ന് നിനക്കറിയാലോ’ എന്നാണ് പെൺകുട്ടിയോട് അസ്ലം ഭീഷണിപ്പെടുത്തിക്കൊണ്ട് ചോദിക്കുന്നത്. ബന്ധുവിനോട് സംസാരിക്കുന്നതാണ് മറ്റൊരു ഓഡിയോ. ‘ അവളുടെ ചേച്ചി എന്തും പറയും. അവളുടെ കയ്യിൽ ഒരുപാട് പണമുണ്ട്. ഞാൻ പണം കൂട്ടിച്ചോദിക്കും. ചിലപ്പോൾ മൂന്ന് ലക്ഷമൊക്കെ ഞാൻ ചോദിക്കും. അതിനുള്ള വകുപ്പ് ഞാൻ ഉണ്ടാക്കും’- ഓഡിയോ ക്ലിപ്പിൽ പറയുന്നത് കേൾക്കാം.
അസ്ലം പെൺകുട്ടിയുടെ വീട്ടിലെത്തുന്നതിന്റെ ദൃശ്യങ്ങളും കുടുംബം പുറത്തുവിട്ടിട്ടുണ്ട്. പെൺകുട്ടിയുടെ വീട്ടിലേക്ക് അസ്ലം എത്തുന്നതും ഗേറ്റ് കടന്ന് വീട്ടിനുള്ളിലേക്ക് പോകുന്നതുമാണ് ആ വീഡിയോ. ഇത് പെൺകുട്ടിയുടെ വിദേശത്തുള്ള സഹോദരിക്ക് അയച്ചുകൊടുക്കുകയും പണം നൽകണമെന്ന് അസ്ലം ഭീഷണിപ്പെടുത്തുകയും ചെയ്തുവെന്ന് പെൺകുട്ടിയുടെ കുടുംബം പറയുന്നു. പണവും സ്വർണവും കൈമാറിയതുമായി ബന്ധപ്പെട്ട തെളിവുകൾ ലഭിച്ചതായും പോലീസ് അറിയിച്ചിട്ടുണ്ട്. സംഭവത്തിൽ അന്വേഷണം തുടരുകയാണ്.
