തിരുവനന്തപുരം: ശബരിമല തീർത്ഥാടന കാലം അടുത്തിരിക്കെ, തിരുവനന്തപുരം കെഎസ്ആർടിസി ഡിപ്പോയിൽ ഡ്രൈവർമാരുടെ ക്ഷാമം ആശങ്ക സൃഷ്ടിക്കുന്നു. ആവശ്യത്തിന് ജീവനക്കാരെ ഉറപ്പാക്കാതെ ശബരിമല സ്പെഷ്യൽ സർവീസുകൾ ഉൾപ്പെടെയുള്ള അധിക സർവീസുകൾ എങ്ങനെ നടത്തുമെന്ന ആശങ്കയിലാണ് അധികൃത‍‌ർ.
ശബരിമല തീർത്ഥാടനത്തോടനുബന്ധിച്ച് കൂടുതൽ സർവീസുകൾ നടത്തേണ്ട സമയത്ത് തിരുവനന്തപുരം കെഎസ്ആർടിസി തമ്പാനൂർ ഡിപ്പോയിൽ മാത്രം 66 ഡ്രൈവർമാരുടെ കുറവാണ് നിലവിലുള്ളത്. താൽക്കാലിക ഡ്രൈവർമാരുടെ നിയമനവും അവരുടെ വേതന വർദ്ധനവുമായി ബന്ധപ്പെട്ട പ്രശ്നങ്ങൾ ഇനിയും പരിഹരാമില്ലാതെ നീളുകയാണ്. ഇതോടെ യാതൊരു ബുദ്ധിമുട്ടുമില്ലാതെ സർവീസുകൾ ഉറപ്പാക്കുമെന്ന കെഎസ്ആർടിസിയുടെയും സർക്കാരിന്റെയും പ്രഖ്യാപനങ്ങൾ വെറും വാക്കുകളായി ഒതുങ്ങിയേക്കും.
താൽക്കാലിക ഡ്രൈവർമാർക്ക് നിലവിൽ 715 രൂപയാണ് ദിവസ വേതനമായി നിശ്ചയിച്ചിരിക്കുന്നത്. എന്നാൽ ഈ കുറഞ്ഞ തുകയും പ്രതികൂലമായ ജോലി സാഹചര്യങ്ങളും കാരണം പലരും ജോലി ഉപേക്ഷിക്കുന്ന സ്ഥിതിയുണ്ട്. താൽക്കാലിക ഡ്രൈവർമാരുടെ വേതനം 900 രൂപയായി ഉയർത്തണമെന്നാണ് യൂണിയനുകളുടെ പ്രധാന ആവശ്യം. സ്വിഫ്റ്റ് (SWIFT) ബസുകളിലെ ഒഴിവുകളിലേക്കും ആവശ്യത്തിന് ജീവനക്കാരെ കണ്ടെത്താൻ കഴിയാത്തത് പ്രതിസന്ധി കൂടുതൽ വഷളാക്കുന്നുണ്ട്.
ശബരിമലയിലേക്ക് എത്തുന്ന കോടിക്കണക്കിന് ഭക്തർക്ക് സുഗമമായ ഗതാഗത സൗകര്യം ഒരുക്കേണ്ടത് സർക്കാരിന്റെയും കെഎസ്ആർടിസിയുടെയും ഉത്തരവാദിത്വമാണെന്ന് കെഎസ്ആർടിസി എംപ്ലോയി സംഘ് ബിഎംഎസ് സംസ്ഥാന ജനറൽ സെക്രട്ടറി അജയകുമാർ വ്യക്തമാക്കി. കേരള സർക്കാരിന്റെ കീഴിൽ പ്രവർത്തിക്കുന്ന ഒരു സ്ഥാപനം എന്ന നിലയിൽ ഭക്തജനങ്ങളോടും പൊതുജനങ്ങളോടുമുള്ള ബാധ്യത കെഎസ്ആർടിസി നിറവേറ്റണമെന്നും അദ്ദേഹം ആവശ്യപ്പെട്ടു. മണ്ഡലകാലം ആരംഭിക്കുമ്പോഴെങ്കിലും ഈ പ്രതിസന്ധികൾ പരിഹരിച്ച് സുഗമമായ ശബരിമല യാത്ര സാധ്യമാകുമെന്ന പ്രതീക്ഷയിലാണ് ഭക്തർ.
