ന്യൂഡൽഹി : എടിഎമ്മുകൾ വഴി വായ്പ ലഭ്യമാക്കാൻ ബാങ്കുകൾ സംവിധാനം ഒരുക്കുന്നു. ക്രെഡിറ്റ് കാർഡ് കൈവശമുള്ളവർക്ക് എടിഎമ്മിന്‍റെ സഹായത്തോടെ ആവശ്യമുള്ള തുക പിൻവലിക്കാനുള്ള സംവിധാനമാണ് നിലവിൽ വരുന്നത്.
ബാങ്കുകൾ വഴി നടപ്പാക്കുന്ന സേവനങ്ങളെല്ലാം എടിഎമ്മുകൾ വഴി ലഭ്യമാക്കാനാണ് റിസർവ്വ് ബാങ്ക് ഒരുങ്ങുന്നത് . ഇതിന്‍റെ ഭാഗമായി എല്ലാ ബാങ്കുകൾക്കും എടിഎം മുഖേന സേവനങ്ങൾ നടത്താൻ ആർബിഐ കഴിഞ്ഞ ദിവസം അനുമതി നൽകി . മുൻ നിര ബാങ്കുകളുടെ നിർദേശം പരിഗണിച്ചാണ് ആർബിഐ അനുമതി നൽകിയിരിക്കുന്നത് .
ഇതോടെ ഇൻഷുറൻസ് , ലോൺ തുടങ്ങിയ സേവനങ്ങളെല്ലാം എളുപ്പത്തിൽ നടപ്പാക്കാം .
ഇപ്പോൾ ഉപയോഗിക്കുന്ന അതേ എടിഎം മെഷീനുകൾ ഉപയോഗിച്ചാവും ലോൺ നൽകുന്ന സംവിധാനം ലഭ്യമാക്കുന്നത് . ക്രെഡിറ്റ് കാർഡുകൾ ലഭിക്കാനുള്ള അപേക്ഷയും ഇനി എടിഎം വഴി നൽകാൻ കഴിയും. പണം നിക്ഷേപിക്കാനും ,പിൻവലിക്കാനും തുടങ്ങീ നിലവിലെ എടിഎമ്മുകളുടെ ആവശ്യങ്ങൾക്ക് പുറമേയാണ് ഈ സേവനങ്ങളും ലഭ്യമാകുക . പുതിയ സംവിധാനങ്ങൾ നടപ്പാക്കുന്നതിൽ മറ്‍റ് ബാങ്കുകളുടെ അഭിപ്രായവും ആർബിഐ തേടിയിരുന്നു .
സ്വകാര്യ ബാങ്കുകൾ ഉൾപ്പെടെ എല്ലാ ബാങ്കുകളും അനുകൂല നിലപാടാണ് സ്വീകരിച്ചിരിക്കുന്നത് . ഗ്രാമീണ മേഖലകളിൽ കൂടുതൽ എടിഎമ്മുകൾ സ്ഥാപിക്കണമെന്ന നിർദ്ദേശവും റിസർവ്വ് ബാങ്ക് സ്വകാര്യ ബാങ്കുകൾക്ക് നൽകിയിട്ടുണ്ട് .
