മെല്ബണ്: ടെന്നീസില് വാതുവെയ്പുണ്ടെന്ന റിപ്പോര്ട്ടിന് പിന്നാലെ ഇതിനെ സാധൂകരിച്ച് സെര്ബിയന് ടെന്നീസ് താരം നൊവാക് ജ്യോക്കോവിച്ച്. വാതുവെയ്പുകാര് വര്ഷങ്ങള്ക്ക് മുന്പ് തന്നെ സമീപിച്ചിരുന്നതായി ജ്യോക്കോവിച്ച് പറഞ്ഞു. കരിയറിന്റെ ആദ്യ സമയമായിരുന്നു അത്. അന്ന് തന്റെ ഒപ്പം നിന്നിരുന്ന ആളുകള് വഴിയാണ് വാതുവെയ്പുകാര് സമീപിച്ചതെന്നും ജ്യോക്കോവിച്ച് വെളിപ്പെടുത്തി.
വിംബിള്ഡണ് ഉള്പ്പെടെയുള്ള ഗ്രാന്ഡ് സ്ലാം ടൂര്ണമെന്റുകളില് വാതുവെയ്പ് നടക്കുന്നതായി ബിബിസി റിപ്പോര്ട്ട് ചെയ്തിരുന്നു. 2007 ല് നടന്ന ഒരു അന്വേഷണത്തിന്റെ ചുവടു പിടിച്ചായിരുന്നു റിപ്പോര്ട്ട്. സംശയത്തിന്റെ നിഴലില് നില്ക്കുന്ന എട്ട് കളിക്കാര് ഇന്ന് ആരംഭിക്കുന്ന ഓസ്ട്രേലിയന് ഓപ്പണില് മത്സരിക്കുന്നുണ്ടെന്നും റിപ്പോര്ട്ടില് വ്യക്തമാക്കിയിരുന്നു. ഇതിന് പിന്നാലെയാണ് റിപ്പോര്ട്ടിനെ സാധൂകരിച്ച് ജ്യോക്കോവിച്ചിന്റെ വെളിപ്പെടുത്തലും ഉണ്ടായിരിക്കുന്നത്.
ക്രിക്കറ്റിനെയും ഫുട്ബോളിനെയും അപേക്ഷിച്ച് കോഴ മുക്തമായിട്ടാണ് ടെന്നീസ് പൊതുവെ അറിയപ്പെട്ടിരുന്നത്. ഇതാണ് പുതിയ വാര്ത്തകളോടെ തിരുത്തപ്പെടുന്നത്. 2007 ല് സെന്റ് പീറ്റേഴ്സ് ബര്ഗില് നടന്ന കളിക്ക് പിന്നാലെയാണ് വാതുവെയ്പുകാര് സമീപിച്ചതെന്ന് ജ്യോക്കോവിച്ച് വെളിപ്പെടുത്തി. ആദ്യ റൗണ്ട് മത്സരത്തില് ദക്ഷിണകൊറിയയുടെ ചൂങ്് ഹിയോനെ പരാജയപ്പെടുത്തിയതിന് പിന്നാലെയായിരുന്നു ഇത്. അടുത്ത റൗണ്ടില് തോല്വി വഴങ്ങിയാല് രണ്ട് ലക്ഷം ഡോളര് നല്കാമെന്നായിരുന്നു വാഗ്ദാനം.
എന്നാല് പിന്നീട് ഇത്തരം അവസ്ഥ തനിക്ക് ഉണ്ടായിട്ടില്ലെന്നും ആരും സമീപിച്ചിട്ടില്ലെന്നും ജ്യോക്കോവിച്ച് പറഞ്ഞു. 10 തവണ ഗ്രാന്ഡ് സ്ലാം നേടിയ താരമാണ് ജ്യോക്കോവിച്ച്. ആദ്യ അന്പത് റാങ്കിലുള്ള താരങ്ങള് ഉള്പ്പെടെയുള്ളവര് ഒത്തുകളിയുടെ ഭാഗമാണെന്നായിരുന്നു ബിബിസിയുടെ റിപ്പോര്ട്ടില് ചൂണ്ടിക്കാട്ടിയിരുന്നത്.