ഓസ്ലോ: 2026 ഫിഫ ലോകകപ്പില് നോര്വേയെ ക്വാര്ട്ടര് ഫൈനല് വരെ നയിച്ച എര്ലിങ് ഹാളണ്ട്, നാട്ടിലേക്ക് മടങ്ങിയെത്തിയപ്പോള് ഫുട്ബോള് ആരാധകരുടെ ശ്രദ്ധ പിടിച്ചുപറ്റിയത് മറ്റൊരാളാണ്. വിസ്കി കുപ്പി പിടിച്ചിരിക്കുന്ന ടാക്സിഡെര്മി റാക്കൂണിനൊപ്പമാണ് നോര്വീജിയന് സൂപ്പര്താരം ഓസ്ലോ വിമാനത്താവളത്തിലെത്തിയത്. ഇംഗ്ലണ്ടിനോട് 2-1ന് ക്വാര്ട്ടര് ഫൈനലില് പരാജയപ്പെട്ട് ലോകകപ്പില് നിന്ന് പുറത്തായ ശേഷമാണ് ഹാളണ്ട് നാട്ടിലെത്തിയത്.
വിമാനത്തില് നിന്ന് റാക്കൂണിനൊപ്പം ഇറങ്ങുന്ന ചിത്രങ്ങളും വീഡിയോകളും സമൂഹമാധ്യമങ്ങളില് വൈറലായതോടെ താരം തന്നെ തമാശയോടെ പ്രതികരിച്ചു. ‘ഇത് എന്നെ പിന്തുടര്ന്ന് വീട്ടിലെത്തി’ എന്നായിരുന്നു എക്സില് ഹാളണ്ടിന്റെ കുറിപ്പ്. റാക്കൂണിന് പേരിടാന് ആരാധകരുടെ സഹായവും താരം തേടി. ഇന്സ്റ്റഗ്രാം സ്റ്റോറിയിലൂടെ ‘കൗബോയ്’, ‘റേഞ്ചര്’, ‘ടെക്സ്’, ‘ആര്.ഒ.ഡബ്ല്യ (Racoon On Wheels)’ എന്നീ നാല് പേരുകളില് ഒന്ന് തിരഞ്ഞെടുക്കാന് ഹാളണ്ട് ആരാധകരോട് ആവശ്യപ്പെട്ടു.
ഡിസൈനര് ബാഗുകളോടുള്ള താല്പര്യത്തിന് പേരുകേട്ട ഹാളണ്ട്, പ്രാഡയുടെ ബാഗുമായാണ് വിമാനത്തില് നിന്ന് പുറത്തിറങ്ങിയത്. ഇതിനൊപ്പം കൈയിലുണ്ടായിരുന്ന റാക്കൂണാണ് ആരാധകരുടെ കൗതുകത്തിന് കാരണമായത്. പിന്നീട് ആരാധകര് നടത്തിയ അന്വേഷണത്തിലാണ് ഇത് അമേരിക്കയിലെ ടെക്സസിലുള്ള Wild Bill’s Western Store എന്ന കടയില് വില്ക്കുന്ന ‘Whiskey Raccoon’ ആണെന്ന് കണ്ടെത്തിയത്. ഏകദേശം 750 ഡോളര് വിലയുള്ള ഈ റാക്കൂണ് ലോകകപ്പിനിടെ ടെക്സസില് നിന്നാണ് ഹാലളണ്ട് വാങ്ങിയതെന്നാണ് റിപ്പോര്ട്ടുകള്. താരം മുമ്പ് സ്നാപ്ചാറ്റില് പങ്കുവെച്ച വീഡിയോയിലും ഇതേ റാക്കൂണിനെ കാണിച്ചിരുന്നു.
ലോകകപ്പില് നോര്വേയുടെ ചരിത്രപരമായ ക്വാര്ട്ടര് ഫൈനല് പ്രവേശനത്തിന് നേതൃത്വം നല്കിയ ഹാളണ്ട്, മൈതാനത്തെ പ്രകടനത്തിന് പുറമെ ഈ രസകരമായ സംഭവത്തിലൂടെയും വീണ്ടും സമൂഹമാധ്യമങ്ങളില് ചര്ച്ചാവിഷയമായി.
