മലപ്പുറം: ജില്ലാ കലോത്സവത്തില് നൃത്തഅദ്ധ്യാപകരും വിദ്യാര്ത്ഥികളുടെ രക്ഷിതാക്കളും ഒരു ലക്ഷം രൂപ വരെ കൈക്കൂലി നല്കാന് ശ്രമിച്ചുവെന്ന് വിധികര്ത്താവിന്റെ വെളിപ്പെടുത്തല്. മലപ്പുറം അരീക്കോട് നടന്ന ജില്ലാ കലോത്സവം അഴിമതിയുടെ മേളയായിരുന്നുവെന്നും മോഹിനിയാട്ടത്തിന്റെ വിധികര്ത്താവ് ഷാന് വി.എസ്. പ്രതികരിച്ചു. നടി മഞ്ജുവാര്യര് സ്പോണ്സര് ചെയ്ത വിദ്യാര്ത്ഥി സംസ്ഥാന കലോത്സവം കാണരുതെന്ന് ചിലര്ക്ക് നിര്ബന്ധമുണ്ടായിരുന്നുവെന്നും അദ്ദേഹം പറഞ്ഞു.
വിളിച്ചു വരുത്തി കുച്ചിപ്പുടി അദ്ധ്യാപകനായ തന്നെ മോഹിനിയാട്ടത്തിന് മാര്ക്കിടാന് നിര്ബന്ധിക്കുകയായിരുന്നു. മോഹിനിയാട്ടം അറിയില്ലെന്നു പറഞ്ഞപ്പോള് അറിവുള്ള മറ്റു വിധികര്ത്താക്കള് ഉണ്ടാകുമെന്ന് പറഞ്ഞു. എന്നാല് വിജയികളെയെല്ലാം മുന്കൂട്ടി തീരുമാനിച്ചതുപോലെയാണ് മറ്റു വിധികര്ത്താക്കള് പെരുമാറിയത്. വിധികര്ത്താക്കളുടെ മുറിയില് ഏതു വിദ്യാര്ത്ഥിക്ക് സമ്മാനം കൊടുക്കണമെന്നും ആരെയെല്ലാം ചവിട്ടിതാഴ്ത്തണമെന്നും മുന്കൂട്ടി നിശ്ചയിച്ചിരുന്നുവെന്നും തൃശ്ശൂര് സ്വദേശിയായ ഷാന്. വി.എസ്. പറഞ്ഞു.
നൃത്ത അദ്ധ്യാപകര് തന്നെയാണ് വിധികര്ത്താക്കളെ തീരുമാനിക്കുന്നത്. ഒന്നാം സമ്മാനത്തിന് ഒരു ലക്ഷം രൂപയും രണ്ടാം സമ്മാനത്തിന് 50000രൂപയും തനിക്ക് വാഗ്ദാനം ചെയ്തിരുന്നു. എന്നാല് ഇത് സ്വീകരിച്ചില്ല. പക്ഷെ മറ്റു വിധികര്ത്താക്കള് ഈ പണം വാഗ്ദാനം ചെയ്ത നൃത്തഅദ്ധ്യാപകന്റെ വിദ്യാര്ത്ഥിക്കു വേണ്ടി അവസാനനിമിഷം വരെ സമ്മര്ദ്ദം ചെലുത്തി. മറ്റു വഴിയില്ലാതെ മോഹിനിയാട്ടത്തിന് മാര്ക്കിടാതെ ഇറങ്ങി പോവുകയായിരുന്നു.
നടി മഞ്ജുവാര്യര് സ്പോണ്സര് ചെയ്ത ആതിര എന്ന ഹൈസ്കൂള് കലാകാരി സംസ്ഥാന കലോത്സവം കാണരുതെന്ന് ചിലര്ക്ക് നിര്ബന്ധമുണ്ടായിരുന്നുവെന്നും അദ്ദേഹം പറഞ്ഞു.
നൃത്തത്തെക്കുറിച്ച് യാതൊന്നുമറിയാത്ത വിധികര്ത്താക്കളില് പലരും ലക്ഷകണക്കിന് രൂപയാണ് കോഴവാങ്ങിയിട്ടുള്ളത്. 150ലേറെ വിദ്യാര്ത്ഥികളെ നൃത്തം പഠിപ്പിക്കുന്ന ഷാന് ആദ്യമായാണ് ജില്ലാ കലോത്സവത്തില് വിധികര്ത്താവാകുന്നത്.
കലോത്സവങ്ങള് പണത്തിന്റെ മേളയായി മാറുന്നുവെന്ന ആരോപണത്തിനിടയിലാണ് ഷാനിന്റെ ഏറെ ഗൗരവമുള്ള വെളിപ്പെടുത്തല്.