തിരുവനന്തപുരം: അന്തരിച്ച പ്രമുഖ നടന് കലാഭവന് മണിയുടെ നിര്യാണത്തില് അനുശോചനപ്രവാഹം. പ്രധാനമന്ത്രി നരേന്ദ്രമോദി മുതല് മലയാള, തമിഴ് സിനിമാലോകത്തെ മുന്നിര താരങ്ങളും രാഷ്ട്രീയ സാംസ്കാരിക മേഖലകളിലെ പ്രമുഖരും പ്രിയനടന്റെ വേര്പാടില് ദു:ഖം രേഖപ്പെടുത്തി.
പ്രതീക്ഷാഭരിതമായ കലാജീവിതത്തിനാണ് അകാലത്തില് വിരാമമായതെന്ന് പ്രധാനമന്ത്രി അനുശോചന സന്ദേശത്തില് പറഞ്ഞു. ജനകീയനും, ബഹുമുഖ പ്രതിഭയുമായിരുന്ന മണിയുടെ വിയോഗത്തില് കുടുംബാംഗങ്ങള്ക്കും, ആരാധകര്ക്കും ഒപ്പം അനുശോചനം രേഖപ്പെടുത്തുന്നതായി അദ്ദേഹം ട്വിറ്റര് സന്ദേശത്തില് പറഞ്ഞു.
മണിക്കൊപ്പം അഭിനയിച്ച വേഷങ്ങള് ഓര്ത്തെടുത്താണ് സിനിമാ താരങ്ങള് പലരും ആ അഭിനയപ്രതിഭയുടെ അപ്രതീക്ഷിത വേര്പാട് പങ്കുവെച്ചത്. വാര്ത്തയിലെ അവിശ്വസനീയതയും പലരുടെയും അഭിപ്രായങ്ങളില് നിറഞ്ഞുനിന്നു. ബെത്്ലഹേമില് തന്റെ ഒപ്പം അഭിനയിച്ച മോനായിക്ക് ആദരാഞ്ജലി എന്നായിരുന്നു സുരേഷ് ഗോപി ഫെയ്സ്ബുക്കില് കുറിച്ച വാക്കുകള്. മണിച്ചേട്ടനും പോയി എന്ന വാക്കുകളിലൂടെയാണ് ജയസൂര്യ അവിശ്വസനീയത പങ്കുവെച്ചത്. വിശ്വസിക്കാന് പറ്റുന്നില്ലെന്ന വാക്കുകളിലൂടെയാണ് ജയറാം മണിയുടെ അപ്രതീക്ഷിത മരണവാര്ത്ത കുറിച്ചത്.
മണിയുമൊത്തുള്ള നീണ്ട ഓര്മകളായിരുന്നു മമ്മൂട്ടി ഫെയ്സ്ബുക്കില് പങ്കുവെച്ചത്. സഹോദരനെയാണ് തനിക്ക് നഷ്ടമായതെന്ന് പറഞ്ഞ മമ്മൂട്ടി തമിഴില് മണിയുടെ അരങ്ങേറ്റത്തിന് വഴിയൊരുക്കിയതും ഓര്ത്തെടുക്കുന്നു. ആമേനിലെ ലൂയിപാപ്പന് എന്ന മണിയുടെ കഥാപാത്രത്തിന്റെ ചിത്രം സഹിതമായിരുന്നു നടനും സംവിധായകനുമായ ജോയ് മാത്യു മണിയുടെ വേര്പാട് പങ്കുവെച്ചത്. മോഹന്ലാല്, മഞ്ജു വാര്യര്, പൃഥ്വിരാജ്, ഇന്ദ്രജിത്, കുഞ്ചാക്കോ ബോബന് തുടങ്ങിയവരും തമിഴ് സിനിമാ ലോകത്തെ മുന്നിര താരങ്ങളും മണിയുടെ വേര്പാടില് സോഷ്യല് മീഡിയയിലൂടെ ദു:ഖം പങ്കുവെച്ചു.
മുഖ്യമന്ത്രി ഉമ്മന്ചാണ്ടി, പ്രതിപക്ഷ നേതാവ് വി.എസ് അച്യുതാനന്ദന് ബിജെപി സംസ്ഥാന അദ്ധ്യക്ഷന് കുമ്മനം രാജശേഖരന്, സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്, പോളിറ്റ് ബ്യൂറോ അംഗം പിണറായി വിജയന് തുടങ്ങിയവരും മണിയുടെ വിയോഗത്തില് അനുശോചനം രേഖപ്പെടുത്തി.
