ഒഡെന്‍സെ: ഡെന്മാര്‍ക്കിന്റെ വെറ്ററന്‍ മിഡ്ഫീല്‍ഡര്‍ ക്രിസ്റ്റ്യന്‍ എറിക്‌സണ്‍ കളിക്കളത്തില്‍ വീണ്ടും കുഴഞ്ഞുവീണു. യുക്രൈനെതിരെയുള്ള ഡെന്മാര്‍ക്കിന്റെ അന്താരാഷ്‌ട്ര സൗഹൃദ മത്സരത്തിനിടയിലാണ് നാടകീയ സംഭവങ്ങള്‍ അരങ്ങേറിയത്. പോരാട്ടത്തിന്റെ 65-ാം മിനിറ്റില്‍ താരം അപ്രതീക്ഷിതമായി ഗ്രൗണ്ടില്‍ പതിക്കുകയായിരുന്നു. ഇതിനെത്തുടര്‍ന്ന് മത്സരം താല്‍ക്കാലികമായി നിര്‍ത്തിവെക്കുകയും പിന്നീട് പൂര്‍ണ്ണമായി ഉപേക്ഷിക്കാന്‍ അധികൃതര്‍ തീരുമാനിക്കുകയുമായിരുന്നു.
താരത്തിന്റെ നിലവിലെ ആരോഗ്യനില തൃപ്തികരമാണെന്ന് ഡാനിഷ് ഫുട്‌ബോള്‍ അസോസിയേഷന്‍ പിന്നീട് ഔദ്യോഗികമായി അറിയിച്ചു. കുഴഞ്ഞുവീണ നിമിഷങ്ങളില്‍ 34-കാരനായ എറിക്‌സണ്‍ അല്പനേരം അബോധാവസ്ഥയിലായെങ്കിലും, പിന്നീട് സ്വയം നടന്നുതന്നെയാണ് അദ്ദേഹം മൈതാനം വിട്ടത്. ഡെന്മാര്‍ക്ക് ദേശീയ ജേഴ്‌സിയില്‍ തന്റെ 151-ാം അന്താരാഷ്‌ട്ര മത്സരത്തില്‍ കളിച്ചുകൊണ്ടിരിക്കെയായിരുന്നു എറിക്‌സന് ഈ അവസ്ഥയുണ്ടായത്.
മുമ്പ് ടോട്ടനത്തിനും മാഞ്ചസ്റ്റര്‍ യുണൈറ്റഡിനുമായി ബൂട്ട് കെട്ടിയിട്ടുള്ള എറിക്‌സണ്‍, 2021-ലെ യൂറോ കപ്പില്‍ ഫിന്‍ലന്‍ഡിനെതിരെയുള്ള മത്സരത്തിനിടയിലാണ് സമാനമായ രീതിയില്‍ ഹൃദയാഘാതത്തെ തുടര്‍ന്ന് മൈതാനത്ത് വീണത്. അന്ന് ലോകമെമ്പാടുമുള്ള ഫുട്‌ബോള്‍ ആരാധകരെ ഈ സംഭവം പിടിച്ചുലച്ചിരുന്നു. ആ അപകടത്തിന് ശേഷം ഹൃദയമിടിപ്പ് നിയന്ത്രിക്കുന്നതിനായി അദ്ദേഹത്തിന്റെ ശരീരത്തില്‍ ഐ.സി.ഡി (ഇംപ്ലാന്റബിള്‍ കാര്‍ഡിയോവെര്‍ട്ടര്‍ ഡിഫിബ്രിലേറ്റര്‍) എന്ന ഉപകരണം ഘടിപ്പിച്ചു. എന്നാല്‍ കഠിനമായ മെഡിക്കല്‍ അതിജീവനത്തിലൂടെ അദ്ദേഹം കളിക്കളത്തിലേക്ക് ശക്തമായ തിരിച്ചുവരവ് നടത്തി.
യൂറോ കപ്പിലെ ആ ദുരന്തത്തിന് ശേഷം എട്ട് മാസത്തെ വിശ്രമം കഴിഞ്ഞ് 2022-ല്‍ ബ്രെന്റ്‌ഫോര്‍ഡ് ക്ലബിലൂടെയാണ് എറിക്‌സണ്‍ തന്റെ കളിജീവിതം പുനരാരംഭിച്ചത്. പിന്നീട് മൂന്ന് സീസണുകളില്‍ മാഞ്ചസ്റ്റര്‍ യുണൈറ്റഡ് നിരയിലും താരം സജീവമായിരുന്നു. കഴിഞ്ഞ ട്രാന്‍സ്ഫര്‍ ജാലകത്തില്‍ ജര്‍മ്മന്‍ ബുണ്ടസ് ലിഗ ക്ലബായ വോള്‍ഫ്‌സ്ബര്‍ഗിലേക്ക് മാറിയ അദ്ദേഹം, ഈ സീസണില്‍ ടീമിനായി 34 മത്സരങ്ങളില്‍ പങ്കാളിയാവുകയും ചെയ്തു.
അഞ്ച് വര്‍ഷം മുന്‍പ് യൂറോ കപ്പില്‍ എറിക്‌സണ്‍ വീണപ്പോള്‍ ഡെന്മാര്‍ക്കിന്റെയും ഫിന്‍ലന്‍ഡിന്റെയും കളിക്കാര്‍ അദ്ദേഹത്തിന് ചുറ്റും മനുഷ്യമതില്‍ തീര്‍ത്ത് ക്യാമറക്കണ്ണുകളില്‍ നിന്നും മറച്ചിരുന്നു. മെഡിക്കല്‍ സംഘം ശുശ്രൂഷ നല്‍കുമ്പോഴും ഇരു ടീമുകളിലെയും താരങ്ങള്‍ സമാനമായ രീതിയില്‍ അദ്ദേഹത്തിന് ചുറ്റും നിലയുറപ്പിച്ചു. പ്രാഥമിക ശുശ്രൂഷയ്‌ക്ക് ശേഷം പിന്നീട് സ്വയം നടന്ന് ആംബുലന്‍സിലേക്ക് കയറാന്‍ എറിക്‌സന് സാധിച്ചു. നിലവിലെ ലോകകപ്പിന് യോഗ്യത നേടാന്‍ ഡെന്മാര്‍ക്കിനും യുക്രൈനും കഴിഞ്ഞിരുന്നില്ല.
