തിരുവനന്തപുരം: സംസ്ഥാനത്തെ ഹയര്സെക്കന്ഡറി, വൊക്കേഷണല് ഹയര് സെക്കന്ഡറി (വി.എച്ച്.എസ്.ഇ) ഒന്നാം വര്ഷ പ്രവേശനത്തിനായുള്ള ട്രയല് അലോട്ട്മെന്റ് ഫലം ഇന്ന് പ്രസിദ്ധീകരിക്കും. കേരളത്തിലെ 388 സ്കൂളുകളിലേക്കുള്ള അലോട്ട്മെന്റ് സാധ്യതകളാണ് ആദ്യഘട്ടത്തില് ലഭ്യമാക്കിയിട്ടുള്ളത്.
വിദ്യാര്ത്ഥികള്ക്ക് https://admission.vhseportal.kerala.gov.in എന്ന ഔദ്യോഗിക പോര്ട്ടല് വഴി ഫലം പരിശോധിക്കാവുന്നതാണ്. വെബ്സൈറ്റിലെ കാന്ഡിഡേറ്റ് ലോഗിന് പേജില് പ്രവേശിച്ച്, തങ്ങള് രജിസ്റ്റര് ചെയ്ത മൊബൈല് നമ്പരും പാസ് വേര്ഡും
നല്കിയാല് വിവരങ്ങള് ലഭ്യമാകും.
അപേക്ഷ സമര്പ്പിക്കുന്ന വേളയില് വിവരങ്ങള് പൂര്ണ്ണമായി നല്കാത്തവര്ക്ക് ഇപ്പോള് അതുകൂടി രേഖപ്പെടുത്തി അന്തിമ കണ്ഫര്മേഷന് നല്കാനുള്ള സൗകര്യമുണ്ട്. ഇതിനുപുറമെ, നല്കിയ ഓപ്ഷനുകളില് മാറ്റം വരുത്താനോ മറ്റ് തിരുത്തലുകള് വരുത്താനോ ആഗ്രഹിക്കുന്നവര്ക്ക് കാന്ഡിഡേറ്റ് ലോഗിന് വഴി ഈ മാസം 10-ാം തീയതി വൈകുന്നേരം 5 മണി വരെ സമയം അനുവദിച്ചിട്ടുണ്ട്.
ഈ അധ്യയന വര്ഷത്തെ പ്ലസ് വണ് ക്ലാസുകള് ജൂലൈ രണ്ടിന് ആരംഭിക്കാനാണ് നിലവില് തീരുമാനിച്ചിട്ടുള്ളത്. പ്രവേശനവുമായി ബന്ധപ്പെട്ട മുഴുവന് നടപടിക്രമങ്ങളും ആഗസ്റ്റ് അഞ്ചോടെ പൂര്ത്തിയാകും. സംസ്ഥാനത്താകെ ലഭ്യമായ 4,39,184 സീറ്റുകളിലേക്ക് ഇത്തവണ 4,44,124 വിദ്യാര്ത്ഥികളാണ് അപേക്ഷ സമര്പ്പിച്ചിരിക്കുന്നത്.
