റിയോ ഡി ജനീറോ: റിയോ ഒളിമ്പിക്സില് ഹോക്കിയിലും ഇടിക്കൂട്ടിലും ഇന്ത്യയ്ക്ക് നിരാശ. പുരുഷ ഹോക്കിയില് നെതര്ലന്ഡ്സിനോട് 2-1 ന് പരാജയപ്പെട്ടതിന് പിന്നാലെ ബോക്സിംഗില് ഇന്ത്യയുടെ പ്രതീക്ഷയായിരുന്ന ശിവ ഥാപ്പയും പരാജയപ്പെട്ടു. അവസാന നിമിഷം അഞ്ച് പെനാല്റ്റി കോര്ണറുകള് ലഭിച്ചിട്ടും ഗോള് നേടാന് സാധിക്കാതെയാണ് ഇന്ത്യ നെതര്ലന്ഡ്സിനോട് പരാജയം ഏറ്റുവാങ്ങിയത്.
ആദ്യഘട്ടത്തില് ഇരുടീമുകളും ആക്രമിച്ച് കളിച്ചെങ്കിലും ഗോള് മാത്രം മാറിനിന്നു. മുപ്പത്തിരണ്ടാം മിനിറ്റില് നെതര്ലന്ഡ്സിന്റെ റോജിര് ഹോഫ്മാന് ആണ് ആദ്യ ഗോള് നേടിയത്. മുപ്പത്തിയെട്ടാം മിനിറ്റില് വി.ആര് രഘുനാഥിലൂടെ ഇന്ത്യ ഗോള് മടക്കി. അന്പത്തിനാലാം മിനിറ്റില് മിന്ക് വാന്ഡെര് വീര്ഡെനിലൂടെ നെതര്ലന്ഡ്സ് ലീഡ് തിരിച്ചുപിടിക്കുകയായിരുന്നു.
ക്വാര്ട്ടര് ഉറപ്പിക്കാന് ഇനി അവശേഷിക്കുന്ന മത്സരത്തില് വിജയിക്കേണ്ട നിര്ബന്ധിത അവസ്ഥയിലാണ് ഇന്ത്യ. അന്പത്തിയാറ് കിലോ വിഭാഗത്തിലാണ് റൊബെയ്സി റമിറെസിനോട് ശിവ ഥാപ്പ പരാജയപ്പെട്ടത്. ബാഡ്മിന്റണില് ഇന്ത്യയുടെ പി.വി സിന്ധു നേടിയ വിജയമാണ് ആശ്വാസമായത്. ലോറ സറോസിയെ ആണ് സിന്ധു പരാജയപ്പെടുത്തിയത്.
വനിതകളുടെ അമ്പെയ്ത്ത് വ്യക്തിഗത ഇനത്തില് ഇന്ത്യയുടെ ദീപികാ കുമാരി ക്വാര്ട്ടറിലെത്താതെ പുറത്തായി. ചൈനീസ് തായ്പേയിയുടെ ടാന് യാ ടിന്നാണ് ആറ് പോയിന്റിന് ദീപികയെ പരാജയപ്പെടുത്തിയത്. ഇതേയിനത്തില് ഇന്ത്യയുടെ ബോംബെയ്ല ദേവിയും പുറത്തായി. മെക്സികോയുടെ അലെജെന്ദ്ര വലെന്സിയയാണ് ബൊംബെയ്ലയെ തോല്പ്പിച്ചത്.
